ବ୍ରହ୍ମପୁର ଅଫିସ,୧୪ା୭: ରେଳବାଇ ପୋଲିସ (ଜିଆରପି) ପୃଥକ୍ ରେଳଧାରଣାରୁ ଜଣେ ମହିଳାଙ୍କ ସମେତ ଅନ୍ୟଜଣେ ଯୁବକଙ୍କ ମୃତଦେହ ଜବତ କରିଛି। ଏନେଇ ଜିଆର୍ପି ପୋଲିସ ୨ଟି ଅପମୃତ୍ୟୁ ମାମଲା (ନଂ.୩୮/୨୧ ଓ ୩୯/୨୧) ରୁଜୁ କରି ତଦନ୍ତ ଚଳାଇଛି। ବୁଧବାର ଉଭୟ ମୃତଦେହ ଏମ୍କେସିଜି ମେଡିକାଲର ଏଫ୍ଏମ୍ଟିରେ ବ୍ୟବଚ୍ଛେଦ କରାଯାଇଛି। ଉଭୟ ମୃତଦେହର ପରିଚୟ ସ୍ପଷ୍ଟ ହୋଇପାରି ନ ଥିବା ଥାନା ଅଧିକାରୀ ଜ୍ୟୋତି ପ୍ରକାଶ ନାୟକ ସୂଚନା ଦେଇଛନ୍ତି। ଆସନ୍ତା ୩ ଦିନ ଯାଏ ମୃତଦେହ ସଂରକ୍ଷଣ ଗୃହରେ ରଖାଯିବ ବୋଲି ସେ କହିଛନ୍ତି। ମଙ୍ଗଳବାର ରାତିରେ ଲାଞ୍ଜିପଲ୍ଲୀ ନିକଟ ରେଳଧାରଣାରୁ ଜଣେ ଯୁବକଙ୍କ ମୃତଦେହ ପୋଲିସ ଜବତ କରିଥିଲା। ତାଙ୍କ ବୟସ ଆନୁମାନିକ ୪୦ ବର୍ଷ ହେବ ବୋଲି ପୋଲିସ କହିଛି। ସେହିପରି ସନ୍ଧ୍ୟାରେ ରମ୍ଭା ଷ୍ଟେଶନ ନିକଟ ରେଳଧାରଣାରୁ ଜଣେ ମହିଳାଙ୍କ ମୃତଦେହ ପୋଲିସ ଉଦ୍ଧାର କରିଥିଲା। ରେଳଧାରଣା ପାର ବେଳେ ଟ୍ରେନ୍ ଧକ୍କାରେ ସେମାନଙ୍କ ମୃତ୍ୟୁ ଘଟିଥିବା ପୋଲିସ ସନ୍ଦେହ କରୁଛି।