ଦଶମନ୍ତପୁର, ୯ା୫: କୋରାପୁଟ ଜିଲା ଦଶମନ୍ତପୁର ବ୍ଲକ ଚ଼ଣାବାଡ଼ ପଞ୍ଚାୟତର ଚଣାବାଡ ଗ୍ରାମରେ ରବିବାର ଏକ ଅଭାବନୀୟ ଘଟଣା ଘଟିଛି। ଭଉଣୀଭାଇ ଦୁହେଁ ଗ୍ରାମ ନିକଟସ୍ଥ ଚେକ୍ ଡ୍ୟାମକୁ ଗାଧୋଇବାକୁ ଯାଇ ପାଣିରେ ବୁଡିଯିବାରୁ ଭାଇର ମୃତ୍ୟୁ ହୋଇଛି। ମୃତ ଶିଶୁ ହେଲେ ଉକ୍ତ ଗ୍ରାମର ଟିବୁ ମୁଦୁଲିଙ୍କ ତିନି ବର୍ଷର ପୁଅ ଘନ ମୁଦୁଲି।
ଖବରରୁ ଜଣାପଡିଛି, ଏହି ଗ୍ରାମରେ ସ୍ତ୍ରୀ ଦୁଃଖୀ, ଝିଅ ଜ୍ୟୋତି ଓ ପୁଅ ଘନଙ୍କୁ ନେଇ ଟିବୁଙ୍କ ପରିବାର। ରବିବାର ପୂର୍ବାହ୍ନରେ ଭଉଣୀଭାଇ ଦୁହେଁ ଗ୍ରାମର ସାଙ୍ଗସାଥୀଙ୍କ ସହ ମିଶି ଗ୍ରାମ ନିକଟସ୍ଥ କନ୍ଧସାହି ଝୋଲାଠାରେ ନବନିର୍ମିତ ଚେକ୍ ଡ୍ୟାମକୁ ଗାଧୋଇବାକୁ ଯାଇଥିଲେ। ସମସ୍ତେ ଗାଧୋଉଥିବା ବେଳେ ଶିଶୁଟିି ପାଣିରେ ବୁଡିଯାଇଥିଲା। ବଡ଼ଭଉଣୀ ଜ୍ୟୋତି ଘରକୁ ଦୌଡିଯାଇ ଏ ବିଷୟରେ ମାଆଙ୍କୁ ଜଣାଇଥିଲେ। ମା’ ଚେକ୍ଡ୍ୟାମରେ ପହଞ୍ଚତ୍ ଖୋଜାଖୋଜି କରି ଶିଶୁକୁ ଉଦ୍ଧାର କରିଥିଲେ। ସେତେବେଳକୁ ଶିଶୁଟିର ମୃତ୍ୟୁ ହୋଇସାରିଥିଲା। ଘଟଣା ନେଇ ସ୍ଥାନୀୟ ସରପଞ୍ଚଙ୍କୁ ଜଣାଇବା ସହ ଟିବୁ ଏନେଇ ଦଶମନ୍ତପୁର ଥାନାରେ ଅଭିଯୋଗ କରିଥିଲେ। ପୋଲିସ ମୃତଦେହ ଜବତ କରି ବ୍ୟବଚ୍ଛେଦ ପାଇଁ ପଠାଇଛି। ପୋଲିସ ଏକ ଅପମୃତ୍ୟୁ ମାମଲା ରୁଜୁ କରି ତଦନ୍ତ ଚଳାଇଛି।