ଭଦ୍ରକ ଅଫିସ,୧୫।୪: ମାସ୍କ ଚେକିଂ ବେଳେ ଗୁରୁବାର ଭଦ୍ରକ ଗ୍ରାମାଞ୍ଚଳ ଥାନା ପୋଲିସ ହାତରେ ଧରାପଡ଼ିଛନ୍ତି ୩ ବ୍ରାଉନସୁଗାର ବେପାରୀ। ପୋଲିସ ଗିରଫ ବେପାରିଙ୍କଠାରୁ ୧୦ ଗ୍ରାମରୁ ଅଧିକ ବ୍ରାଉନସୁଗାର ଜବତ କରିଛି। ଏହାର ଆନୁମାନିକ ମୂଲ୍ୟ ୧୦ ଲକ୍ଷରୁ ଊର୍ଦ୍ଧ୍ୱ ଟଙ୍କା ହେବ ବୋଲି ଅନୁଷ୍ଠିତ ଖବରଦାତା ସମ୍ମିଳନୀରେ ଅତିରିକ୍ତ ଏସ୍ପି ଯତୀନ କୁମାର ପଣ୍ଡା ଗୁରୁବାର ଏହି ସୂଚନା ଦେଇଛନ୍ତି। ଗିରଫ ବେପାରୀମାନେ ହେଲେ ପୁରୀ ଜିଲାର ସିତେଶ କୁମାର ପାତ୍ର, ଗ୍ରାମାଞ୍ଚଳ ଥାନା ଅଧୀନ ବଉଳପୋଖରୀର ରବୀନ ଦାଶ ଓ ଉମାକାନ୍ତ ମଲ୍ଲିକ। ଏ ନେଇ ଥାନାରେ ଏକ ମାମଲା (ନଂ.୧୮୧/୨୧) ରୁଜୁ ହୋଇଛି।
ପୋଲିସ ସୂଚନା ଅନୁଯାୟୀ, ବ୍ୟବସାୟୀମାନେ ବାଲେଶ୍ୱର ଜିଲା ଜଳେଶ୍ୱରରୁ ଏକ କାର୍ରେ ଭଦ୍ରକକୁ ବ୍ରାଉନସୁଗାର ଆଣୁଥିଲେ। ୧୬ ନଂ. ଜାତୀୟ ରାଜପଥର ରାଣୀତାଲ ନିକଟରେ ପୋଲିସର ମାସ୍କ ଚେକିଂ ଚାଲିଥିଲା। ପୋଲିସକୁ ଦେଖି କାର୍ ଚାଳକ ଦ୍ରୁତ ଗତିରେ ଗାଡ଼ି ଚଳାଇଥିଲେ। ହେଲେ ରାଣୀତାଲ ଲେଭଲ କ୍ରସିଂ ନିକଟରେ ରେଳ ଫାଟକ ପଡ଼ିଥିବାରୁ ଗାଡ଼ିଟି ଆଉ ଆଗକୁ ଯାଇପାରି ନ ଥିଲା। ପୋଲିସ ଚଢାଉ କରି ଗାଡ଼ି ଯାଞ୍ଚ କରିଥିଲା। ସେତିକିବେଳେ ମୁଖ୍ୟ ବେପାରୀ କିଛି ବ୍ରାଉନସୁଗାର ଧରି ଦୌଡି ଫେରାର ହୋଇଯାଇଥିଲେ। ପୋଲିସ ୩ ଜଣଙ୍କୁ କାବୁ କରିଥିଲା। ପୋଲିସ କାର ଭିତରୁ ୧୦ ଗ୍ରାମରୁ ଅଧିକ ବ୍ରାଉନସୁଗାର, ଖଣ୍ଡା, ଲାଠି, ୨ଟି ଛୁରୀ ସହ ଗୋଟିଏ ଖେଳନା ବନ୍ଧୁକ ଜବତ କରିଛି। ପୋଲିସ ଫେରାର ମୁଖ୍ୟ ବେପାରୀଙ୍କ ଫଟୋ ଜାରି କରି ଧରିବାକୁ ତନାଘନା ଚଳାଇଛି।