ବରଗଡ଼ ଅଫିସ୍,୧।୮-ପ୍ରେମିକାଙ୍କୁ ବ୍ରିଜ୍ ତଳକୁ ଠେଲି ଦେଇ ଜଣେ ଯୁବକ ଏକ ଟିଏମ୍ସିରେ କ୍ବାରାଣ୍ଟାଇନରେ ରହିବା ଘଟଣା ଏବେ ବରଗଡ଼ରେ ଚର୍ଚ୍ଚାର ବିଷୟ ହୋଇଛି। ଅନ୍ୟପକ୍ଷେ ଗୁରୁତର ଅବସ୍ଥାରେ ସମ୍ପୃକ୍ତ ଯୁବତୀ ଜଣକ ବୁର୍ଲା ଡାକ୍ତରଖାନାରେ ଚିକିତ୍ସିତ ହେଉଛନ୍ତି।
ସୂଚନା ଅନୁଯାୟୀ, ବରଗଡ଼ ଜିଲା ଦେଓଗାଁ ନିକଟ ହାଲୁପାଲି ଗ୍ରାମର ଜଣେ ଯୁବକ ଛତିଶଗଡ଼ ଅଞ୍ଚଳର ନିଜ ପ୍ରେମିକାଙ୍କୁ ନେଇ ଅହମ୍ମଦାବାଦରେ ରହୁଥିଲେ। ଶୁକ୍ରବାର ସେମାନେ ହାଲୁପାଲିକୁ ଫେରୁଥିଲେ। ଫେରିବା ବାଟରେ ଯୁବକ ଜଣକ ଉକ୍ତ ଯୁବତୀଙ୍କୁ ବରଗଡ଼ ସହର ଉପକଣ୍ଠ ବରଡୋଲ-ଦେଓଗାଁ ରାସ୍ତାର ଗ୍ରୀସୁଲ ନଦୀ ବ୍ରିଜ୍ ଉପରୁ ତଳକୁ ଠେଲି ଦେଇଥିଲେ। ବ୍ରିଜ ତଳେ ଅର୍ଥାତ୍ ଗ୍ରୀସୁଲ ନଦୀରେ ଗୁରୁତର ଅବସ୍ଥାରେ ଯୁବତୀ ଜଣକ ପଡ଼ିଥିବା ଶନିବାର ସକାଳେ ସ୍ଥାନୀୟ ଲୋକେ ଦେଖିବାକୁ ପାଇଥିଲେ। ଖବରପାଇ ସ୍ବେଚ୍ଛାସେବୀ ବିକାଶ ଅଗ୍ରୱାଲ, ଶେଷଦେବ ପ୍ରଧାନ, ନିଲେଶ ପ୍ରଧାନ, ଜି. ରମେଶ ପ୍ରମୁଖ ଉକ୍ତ ଯୁବତୀଙ୍କୁ ଉଦ୍ଧାର କରି ଜିଲା ମୁଖ୍ୟ ଡାକ୍ତରଖାନାକୁ ଆଣିଥିଲେ। ସ୍ବାସ୍ଥ୍ୟାବସ୍ଥା ସଙ୍କଟାପନ୍ନ ଥିବାରୁ ଯୁବତୀଙ୍କୁ ପ୍ରାଥମିକ ଚିକିତ୍ସା ପରେ ବୁର୍ଲା ସ୍ଥାନାନ୍ତର କରାଯାଇଥିଲା। ଯୁବତୀଙ୍କଠାରୁ ଏକ ଆଧାର କାର୍ଡ ମିଳିଛି।