ପ୍ରେମ ଶାଶ୍ୱତ, ଚିରନ୍ତନ। ପ୍ରେମର ଆବେଗ ଜଣେ ବ୍ୟକ୍ତିର ଜୀବନକୁ ସୁନ୍ଦର ଭାବରେ ଗଢ଼ି ତୋଳିଥାଏ। ବେଳେବେଳେ ଏହି ପ୍ରେମରେ କିଛି ଭୁଲ୍ ଭୁଝାମଣା ରହିଲେ ଏହା ଭୟଙ୍କର ହୋଇଥାଏ। ପ୍ରତିଶୋଧ ପରାୟଣ ହୋଇଉଠନ୍ତି ପ୍ରେମୀଯୁଗଳ। ବ୍ରାଜିଲରେ ରହୁଥିବା ଜଣେ ଯୁବକ ପ୍ରେମିକାଙ୍କ ଉପରେ ଏମିତି ପ୍ରତିଶୋଧ ନେଇଛନ୍ତି ଯେ, ଜାଣିଲେ ଆଶ୍ଚର୍ଯ୍ୟ ହେବେ।
ବ୍ରାଜିଲର ସାଓ ପାଉଲୋରେ ଏହି ଘଟଣା ଘଟିଛି। ଏଠାରେ ରହୁଥିବା ୨୧ ବର୍ଷୀୟ ଜଣେ ଯୁବକଙ୍କୁ ତାଙ୍କ ପ୍ରେମିକା ଧୋକ୍କା ଦେଇଥିଲେ। ଏହା ପରେ ଯୁବକଙ୍କ ରାଗ ପଞ୍ଚମ ହୋଇଯାଇଥିଲା। ପରେ ସେ ପ୍ରେମିକାଙ୍କୁ ଅପହରଣ ଜୋର ଜରବଦସ୍ତ ନିଜ ଘରକୁ ନେଇଯାଇଥିଲେ। ଖାଲି ଏତିକି ନୁହେଁ, ପ୍ରତିଶୋଧ ନେବାକୁ ସେ ପ୍ରେମିକାଙ୍କ ଗାଲରେ ନିଜର ପୂରା ନାମ ଟାଟୁ କରି ଲେଖି ଦେଇଥିଲେ।
ବ୍ରାଜିଲର କୋହ୍ଲୋ ନାମକ ଜଣେ ୨୧ ବର୍ଷର ଯୁବକ ତୟାନେ କାଲଡାସ ନାମକ ଜଣେ ୧୮ ବର୍ଷୀୟା ଯୁବତୀଙ୍କୁ ଭଲ ପାଉଥିଲେ। କିଛିଦିନ ପ୍ରେମ ସମ୍ପର୍କ ଠିକ୍ଠାକ୍ ଚାଲିବା ପରେ। ଦୁହିଁଙ୍କ ମଧ୍ୟରେ ବ୍ରେକଅପ୍ ହୋଇଯାଇଥିଲା। ଆଉ ଏହି ବ୍ରେକ୍ଅପ୍ ତୟାନେଙ୍କ ପକ୍ଷରୁ ହୋଇଥିଲା। ବ୍ରେକ୍ଅପ୍ର ଠିକ୍ ଗୋଟିଏ ଦିନ ପରେ,ପ୍ରେମିକା କଲେଜ ଯାଉଥିବା ବେଳେ କୋହ୍ଲୋ ତାଙ୍କୁ ଜୋର୍ଜବରଦସ୍ତ ଉଠାଇ ନେଇ କାର୍ରେ ବସାଇ ଘରକୁ ଆଣିଥିଲେ। ଘରେ ପହଞ୍ଚିବା ପରେ ସେ ପ୍ରେମିକାଙ୍କ ଡାହାଣ ଗାଲରେ ନିଜ ନାମରେ ଏକ ଟାଟୁ ଆଙ୍କିଦେଇଥିଲେ। ତା’ ପରଦିନ ଯେତେବେଳେ ଯୁବତୀଙ୍କ ମାଆ ଝିଅକୁ ଖୋଜିଥିଲେ ସେତେବେଳେ ତାଙ୍କୁ କୋହ୍ଲୋଙ୍କ ଘରେ ଦେଖିବାକୁ ପାଇଥିଲେ। ମା’ଙ୍କ ନିର୍ଦ୍ଦେଶରେ ପ୍ରେମିକା ମଧ୍ୟ ପ୍ରେମିକଙ୍କ ବିରୋଧରେ ଅଭିଯୋଗ କରିଥିଲେ।
ପ୍ରେମିକାଙ୍କ ଅଭିଯୋଗ ଉପରେ କୋହ୍ଲୋଙ୍କୁ ଗିରଫ କରିଥିଲା ପୋଲିସ। କୋହ୍ଲୋ ଏବଂ ତାଙ୍କ ପିତା କହିଛନ୍ତି ଝିଅଟି ନିଜ ଖୁସିରେ ଟାଟୁ ଆଙ୍କିଛନ୍ତି। ଅନ୍ୟପକ୍ଷରେ ପ୍ରେମିକା କହିଛନ୍ତି, ତାଙ୍କର ଇଚ୍ଛା ନ ଥିଲା। ସେ ଭୟଭୀତ ଥିବାରୁ ଟାଟୁ ଆଙ୍କିବାକୁ ଗାଲ ଦେଖାଇଥିଲେ। ଏହି ଘଟଣା ଭାଇରାଲ ହେବା ପରେ ଟାଟୁ ହଟାଇ ଦିଆଯାଇଛି। କୋହ୍ଲୋ ଜଣେ ଟାଟୁ କଳାକାର ଥିଲେ, ତେଣୁ ସେ ପ୍ରେମିକାଙ୍କ ଶରୀରରେ ଅନେକ ସ୍ଥାନରେ ତାଙ୍କ ନାମରେ ଟାଟୁ ଆଙ୍କିଥିଲେ।