କୋଟଗଡ଼,୧୩।୬(ଡି. ଏନ.ଏ): ବର ଯୌତୁକରେ ବାଇକ୍ ମାଗିବାରୁ ବାପଘରକୁ ପଳେଇ ଆସିଲା ନବବଧୂ। ଏଭଳି ଘଟଣା ଦେଖିବାକୁ ମିଳିଛି କନ୍ଧମାଳ ଜିଲା କୋଟଗଡ ବ୍ଲକ ପାରିଗଡ଼ ପଞ୍ଚାୟତ ସାରୁପାଟା ଗାଁରେ। ଉକ୍ତ ଗାଁର ଆନ୍ଦୁରୁ ଦିଗାଲଙ୍କ ଝିଅ ଦେବକୀ ଗତ ୯ ତାରିଖରେ ବାଲିଗୁଡା ବ୍ଲକ ବରିକିଆ ଗାଁର ଅର୍ଜୁନ ଦିଗାଲଙ୍କୁ ବିବାହ କରିଥିଲେ। ଆଉ ୧୦ ତାରିଖରେ କନ୍ୟା ପକ୍ଷ ଲୋକେ ବରଘରର ନିମନ୍ତ୍ରଣ କ୍ରମେ ବିବାହ ଭୋଜିକୁ ଯାଇଥିଲେ । ହେଲେ ସେଠାରେ ଅର୍ଜୁନ କନ୍ୟା ପକ୍ଷ ଲୋକଙ୍କୁ ଯୌତୁକରେ ଗୋଟିଏ ବାଇକ ଦେବାକୁ ଦାବି କରିଥିଲେ। କନ୍ୟା ପକ୍ଷ ଲୋକେ ବାଇକ ଦେବାକୁ ଅକ୍ଷମ ବୋଲି କହିବା ପରେ ଅର୍ଜୁନ ରାଗିଯାଇ ତମ ଝିଅକୁ ନେଇଯାଅ ବୋଲି ଅତିଥିଙ୍କ ଆଗରେ କହିଥିଲେ। ବରର ଏଭଳି ବ୍ୟବହାର ଦେଖି ଉପସ୍ଥିତ ଥିବା ନବବଧୂ ଦେବକୀ ହାତରୁ ଶଙ୍ଖା ଓ ବେକରୁ ମଙ୍ଗଳସୂତ୍ର ଖୋଲି ଦେଇ ବାପାଘର ଲୋକଙ୍କ ସହ ଗାଁକୁ ଫେରି ଆସିଥିଲେ।
ଦୀର୍ଘ ଦୁଇ ବର୍ଷ ପୂର୍ବେ ଉଭୟ ପରିବାର ଲୋକଙ୍କ ଜଣାଶୁଣାରେ ଉଭୟଙ୍କ ନିର୍ବନ୍ଧ ହୋଇଥିଲା। ଦେବକୀ ଗୋଟିଏ ଅଭାବୀ ଘରର ଝିଅ ହୋଇଥିବା ବେଳେ ବର ଅର୍ଜୁନର ଏଭଳି ଯୌତୁକ ଦାବିକୁ ନବବଧୂ ସହ୍ୟ କରି ନ ପାରି ଏଭଳି ନିଷ୍ପତି ନେଇଥିବା ଦେବକୀ କହିଛନ୍ତି। ବିବାହ ପାଇଁ ପରିବାର ଲୋକେ କେତେ କଷ୍ଟକରି ତାଙ୍କୁ ବାହା ଦେଇଥିଲେ, ହେଲେ ଶ୍ୱଶୁର ଘର ଲୋକେ ନିଜ ପରିବାର ଲୋକଙ୍କୁ ଅପମାନ କରି ସେଠାରୁ ଘଉଡ଼ାଇ ଦେଇଥିବାରୁ ଦେବକୀଙ୍କୁ ଭଲ ଲାଗି ନ ଥିଲା । ଏହି ଘଟଣାକୁ ନେଇ ବାଲିଗୁଡା ଅଞ୍ଚଳରେ ଚର୍ଚ୍ଚାର ବିଷୟ ପାଲଟିଛି।
ଅନ୍ୟପକ୍ଷେ ବରଘର ଲୋକେ ନବବଧୂର ଅଭିଯୋଗକୁ ଖଣ୍ଡନ କରିବା ସହ ଯୌତୁକ ଦାବି କରି ନ ଥିବା କହିଛନ୍ତି । ଏହି ଘଟଣାରେ ବରଲୋକେ କନ୍ୟା ପକ୍ଷ ଲୋକଙ୍କୁ କ୍ଷମା ମାଗିବା ସହ ସମ୍ମାନର ସହ ଗ୍ରହଣ କଲେ
ଶ୍ୱଶୁର ଘରକୁ ଯିବା ପାଇଁ ଚିନ୍ତା କରିବେ ବୋଲି ଦେବକୀ କହିଛନ୍ତି।