ବ୍ରହ୍ମଗିରି, ୨୬।୫(ଡି.ଏନ.ଏ.) : ପୁରୀ ବ୍ରହ୍ମଗିରି ଥାନା ଅନ୍ତର୍ଗତ ସାହୁପଡ଼ା ଗ୍ରାମରେ ବୁଧବାର ରାତିରେ ଏକ ଅଭାବନୀୟ ଘଟଣା ଘଟିଛି । ପ୍ରେମିକାଙ୍କ ଘରେ ପ୍ରେମିକଙ୍କର ମୃତ୍ୟୁ ଘଟିଛି। ତାଙ୍କର ଝୁଲନ୍ତା ମୃତଦେହ ଦେଖିବାକୁ ମିଳିବା ପରେ ପ୍ରେମିକଙ୍କ ପରିବାରଲୋକେ ତାଙ୍କ ପୁଅଙ୍କୁ ହତ୍ୟା କରାଯାଇଥିବା ଅଭିଯୋଗ ଆଣିଛନ୍ତି। ପୋଲିସ ଗୁରୁବାରପ୍ରେମିକାଙ୍କ ପରିବାରର ୫ ଜଣଙ୍କୁ ଅଟକ ରଖି ପଚରାଉଚରା କରୁଛି।
ସୂଚନାନୁଯାୟୀ, ସାହୁପଡା ଗ୍ରାମର ସୂର୍ଯ୍ୟକାନ୍ତ ପରିଡା ଏବଂ ଉକ୍ତ ଗ୍ରାମର ଜଣେ ଝିଅ ପରସ୍ପରକୁ ଭଲ ପାଇ ଆସୁଥିଲେ। ହେଲେ ଝିଅଙ୍କ ପରିବାରଲୋକେ ସମ୍ପର୍କକୁ ବିରୋଧ କରି ଆସୁଥିଲେ। ବୁଧବାର ସୂର୍ଯ୍ୟଙ୍କୁ ଝିଅଙ୍କ ପରିବାରଲୋକେ ଘରକୁ ଡାକିଥିଲେ। ହେଲେ ସେ ନ ଫେରିବାରୁ ସୂର୍ଯ୍ୟଙ୍କ ପରିବାରଲୋକେ ଖୋଜାଖୋଜି କରିଥିଲେ। ମାତ୍ର ସେ ପ୍ରେମିକା ଘର ଭିତରେ ଥିବା ଫ୍ୟାନରେ ଝୁଲୁଥିବା ନେଇ ସେମାନଙ୍କୁ ଖବର ମିଳିଥିଲା। ପରେ ସେମାନେ ଗ୍ରାମବାସୀଙ୍କ ସହାୟତାରେ ଝିଅ ପରିବାରଲୋକଙ୍କୁ ଅଟକ ରଖି ବ୍ରହ୍ମଗିରି ଥାନାରେ ଲିଖିତ ଅଭିଯୋଗ କରିଥିଲେ। ଘଟଣାସ୍ଥଳରେ ପୋଲିସ ପହଞ୍ଚି ପ୍ରେମିକାଙ୍କ ପରିବାରର ୫ ଜଣ ସଦସ୍ୟଙ୍କୁ ଆଣି ଥାନାରେ ଅଟକ ରଖିଛି । ଘଟଣାକୁ ୧୨ ଘଣ୍ଟାରୁ ଊଦ୍ଧର୍ବ ସମୟ ବିତିଯାଇଥିଲେ ମଧ୍ୟ ସେଠାରେ ସାଇଣ୍ଟିଫିକ ଟିମ୍ ପହଞ୍ଚି ନାହିଁ କି ପୋଲିସ ମୃତଦେହକୁ ଜବତ କରିନାହିଁ। ଏପଟେ ମୃତ ପ୍ରେମିକଙ୍କ ଫଟୋ ଏବେ ଭାଇରାଲ ହେଉଛି ।
