ପଦ୍ମପୁର, ୫।୬ (ଡି.ଏନ.ଏ.): ପ୍ରେମିକଙ୍କୁ ପ୍ରତାରଣା କରି ପ୍ରେମିକା ଅନ୍ୟ ଜଣେ ଯୁବକଙ୍କୁ ବାହା ହେବାକୁ ଯାଉଛନ୍ତି। ଏନେଇ ପ୍ରେମିକ ଥାନାର ଦ୍ୱାରସ୍ଥ ହୋଇଥିଲେ ମଧ୍ୟ ପୋଲିସ କୌଣସି ପଦକ୍ଷେପ ନେଇ ନ ଥିଲା। ଏଣୁ ବିବାହ ପରେ ରାସ୍ତାରେ ଯାଉଥିବା ବେଳେ ବରକନ୍ୟାଙ୍କ ଗାଡ଼ିକୁ ଅଟକାଇଲେ ପ୍ରେମିକ। ଏହାକୁ ନେଇ ସେଠାରେ ଉତ୍ତେଜନା ଦେଖାଦେଇଥିଲା। ଶନିବାର ଭଦ୍ରକ ଜିଲା ସାବରଙ୍ଗ ଥାନା ଅଧୀନ ଇଚ୍ଛାପୁରଠାରେ ଏଭଳି ଘଟଣା ଚର୍ଚ୍ଚାର ବିଷୟ ହୋଇଛି।
ସୂଚନା ଅନୁଯାୟୀ, ସାବରଙ୍ଗ ଥାନା ଅଧୀନ ବରାଙ୍ଗ ଗ୍ରାମର ଦୀନବନ୍ଧୁ ବାରିକ(୨୭) ପ୍ରାୟ ୭ବର୍ଷ ହେଲା ବାସୁଦେବପୁର ଥାନା ଲୁଙ୍ଗା ଅଞ୍ଚଳର ଜଣେ ଯୁବତୀଙ୍କୁ ଭଲ ପାଉଥିଲେ। ଏପରିକି ଯୁବତୀଙ୍କ ପରିବାର ସହ କଥା ହୋଇ ବାହାଘର ପର୍ଯ୍ୟନ୍ତ କଥା ଯାଇଥିଲା। ଦୀନବନ୍ଧୁ ସହ ଝିଅକୁ ବାହା ଦେବା ପାଇଁ ଯୁବତୀଙ୍କ ପରିବାର ଲୋକେ ରାଜି ହୋଇଥିଲେ। ଯୁବତୀଙ୍କ ବାପା ଦୀନବନ୍ଧୁଙ୍କ ପାଖରୁ ଟଙ୍କା ମଧ୍ୟ ନେଇଥିଲେ। ଦୁଇ ପରିବାର ମଧ୍ୟରେ ସବୁକିଛି ଠିକ୍ଠାକ୍ ଥିବାବେଳେ ଶୁକ୍ରବାର ରାତିରେ ପ୍ରେମିକାଙ୍କ ବାହାଘର ଅନ୍ୟତ୍ର ହେବାକୁ ଯାଉଛି ବୋଲି ସେ ଶୁଣିବାକୁ ପାଇଥିଲେ। ପ୍ରେମିକା ଓ ତାଙ୍କ ବାପାଙ୍କ ସହ ସେ ଯୋଗାଯୋଗ କରିଥିଲେ ମଧ୍ୟ କେହି ଫୋନ ଉଠାଇ ନ ଥିଲେ। ଫଳରେ ଏନେଇ ଦୀନବନ୍ଧୁ ଶୁକ୍ରବାର ବିଳମ୍ବିତ ରାତିରେ ସାବରଙ୍ଗ ଥାନାରେ ଅଭିଯୋଗ କରିଥିଲେ। କିନ୍ତୁ ପୋଲିସଠାରୁ କୌଣସି ସହଯୋଗ ନ ପାଇବାରୁ ବାହାଘର ସାରି ଶନିବାର ପୂର୍ବାହ୍ନ ପ୍ରାୟ ୧୧ଟା ବେଳେ ଫେରୁଥିବା ବରକନ୍ୟାଙ୍କ ଗାଡ଼ିକୁ ଇଚ୍ଛାପୁରଠାରେ ଦୀନବନ୍ଧୁ ଅଟକାଇଥିଲେ। ଏହା ଦେଖି ସେଠାରେ ଉପସ୍ଥିତ ଲୋକେ ତାଙ୍କୁ ଘେରି ଯାଇଥିଲେ। ଖବରପାଇ ସାବରଙ୍ଗ ପୋଲିସ ପହଞ୍ଚି ବରକନ୍ୟାଙ୍କ ସମେତ ସମସ୍ତଙ୍କୁ ଥାନାକୁ ନେଇଯାଇଥିଲା। ସେଠାରେ ୩ ପକ୍ଷ ମଧ୍ୟରେ ବୁଝାମଣା କରାଇବା ପରେ ପୋଲିସ ଅନ୍ୟମାନଙ୍କୁ ଛାଡ଼ି ଦେଇ ଦୀନବନ୍ଧୁ ଓ ଯୁବତୀଙ୍କ ବାପାଙ୍କୁ ଅଟକ ରଖିଥିଲା। ସେମାନଙ୍କୁ ବୁଝାଶୁଝା କରିବା ସହ ଭବିଷ୍ୟତରେ କେହି କାହା ପ୍ରତି କୌଣସି ଆକ୍ଷେପ ମୂଳକ ପଦକ୍ଷେପ ନେବେ ନାହିଁ ବୋଲି ଲିଖିତ ପ୍ରତିଶ୍ରୁତି ପାଇବା ପରେ ଛାଡ଼ି ଦିଆଯାଇଥିବା ଥାନାଧିକାରୀ ଶୋଭେନ କୁମାର ସ୍ବାଇଁ କହିଛନ୍ତି।
