ଖୋର୍ଦ୍ଧା ଅଫିସ,୮ା୧୧: ଉତ୍କଳୀୟ ସଂସ୍କୃତିରେ ବୋଇତ ବନ୍ଦାଣ ଉତ୍ସବର ବିଶେଷ ମହତ୍ତ୍ୱ ରହିଛି। ସବୁଠି ଏହାକୁ ଆନନ୍ଦର ସହ ପାଳନ କରାଯାଏ। ଆ କା ମା ବୈ ମନ୍ତ୍ରଧ୍ୱନିରେ ଗଗନପବନ ମୁଖରିତ ହୋଇଥାଏ। ସକାଳେ ଶ୍ରଦ୍ଧାଳୁମାନେ ପରିବାର ସହ ନଦୀ, ପୋଖରୀ, ସମୁଦ୍ର ତଟରେ ବୋଇତ ବନ୍ଦାପନା କରି ଭସାଇଥାନ୍ତି। ଏହି ପରମ୍ପରା ଅତି ପ୍ରାଚୀନ। ଏହାର ଅବ୍ୟବହିତ ପୂର୍ବରୁ ଜଟଣୀ ହାଟବଜାର ଗୋପୀନାଥପୁରର ସୂକ୍ଷ୍ମ କାରୁକାର୍ଯ୍ୟ ଲାଗି ପରିଚିତ ଏଲ୍.ଈଶ୍ୱର ରାଓ ୭୫୦ ଏମ୍ଏଲ୍ର କାଚ ବୋତଲରେ ୨.୫ ଇଞ୍ଚ ଉଚ୍ଚ ଓ ସାଢେ ୩ ଇଞ୍ଚ ଚଉଡ଼ା ବିଶିଷ୍ଟ ବୋଇତ ପ୍ରସ୍ତୁତ କରିଛନ୍ତି। ଏଥିଲାଗି ସେ ତୁଳା, ପେପର ଖଣ୍ଡ ଓ କାଚ ବୋତଲ, ଚୁମୁକି, ଜିଙ୍କ୍ ଆଦି ବ୍ୟବହାର କରିଛନ୍ତି। ଉତ୍କଳ ସାଧବପୁଅଙ୍କ ନୌବାଣିଜ୍ୟ ସଂସ୍କୃତିର ବାର୍ତ୍ତା ଦେବା ସହ ବୋଇତ ବନ୍ଦାଣ ଉତ୍ସବରେ ଓଡ଼ିଶାବାସୀଙ୍କୁ ଶୁଭେଚ୍ଛା ଜଣାଇଛନ୍ତି। ଏଥିସହ ନଦୀ ଓ ପୋଖରୀରେ ସୁରକ୍ଷିତ ଭାବେ ବୋଇତ ବନ୍ଦାଣ କରିବାକୁ ନିବେଦନ କରିଛନ୍ତି।