ଚମ୍ପୁଆ,୨୧ା୮(ମହେଶ୍ୱର ଦାସ): କେନ୍ଦୁଝର ଜିଲା ଚମ୍ପୁଆ ଥାନା ଅନ୍ତର୍ଗତ ଚମ୍ପୁଆ ଏନ୍ଏସି ୨ ନଂ. ୱାର୍ଡର ଶିରପୁର ଗାଁରେ ଜଣେ ନବ ବିବାହିତାଙ୍କ ମୃତଦେହ ଝୁଲନ୍ତା ଅବସ୍ଥାରେ ପୋଲିସ ଜବତ କରିଛି। ମୃତକ ଗ୍ରାମର ଅନୀତା ମହାନ୍ତ (୨୬)। ଏ ନେଇ ମହିଳାଙ୍କ ବାପା ଚମ୍ପୁଆ ଥାନାରେ ହତ୍ୟା ଅଭିଯୋଗ କରିଛନ୍ତି।
ସୂଚନା ଅନୁଯାୟୀ, ରିମୁଳି ଫାଣ୍ଡି ଅଧୀନ ମାଙ୍କିଡ଼ିଆ ସାହିର କୁବିହାରୀ ମହାନ୍ତଙ୍କ ଝିଅ ଅନୀତା ୪ ମାସ ପୂର୍ବେ ଶିରପୁରର ବିଜୟ ମହାନ୍ତଙ୍କୁ ବିବାହ କରିଥିଲେ। ମାତ୍ର ରବିବାର ଅନିତା ଘର ଭିତରେ ପିନ୍ଧା ଲୁଗାରେ ଝୁଲୁଥିବା ଘର ଲୋକ ଦେଖି ପୋଲିସକୁ ଖବର ଦେଇଥିଲେ। ପୋଲିସ ପହଞ୍ଚତ୍ ମୃତଦେହ ଜବତ କରି ବ୍ୟବଚ୍ଛେଦ ପାଇଁ ଚମ୍ପୁଆ ଉପଖଣ୍ଡ ଚିକିତ୍ସାଳୟକୁ ପଠାଇଥିଲା। ଅନୀତାଙ୍କ ପିତା କୁବିହାରୀ ଏହା ଏକ ହତ୍ୟାକାଣ୍ଡ ଏବଂ ତାଙ୍କ ଝିଅକୁ ବାରମ୍ବାର ଯୌତୁକ ନିର୍ଯାତନା ଦିଆଯାଉଥିଲା ବୋଲି କହିଛନ୍ତି। ଏନେଇ ଥାନାରେ ଏକ ମାମଲା (ନଂ. ୧୨୪/୨୩) ରୁଜୁ ହୋଇଛି। ପୋଲିସ ସାଇଣ୍ଟିଫିକ ଟିମ୍ ସହାୟତାରେ ତଦନ୍ତ ଜାରି ରଖିଥିବା ଆଇଆଇସି ତ୍ରିନାଥ ସେଠୀ ସୂଚନା ଦେଇଛନ୍ତି।