କେନ୍ଦୁଝର, ୧୧।୯(ସ୍ବ.ପ୍ର.): କେନ୍ଦୁଝର ବନ ଡିଭିଜନ ଅନ୍ତର୍ଗତ ସଦର ରେଞ୍ଜ ଜଂଘିରା ସେକ୍ସନ ବାରବାଙ୍କ ସଂରକ୍ଷିତ ଜଙ୍ଗଲରୁ ଶୁକ୍ରବାର ବନବିଭାଗ ଏକ ଛୁଆ ମାଈ ହାତୀର ମୃତଦେହ ଉଦ୍ଧାର କରିଛି। ତାର ବୟସ ପ୍ରାୟ ୩ ହେବ। ତେବେ ମୃତ୍ୟୁର କାରଣ ଜଣାପଡ଼ିନାହିଁ। ଏ ନେଇ ଏସିଏଫ୍ ଘନଶ୍ୟାମ ମହାନ୍ତଙ୍କୁ ପଚାରିବାରୁ ସେ ଜାଣି ନ ଥିବା କହିଛନ୍ତି। ଅନ୍ୟପକ୍ଷରେ କେନ୍ଦୁଝର ଡିଭିଜନ ଦାୟିତ୍ୱରେ ଥିବା ଆନନ୍ଦପୁର ବନ୍ୟ ପ୍ରାଣୀ ଡିଭିଜନର ଡିଏଫ୍ଓ ଅଜିତ ଶତପଥୀ ହାତୀ ଛୁଆ ମୃତ୍ୟୁ ହୋଇଥିବା ସୂଚନା ଦେଇଛନ୍ତି। ଘଟଣା ସ୍ଥଳକୁ ବନ କର୍ମଚାରୀ ଓ ପଶୁ ଚିକିତ୍ସକ ଯାଇ ଘଟଣାର ଅନୁସନ୍ଧାନ କରିଥିବା ବେଳେ ମୃତ ଛୁଆ ହାତୀର ଶବ ବ୍ୟବଚ୍ଛେଦ କରି ମାଟିରେ ପୋତି ଦେଇଛନ୍ତି। ଏହାକୁ ମିଶାଇ ଚଳିତ ବର୍ଷ କେନ୍ଦୁଝର ଜିଲାରେ ୫ ହାତୀର ମୃତ୍ୟୁ ଘଟିଛି।