ଭୁବନେଶ୍ୱର,୧୭।୮(ସତ୍ୟଜିତ୍ ରାଉତ)ଭରତପୁର ଥାନା ଅନ୍ତର୍ଗତ ଖଣ୍ଡଗିରି ବାରି ବସ୍ତିରେ ମଙ୍ଗଳବାର ସ୍ବାଧୀନତା ଦିବସରେ ଏକ ହତ୍ୟାକାଣ୍ଡ ଘଟିଛି। ଶଯ୍ୟାଶାୟୀ ଥିବା ଜଣେ ବୃଦ୍ଧାଙ୍କୁ ଗଳାକାଟି ଅତି ନିର୍ମମ ଭାବେ କେହି ହତ୍ୟା କରିଛନ୍ତି। ମୃତା ବୃଦ୍ଧା ହେଲେ ଏଠାରେ ରହୁଥିବା ଗଞ୍ଜାମ ଜିଲା ବେଲଗୁଣ୍ଠା ଥାନା ଅନ୍ତର୍ଗତ ଇନ୍ଦ୍ରଗଡ଼ର ମଦା ପଲେଇ (୬୦)। ଏପରିକି ଉକ୍ତ ଘର ଭିତରୁ ତାଙ୍କ ବୋହୂ ବୈଶାଖୀ ଅଚେତ ଅବସ୍ଥାରେ ଉଦ୍ଧାର ହୋଇଛନ୍ତି। ବୁଧବାର ବ୍ୟବଚ୍ଛେଦ ପରେ ମୃତଦେହକୁ ପରିବାର ଲୋକଙ୍କୁ ହସ୍ତାନ୍ତର କରାଯାଇଛି। ମୃତ ବୃଦ୍ଧାଙ୍କ ଭଉଣୀ ସୁନିତା ତରାଇଙ୍କ ଏତଲା ଆଧାରରେ ପୋଲିସ ଏକ ହତ୍ୟା ମାମଲା (ନଂ.୩୫୪/୨୦୨୩) ରୁଜୁ କରି ତଦନ୍ତ ଆରମ୍ଭ କରିଛି। ଅନ୍ୟପକ୍ଷରେ ଆହତ ବୋହୂ ବୈଶାଖୀ ହସ୍ପିଟାଲରେ ଚିକିତ୍ସିତ ହେଉଥିବାବେଳେ ତାଙ୍କ ବୟାନ ଘଟଣାକୁ ଅଧିକ ରହସ୍ୟମୟ କରିଦେଉଛି। କେତେଜଣ ଦୁର୍ବୃତ୍ତ ଓନି ଦ୍ୱାରା ତାଙ୍କ ତଣ୍ଟିକୁ ଚିପି ଦେବାରୁ ସେ ଅଚେତ ହୋଇପଡିଥିଲେ। ହେଲେ ସେମାନଙ୍କ ମଧ୍ୟରୁ କାହାକୁ ଚିହ୍ନି ନ ଥିବା ସେ ପୋଲିସକୁ କହିଛନ୍ତି। ତେବେ ସେହି ହତ୍ୟାକାରୀ ଦୁର୍ବୃତ୍ତମାନେ କିଏ ତାହାକୁ ନେଇ ପୋଲିସ ଖୋଳତାଡ଼ ଚଳାଇଥିବାବେଳେ କେହି ଚିହ୍ନାପରିଚିତ ଏଥିରେ ସମ୍ପୃକ୍ତ ଥିବା ସନ୍ଦେହ କରି ସେହି ଦିଗକୁ ତଦନ୍ତ ପରିସରଭୁକ୍ତ କରିଛି।
ଅନୁଯାୟୀ, ମୃତା ବୃଦ୍ଧା ମଦା ଗାଁରେ ଏକ ତେଜରାତି ଦୋକାନ କରିଛନ୍ତି। ପୂର୍ବରୁ ତାଙ୍କ ସ୍ବାମୀଙ୍କର ମୃତ୍ୟୁ ଘଟିଥିବାବେଳେ ସାନ ପୁଅ ମଣ୍ଟୁ ଖଣ୍ଡଗିରି ବାରିରେ ରହି କାମଧନ୍ଦା କରନ୍ତି। ସେହିଭଳି ବଡ଼ ପୁଅ ରବୀନ୍ଦ୍ର ଡ୍ରାଇଭର ଭାବେ କାମ କରିବା ସହ ଅଧିକାଂଶ ସମୟ ଗାଁକୁ ଯିବାଆସିବା କରିଥାନ୍ତି। ଗାଁରେ ମଦାଙ୍କ ସହ ବଡ଼ ବୋହୂ ବୈଶାଖୀ ରହୁଥିଲେ। ଗତ ଜୁଲାଇ ୧ ରାତିରେ ତାଙ୍କ ଘରେ ପଶିଥିବା ଦୁର୍ବୃତ୍ତଙ୍କ ଆକ୍ରମଣରେ ମଦା ଗୁରୁତର ହୋଇଥିଲେ। ମଦାଙ୍କୁ ପ୍ରଥମେ ବ୍ରହ୍ମପୁର ଏମ୍କେସିଜି ହସ୍ପିଟାଲରେ ଭର୍ତ୍ତି କରାଯାଇଥିଲା। ପରେ ଭୁବନେଶ୍ୱର ଏମ୍ସକୁ ସ୍ଥାନାନ୍ତର କରାଯାଇଥିଲା। ଏହାପରେ ଆଉ ଦୁଇଟି ଘରୋଇ ହସ୍ପିଟାଲରେ ଚିକିତ୍ସିତ ହୋଇ ଗତ ୮ତାରିଖରେ ଖଣ୍ଡଗିରି ବାରି ବସ୍ତିସ୍ଥିତ ପୁଅ ଘରେ ରହିଥିଲେ। ସେ ଶଯ୍ୟାଶାୟୀ ଅବସ୍ଥାରେ ରହୁଥିବାବେଳେ ବୋହୂ ବୈଶାଖୀ ତାଙ୍କ ପାଖରେ ରହି ଦେଖାଶୁଣା କରୁଥିଲେ। ମଙ୍ଗଳବାର ସା ପ୍ରାୟ ୭ଟାରେ ସାନପୁଅ ମଣ୍ଟୁ ମେଡିସିନ୍ ପାଇଁ ବାହାରକୁ ଯାଇଥିଲେ। ଘରେ କେବଳ ବୈଶାଖୀ ଓ ଅସୁସ୍ଥ ଶାଶୁ ମଦା ଥିଲେ। କିଛି ସମୟ ପରେ ମଣ୍ଟୁ ଘରକୁ ଫେରି ବୋଉଙ୍କ ତଣ୍ଟି କଟାଯାଇଥିବା ଓ ଭାଉଜ ବୈଶାଖୀ ଅଚେତ ଅବସ୍ଥାରେ ତଳେ ପଡ଼ିଥିବା ଦେଖି ପଡ଼ୋଶୀଙ୍କୁ ଜଣାଇବା ସହ ପୋଲିସକୁ ଖବର ଦେଇଥିଲେ। ଡିସିପି ପ୍ରତୀକ ସିଂଙ୍କ ସମେତ ଅନ୍ୟ ପୋଲିସ ଅଧିକାରୀ ସାଇଣ୍ଟିଫିକ୍ ଟିମ୍ ସହ ଘଟଣାସ୍ଥଳରେ ପହଞ୍ଚତ୍ ତଦନ୍ତ ଆରମ୍ଭ କରିଥିଲେ।