ନୂଆପଡ଼ା ଅଫିସ,୨୧।୧୨: ନୂଆପଡା ଜିଲା କୋମନା ବ୍ଲକ ଅନ୍ତର୍ଗତ ପେଣ୍ଡରାବନ୍ଧଠାରେ ୩୫୩ ନମ୍ବର ଜାତୀୟ ରାଜପଥ ଉପରେ ନିର୍ମାଣାଧୀନ ବ୍ରିଜ ବିପଦ ସଙ୍କୁଳ ଅବସ୍ଥାରେ ରହିଛି। ବ୍ରିଜର ଉଭୟ ପାର୍ଶ୍ୱ ଦବିବାରେ ଲାଗିଛି। ଏହି ରାସ୍ତାରେ ଭାରିଯାନ ଚଳାଚଳ ବିପଦପୂର୍ଣ୍ଣ ହୋଇପଡିଛି। ଯାତ୍ରୀଙ୍କ ସୁରକ୍ଷା ଦୃଷ୍ଟିରେ ରଖି ଜିଲା ପ୍ରଶାସନ ରାସ୍ତା ସିଲ କରି ଯୁଦ୍ଧକାଳୀନ ଭିତିରେ ମରାମତି କାର୍ଯ୍ୟ କରୁଛି। ଏହି ରାସ୍ତାରେ ଜରୁରୀକାଳୀନ ସେବା ଗାଡି ଓ ଦୁଇ ଚକିଆ ଗାଡି ଯାଉଛି। ଭାରିଯାନ ଗାଡି ଚଳାଚଳ ବନ୍ଦ ରହିଥିବା ବେଳେ ଅନ୍ୟ ରାସ୍ତା ଦେଇ ଯାତାୟାତ କରୁଛି। ପୋଲିସ ୨୪ ଘଣ୍ଟିଆ ପହଁରା ଦେଇ ୩ ସ୍ଥାନରେ କ୍ୟାମ୍ପ କରି ଗାଡି ଚାଳକଙ୍କୁ ରାସ୍ତା ଦେଖାଉଛି। ନୂଆପଡା-ଖଡିଆଳ ରାସ୍ତା ସିଲ କରିଥିବାରୁ ନୂଆପଡା ପଟୁ ଯାଉଥିବା ଭାରିଯାନକ ଘାଟିପଡାଠାରେ କିମ୍ବା କ୍ରିଷ୍ଣା ଛକରୁ ଭେଲା ଦେଇ ବିଜୁ ଏକ୍ସପ୍ରେସ ଫୋରୱେରେ ବୋଡେନ ବ୍ଲକ ଖଇରା ଦେଇ ଖଡ଼ିଆଳ ଯିବାକୁ ପଡୁଛି। ଖଡିଆଳ ପଟୁ ଆସୁଥିବା ଗାଡି ସେହି ରାସ୍ତା ଦେଇ ଆସିବାକୁ ପଡୁଛି। ୩୫୩ ନମ୍ବର ଜାତୀୟ ରାଜପଥ ଯାତାୟାତ ଠପ୍ ଥିବାରୁ ଅନ୍ୟ ଜିଲାକୁ ଯୋଗାଯୋଗ ବ୍ୟାହତ ହୋଇଛି। ବ୍ରିଜ ନିର୍ମାଣ କାମ ନିମ୍ନମାନର ହୋଇଥିବାରୁ ବର୍ଷେ ନ ପୂରୁଣୁ ବ୍ରିଜ ଦବିଯାଇଛି। ଏହି ରାସ୍ତା ଦେଇ ଓଡିଶାରୁ ଛତିଶଗଡ, ଆନ୍ଦ୍ରପ୍ରଦେଶ ସହ ଅନ୍ୟ ରାଜ୍ୟକୁ ସଂଯୋଗ କରୁଥିବା ବେଳେ ପ୍ରତିଦିନ ହଜାର ହଜାର ଗାଡି ଯାତାୟାତ କରୁଛି। ଏ ସମ୍ପର୍କରେ ଜିଲାପାଳ ହେମକାନ୍ତ ସାଏଙ୍କୁ ପଚାରିବାରୁ ଆମକୁ ଖବର ଆସିବା କ୍ଷଣି ସାଙ୍ଗେ ସାଙ୍ଗେ ଯାଇ ଅନୁଧ୍ୟାନ କରିଥିଲୁ। ସେମିତି ବଡ ବିପଦ ନାହିଁ। ବ୍ରିଜର ତଳରେ ଲୋୟର ଇନ୍ଦ୍ର ଜଳସେଚନ ପ୍ରକଳ୍ପ ତିଖାଳିର ଗଛିତ ପାଣି ରହିଥିବାରୁ ମାଟି ଖାଇ ଦବିବା ଆରମ୍ଭ ହେଉଥିଲା। ୭ ଦିନ ଭିତରେ ମରାମତି କାର୍ଯ୍ୟ ସମ୍ପୂର୍ଣ୍ଣ ହୋଇଯିବ। ଯୁଦ୍ଧକାଳୀନ ଭିତିରେ ମରାମତି କାମ ଚାଲିଥିବାରୁ ଭାରିଯାନ ଉକ୍ତ ରାସ୍ତାରେ ନ ଯାଇ ଅନ୍ୟ ରାସ୍ତା ଦେଇ ଯାଉଛି ବୋଲି କହିଥିଲେ।