ନିରାକାରପୁର,୫ା୪(ଡି.ଏନ୍.ଏ.): ଖୋର୍ଦ୍ଧା ଜିଲା ନିରାକାରପୁର ଥାନା ଅନ୍ତର୍ଗତ ତାଳପଡ଼ାଠାରେ ଏକ ମାଲ୍ବାହୀ ଅଟୋ ରାସ୍ତା ଉପରୁ ବିଲ ମଧ୍ୟକୁ ଖସିଯିବାରୁ ନିରାକାରପୁର ପଞ୍ଚାୟତ ନରେନ୍ଦ୍ରପୁର ଗ୍ରାମର ରବୀନ୍ଦ୍ର ବେହେରା ଓରଫ ବୁଲୁ(୪୫)ଗୁରୁତର ହୋଇଥିଲେ। ଖବର ପାଇ ପରିବାର ଲୋକ ଓ କିଛି ଗ୍ରାମବାସୀ ଖୋର୍ଦ୍ଧା ମେଡିକାଲକୁ ନେଇଥିଲେ ମଧ୍ୟ ଡାକ୍ତର ସେଠାରେ ମୃତ ଘୋଷଣା କରିଥିଲେ। ତେବେ ଘଟଣାସ୍ଥଳରୁ ଚାଳକ ଫେରାର ହୋଇଯାଇଥିବା ବେଳେ ଦୁର୍ଘଟଣା ଘଟାଇଥିବା ଗାଡ଼ିଟିକୁ ଦୁର୍ଘଟଣା ସ୍ଥାନରୁ ମାଲିକ ନେଇ ଯାଇଥିଲେ। ବୁଧବାର ମୃତଦେହ ବ୍ୟବଚ୍ଛେଦ ହୋଇ ଆସିବା ପରେ ଅଟୋ ମାଲିକ ଏବଂ ମୃତକ ପରିବାର ମଧ୍ୟରେ କୌଣସି ଆପୋସ ସମାଧାନ ହୋଇ ନ ପାରିବାରୁ ମୃତକଙ୍କ ସାନଭାଇ ରାଜେନ୍ଦ୍ର ବେହେରା ମୋ’ ଭାଇକୁ ଅଟୋ ମଡ଼ାଇ ମାରିଦେଇଛନ୍ତି ବୋଲି ସ୍ଥାନୀୟ ଥାନାରେ ଏକ ଲିଖିତ ଅଭିଯୋଗ କରିଛନ୍ତି। ପୋଲିସ କେସ୍ ନଂ ୮୫/୨୩ରେ ଏକ ମାମଲା ରୁଜୁ କରି ଏହି ମାମଲା ଉପରେ ଅନୁସନ୍ଧାନ ଚଳାଇଥିବା ସ୍ଥାନୀୟ ଥାନାଧିକାରିଣୀ ଗୀତାଞ୍ଜଳି ନାୟକ ସୂଚନା ଦେଇଛନ୍ତି। ମୃତଦେହ ବ୍ୟବଚ୍ଛେଦ ହୋଇଆସିବା ପରେ ଗ୍ରାମ ଶ୍ମଶାନରେ ଦାହ କରାଯାଇଛି।