ନବରଙ୍ଗପୁର,୨୯।୫(ବି.ପ୍ର.): ମୃତଦେହକୁ ସମ୍ମାନ ଦେଇ ତାହାର ସୁରକ୍ଷା ଓ ସତ୍କାର ପାଇଁ ସରକାରଙ୍କ ନିର୍ଦ୍ଦେଶ ରହିଛି। ନବରଙ୍ଗପୁର ଜିଲ୍ଲା ମୁଖ୍ୟ ଚିକିତ୍ସାଳୟର ଚିତ୍ର କିନ୍ତୁ ସମ୍ପୂର୍ଣ ଅଲଗା। ଶୁକ୍ରବାରରୁ ରାଇଘରରୁ ଜଣେ ଅଜଣା ବ୍ୟକ୍ତିଙ୍କ ମୃତଦେହକୁ ଜିଲା ମୁଖ୍ୟ ଚିକିତ୍ସାଳୟ ଶବଗୃହରେ ରଖା ଯାଇଛି। ଏବେ ମୃତଦେହରୁ ଦୁର୍ଗନ୍ଧ ବାହାରି ଆଖପାଖ ପରିବେଶ ପ୍ରଦୂଷିତ କରୁଛି। ମୃତଦେହ ରଖିବାକୁ ଥିବା ଫ୍ରିଜର ଖରାପ ଥିବାବେଳେ ତଷୁ ଓ ଗୋଟିଏ ଆଇସ ଖଣ୍ଡ ଦେଇ ତାହାକୁ ରଖା ଯାଇଛି l ମୃତଦେହ ଏବେ ପଚିବାକୁ ବସିଲାଣି। ବିଗତ ଦିନରେ ଉମରକୋଟ ମେଡିକାଲରେ ମଧ୍ୟ ଏପରି ଏକ ଚିତ୍ର ସାମ୍ନାକୁ ଆସିଥିଲା। ସେଠାରେ ରଖାଯାଇଥିବା ମୃତଦେହ କ୍ଷତ ବିକ୍ଷତ ହୋଇ ମିଳିଥିଲା। ଏନେଇ ସିଡିଏମ୍ଓ କାଳୀ ପ୍ରସାଦ ବେହେରାଙ୍କୁ ପଚାରିବାରୁ ଫ୍ରିଜର ପାଇଁ ଉପରିସ୍ଥ ଅଧିକାରୀଙ୍କୁ ପତ୍ର ଲେଖାଯାଇଛି। ଶବଗୃହରୁ ପାଣି ବାହାରିବା ପାଇଁ ମଧ୍ୟ ଉତ୍ତମ ଡ୍ରେନ ବ୍ୟବସ୍ଥା ନ ଥିବାରୁ ପାଣି ଆସୁଛି। ଶୁକ୍ରବାରଠାରୁ କରେଣ୍ଟ ନ ଥିବା ଯୋଗୁ ବାଧ୍ୟ ହୋଇ ଆଇସ ଦିଆ ଯାଇ ରଖାଯାଇଛି। ଉମରକୋଟ ଓ ନବରଙ୍ଗପୁର ମେଡ଼ିକାଲ ପାଇଁ ୨ଟି ଲେଖାଏ ମରଚରି ଯୋଗାଇ ଦିଆଯିବ ବୋଲି ସେ କହିଛନ୍ତି। ମୃତଦେହକୁ ଅସମ୍ମାନ କରାଯାଇଥିବା କହି ବୁଦ୍ଧିଜୀବୀମାନେ ତୀବ୍ର ନିନ୍ଦା କରିଛନ୍ତି।
