ବାହାନଗା,୬।୬(ଡି.ଏନ.ଏ.) ବାଲେଶ୍ୱର ଜିଲା ବାହାନଗା ବ୍ଲକ ଅଞ୍ଜି ପଞ୍ଚାୟତର ଖରିଦା ଓ ଖନ୍ତାପଡ଼ା ପଞ୍ଚାୟତର ଚିତାପଦା ଗ୍ରାମରେ ଦେବଦମ୍ପତିଙ୍କ ବିବାହ ଉତ୍ସବ ଶେଷ ହୋଇଛି। ଚିତାପଦା ଗ୍ରାମସ୍ଥିତ ବାବା ଚିତ୍ରେଶ୍ୱରଙ୍କ ବିବାହ ନିମନ୍ତେ ମନ୍ଦିର ପରିସରରୁ ବରଯାତ୍ରୀ ଶୋଭାଯାତ୍ରାରେ ବାହାରି ଖନ୍ତାପଡ଼ା ବଜାର ପରିକ୍ରମା କରି ମାତା ପାର୍ବତୀଙ୍କ ଘରେ ପହଞ୍ଚି ଥିଲେ। ସାଥିରେ ପୁରୀର ଘଣ୍ଟୁଆ, ଚାନ୍ଦବାଲିର ଷଣ୍ଢ ନାଚ, କେନ୍ଦ୍ରାପଡାରୁ ଦୁଲଦୁଲି ବାଦ୍ୟ, କଣ୍ଟିଆଟିକିରିରୁ ବ୍ୟାଣ୍ଡ୍ପାର୍ଟି, ଅତାପୁରରୁ କୀର୍ତ୍ତନ ଦଳ, ବାଲେଶ୍ୱରରୁ ଡିଜେ, ଗୋପରୁ ପଞ୍ଜାବି ବାଦ୍ୟର ତାଳେ ତାଳେ ବରଯାତ୍ରୀ ଦଳ ନାଚିନାଚି କନ୍ୟା ଘରକୁ ଯାଇଥିଲେ। ଦେବଦମ୍ପତିଙ୍କ ବିବାହ ପରେ କନ୍ୟା ପିତା ଲାମ୍ବୋଧର ପ୍ରଧାନ ଯୌତୁକ ନିମନ୍ତେ ନାଗନାଗୁଣି ସମେତ ୫ ହଜାର ଅର୍ଥ ରାଶି, ୫ ଏକର ଶ୍ମଶାନ ଜମି ପ୍ରଦାନ କରିଥିଲେ। ଶିବପାର୍ବତୀ ଉନ୍ନୟନ କମିଟିର ସଭାପତି ଦିଲ୍ଲୀପ କୁମାର ଦାସଙ୍କ ତତ୍ତ୍ୱାବଧାନରେ କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା। ରମାକାନ୍ତ ବାରିକ୍, ଶରତ ପାଣିଗ୍ରାହୀ, ବିରେନ୍ଦ୍ର ସ, ବିଜୟ କୁମାର ଦାସ, ରବୀନ୍ଦ୍ର ପ୍ରଧାନ, ବସନ୍ତ ବେହେରା,ପର୍ଶୁରାମ ବେହେରା, ରାଜେନ୍ଦ୍ର ସ, ଜଗନ୍ନାଥ ବାରିକଙ୍କ ସମେତ ଚିତାପଦା ଗ୍ରାମବାସୀ ଏଥିରେ ସହଯୋଗ କରିଥିଲେ। ଚିତ୍ରେଶ୍ୱର ମହାଦେବଙ୍କ ପିତା ଭାବେ ଜୟକୃଷ୍ଣ ବାରିକଙ୍କ ସହିତ ପାର୍ବତୀଙ୍କ ପିତା ଲାମ୍ବୋଧର ପ୍ରଧାନଙ୍କର ସମୁଦି ମିଳନ ହୋଇଥିଲା। ସେହିପରି ଅଞ୍ଜି ପଞ୍ଚାୟତର ଖରିଦା ଗ୍ରାମରେ ଶିବପାର୍ବତୀଙ୍କ ବିବାହ ଉତ୍ସବ ପଣ୍ଡିତ ଗୟାଧର ଶତପଥୀଙ୍କ ତତ୍ତ୍ୱାବଧାନରେ ଅନୁଷ୍ଠିତ ହୋଇଯାଇଛି। କନ୍ୟା ପିତା ଭାବେ ହୃଷିକେଶ ଓଝା ଓ ବରପିତା ଭାବେ ନରହରୀ ନାୟକ ଦାୟିତ୍ୱ ତୁଲାଇଥିଲେ। ଶତୃଘନ ନନ୍ଦ,ଗଦାଧର ଶତପଥୀ, ବିଶ୍ୱଜିତ୍ ଦାସ, ବିଜୟା ନନ୍ଦ ବାରିକ୍, ତପନ କୁମାର ରାଉତଙ୍କ ସମେତ ଖରିଦା ଗ୍ରାମବାସୀଙ୍କ ସହଯୋଗରେ ବିବାହ କାର୍ଯ୍ୟ ସମ୍ପନ୍ନ ହୋଇଥିଲା।
