ବିନିକା,୩୦।୧(ଡି.ଏନ୍.ଏ.): ସୁବର୍ଣ୍ଣପୁର ଜିଲା ବିନିକା ମଧ୍ୟ ଦେଇ ପ୍ରବାହିତ ମହାନଦୀରେ ଶୁକ୍ରବାର ଏକ ଡଙ୍ଗା ବୁଡି ଗୋଟିଏ ପରିବାରର ବାପା ପୁଅଙ୍କ ମୃତ୍ୟୁ ଘଟିଛି। ମୃତକ ହେଲେ ବିନିକା ସହରସ୍ଥିତ ଶ୍ରୀରାମନଗରର ସୁଲେମାନ ଖାନ୍(୪୮) ଓ ତାଙ୍କ ପୁଅ ଆଜଲାଣ୍ଡ। ପ୍ରକାଶ ଯେ, ବିନିକା ବ୍ରିଜ ନିକଟସ୍ଥ ମହାନଦୀ ଗର୍ଭରେ ରହିଥିବା ମା’ ବାଇକାନୀ ପୀଠରେ ପୌଷ ପୂର୍ଣ୍ଣିମା ଅବସରରେ ଗତ ଦୁଇଦିନ ହେଲା ଯାତ୍ରା ଚାଲିଥିଲା। ଯାତ୍ରା ଦେଖିବା ପାଇଁ ଶୁକ୍ରବାର ସୁଲେମାନ ଓ ତାଙ୍କ ୭ ବର୍ଷର ପୁଅ ଆଜଲାଣ୍ଡ ଡଙ୍ଗାରେ ସେଠାକୁ ଯାଇଥିଲେ। ସେଠାରୁ ସନ୍ଧ୍ୟା ୬ଟାରେ ଫେରୁଥିବା ସମୟରେ କୌଣସି କାରଣରୁ ଭାରସାମ୍ୟ ହରାଇ ଡଙ୍ଗାଟି ଘାଟଠାରୁ ଅଳ୍ପ ଦୂରରେ ବୁଡି ଯାଇଥିଲା ା ଏହାଦେଖି ସଙ୍ଗେ ସଙ୍ଗେ ସ୍ଥାନୀୟ ଲୋକେ ଓ ଶ୍ରଦ୍ଧାଳୁ ନଦୀ ଭିତରୁ ସୁଲେମାନଙ୍କୁ ଉଦ୍ଧାର କରି ଅଗ୍ନିଶମ ବାହିନୀଙ୍କୁ ଖବର ଦେଇଥିଲେ। ଅଗ୍ନିଶମ ବାହିନୀ ପହଞ୍ଚତ୍ ସୁଲେମାନଙ୍କୁ ବିନିକା ଡାକ୍ତରଖାନାରେ ଭର୍ତ୍ତି କରିଥିଲେ। ତେବେ ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। ଅନ୍ୟପକ୍ଷରେ ଅଗ୍ନିଶମ ବାହିନୀ ବହୁ ଖୋଜାଖୋଜି କରି ରାତିରେ ନଦୀରୁ ଆଜଲାଣ୍ଡଙ୍କୁ ଉଦ୍ଧାର କରିଥିଲେ ହେଁ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ ା ଶନିବାର ମୃତଦେହ ବ୍ୟବଚ୍ଛେଦ ପରେ ପରିବାରବର୍ଗଙ୍କୁ ହସ୍ତାନ୍ତର କରାଯିବ ବୋଲି ଡାକ୍ତରଖାନା ସୂତ୍ରରୁ ଜଣାଯାଇଛି। ଡଙ୍ଗାରେ କେତେଜଣ ଯାତ୍ରୀ ଥିଲେ ସେ ସମ୍ପର୍କରେ ଜଣା ପଡିନାହିଁ ା