ମେଲବୋର୍ନ,୯ା୮(ପି.ଟି.): ଯଦି ଦର୍ଶକଙ୍କୁ ଷ୍ଟାଡିୟମ ଭିତରକୁ ଯିବାକୁ ଅନୁମତି ଦିଆଯାଏ ତା’ହେଲେ ବକ୍ସିଂ ଡେ ଟେଷ୍ଟ ମେଲବୋର୍ନରେ ଆୟୋଜନ ହେବ ବୋଲି କ୍ରିକେଟ ଅଷ୍ଟ୍ରେଲିଆ (ସିଏ) ମଧ୍ୟବର୍ତ୍ତିକାଳୀନ କାର୍ଯ୍ୟ ନିର୍ବାହୀ ନିକ୍ ହୋକ୍ଲି କହିଛନ୍ତି। ଭାରତ ଅଷ୍ଟ୍ରେଲିଆ ଗସ୍ତରେ ଯିବାର କାର୍ଯ୍ୟକ୍ରମ ଥିବା ବେଳେ ବକ୍ସିଂ ଡେ ଟେଷ୍ଟକୁ ଆଡିଲେଡ୍କୁ ସ୍ଥାନାନ୍ତର କରିବାକୁ ଅନୁମାନ କରାଯାଉଥିଲା। ଭିକ୍ଟୋରିଆ ରାଜ୍ୟରେ କରୋନ ଭାଇରସ୍ ସଂକ୍ରମଣ ବୃଦ୍ଧି ପାଉଥିବାରୁ ଏ ନେଇ ଚର୍ଚ୍ଚା ହେଉଥିଲା। କିନ୍ତୁ ଯଦି ଦର୍ଶକଙ୍କୁ ମ୍ୟାଚ୍ ଦେଖିବାକୁ ଷ୍ଟାଡିୟମ ଭିତରକୁ ଛଡ଼ା ଯାଏ ତା’ହେଲେ ଏହି ଟେଷ୍ଟ ମେଲବୋର୍ନ କ୍ରିକେଟ ଗ୍ରାଉଣ୍ଡ (ଏମ୍ସିଜି)ରେ ଖେଳାଯିବ ବୋଲି ହୋକ୍ଲି ସ୍ପଷ୍ଟ କରିଛନ୍ତି। ସେତେବେଳକୁ ପରିସ୍ଥିତିରେ ସୁଧାର ଆସିଥିବ। ଅଷ୍ଟ୍ରେଲୀୟ କ୍ରୀଡ଼ା କ୍ୟାଲେଣ୍ଡରରେ ବକ୍ସିଂ ଡେ ଟେଷ୍ଟକୁ ବେଶ୍ ମର୍ଯ୍ୟାଦା ଓ ଗୁରୁତ୍ୱ ଦିଆଯାଇଥାଏ। ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ) ଓ ସରକାର ସହ ଆମେ ଆଲୋଚନା କରିଛୁ। ସେତେବେଳକୁ ଯାତ୍ର କଟକଣା ଉଠାଇବାକୁ ଆମେ ସରକାରଙ୍କୁ ଅବଗତ କରାଇଛୁ ବୋଲି ସେ ସ୍ପଷ୍ଟ କରିଛନ୍ତି। ଏମ୍ସିଜିରେ ଗତ ମାର୍ଚ୍ଚରେ ଅନୁଷ୍ଠିତ ଭାରତ- ଅଷ୍ଟ୍ରେଲିଆ ମହିଳା ଟି୨୦ ବିଶ୍ୱକପ୍ ଫାଇନାଲ ମ୍ୟାଚ୍କୁ ୮୬,୧୭୪ ଦର୍ଶକ ଉପଭୋଗ କରିଥିଲେ। କୋଭିଡ୍-୧୯ ମହାମାରୀକୁ ଦୃଷ୍ଟିରେ ରଖି ଆମେ ସବୁ ପ୍ରକାର ନିଷ୍ପତ୍ତି ନେବୁ ବୋଲି ହୋକ୍ଲି କହିଛନ୍ତି।