ବାଙ୍କୀ, ୨୮।୧୦ (ସ୍ବ.ପ୍ର.): କଟକ ଜିଲା ବାଙ୍କୀ ଉପଖଣ୍ଡ ଚିକିତ୍ସାଳୟରେ ବୁଧବାର ଏକ ଅଭାବନୀୟ ଘଟଣା ଦେଖିବାକୁ ମିଳିଛି। ଜଣେ ଭିନ୍ନକ୍ଷମ ଯୁବକଙ୍କ ମୃତ୍ୟୁ ପରେ ତାଙ୍କୁ ଘରେ ପହଞ୍ଚାଇବାକୁ ମହାପ୍ରୟାଣ ଗାଡି ଯୋଗା ନ ଯିବାରୁ ବାଇକ୍ରେ ପରିବାର ଲୋକେ ମୃତଦେହ ନେଉଥିବା ଦେଖିବାକୁ ମିଳିଥିଲା। ବାଙ୍କୀ ଡମପଡ଼ା ବ୍ଲକ ଢଁସର ଗଁାର ଖମାରପାଟଣାର ସ୍ବର୍ଗତ ସନ୍ତୋଷ ଲେଙ୍କାଙ୍କ ଭିନ୍ନକ୍ଷମ ପୁଅ ସରୋଜ(୧୯) ମଙ୍ଗଳବାର ଶାରୀରିକ ଅସୁସ୍ଥତା ଅନୁଭବ କରିଥିଲେ। ପରିବାର ପକ୍ଷରୁ ସରୋଜଙ୍କ ଚିକିତ୍ସା ନିମନ୍ତେ ୧୦୮ ଆମ୍ବୁଲାନ୍ସ ଯୋଗେ ବାଙ୍କୀ ଉପଖଣ୍ଡ ଚିକିତ୍ସାଳୟରେ ଭର୍ତ୍ତି କରାଯାଇଥିଲା। ଚିକିତ୍ସାଧୀନ ଅବସ୍ଥାରେ ବୁଧବାର ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। ମୃତ ଭିନ୍ନକ୍ଷମ ସରୋଜଙ୍କ ପରିବାର ଲୋକେ ଉପଖଣ୍ଡ ଚିକିତ୍ସାଳୟ କର୍ତ୍ତୃପକ୍ଷଙ୍କ ସହ ମୃତଦେହକୁ କିପରି ଘରକୁ ନେବେ ଜଣାଇଥିଲେ। ହେଲେ ଚିକିତ୍ସାଳୟ ଅଧିକାରୀ କହିଲେ, ଆମର ଏଠି ସୁବିଧା ନାହିଁ ଯାହା ଅଛି ତାହା ଚାଲୁନାହିଁ। ପରିବାର ଲୋକେ ଘରୋଇ ଆମ୍ବୁଲାନ୍ସ ସହ ଯୋଗାଯୋଗ କରିଥିଲେ। ଉକ୍ତ ଆମ୍ବୁଲାନ୍ସ ଅଧିକ ଟଙ୍କା ଦାବି କରିବାରୁ ଭଡା ଦେବାକୁ ପରିବାର ଲୋକେ ଅସମର୍ଥ ପ୍ରକାଶ କରିଥିଲେ। ଶେଷରେ ପରିବାର ଲୋକେ ବାଇକ୍ ଯୋଗେ ମୃତଦେହ ନିଜ ଗ୍ରାମକୁ ନେଇଥିଲେ।
ଏ ସମ୍ପର୍କରେ ବାଙ୍କୀ ଉପଖଣ୍ଡ ଚିକିତ୍ସାଧିକାରୀ ଡା. ମୃତ୍ୟୁଞ୍ଜୟ ମହାପାତ୍ରଙ୍କୁ ପଚାରିବାରେ ଏମ୍ପିଙ୍କ ପକ୍ଷରୁ ଏକ ମହାପ୍ରୟାଣ ଗାଡି ଯୋଗାଇ ଦିଆଯାଇଛି। ତାହା ଚଳେଇବାକୁ ଚାଳକ ଏବଂ ଇନ୍ଧନର ବ୍ୟବସ୍ଥା କରାଯାଇନାହିଁ। ଜିଲା ମୁଖ୍ୟ ଚିକିତ୍ସାଧିକାରୀଙ୍କୁ ଚିଠି ଲେଖି ଅବଗତ କରାଇଥିଲେ ମଧ୍ୟ କୌଣସି ଉତ୍ତର ମିଳି ନ ଥିବାରୁ ତାହା କାର୍ଯ୍ୟକାରୀ ହୋଇପାରିନାହିଁ ବୋଲି ସେ କହିଛନ୍ତି।