ଓଡ଼ଗାଁ,୨୫ା୫(ସ୍ବ.ପ୍ର.) : ନୟାଗଡ଼ ଜିଲା ଓଡ଼ଗାଁ ବ୍ଲକ ଓ ତହସିଲ ଅଧୀନ ଆରେଡା ଠାରେ ଥିବା ବୁଢାବୁଢିଆଣି ପାଣି ପଞ୍ଚାୟତ କାର୍ଯ୍ୟାଳୟ ଏବେ ଭୁତକୋଠିରେ ପରିଣତ ହୋଇଛି। ୧୯୯୮ରେ ପ୍ରାୟ ୩୦ ଲକ୍ଷ ଟଙ୍କା ବ୍ୟୟରେ ନିର୍ମାଣ କରାଯାଇଥିବା ଦୁଇ ମହଲା ବିଶିଷ୍ଟ ଏହି କାର୍ଯ୍ୟାଳୟ ପାଣି ପଞ୍ଚାୟତ ନିମନ୍ତେ ଆପେକ୍ସ କମିଟିକୁ ୨୦୦୬ରେ ହସ୍ତାନ୍ତର କରାଯାଇଥିଲା। ହେଲେ ସେଦିନଠାରୁ ଉକ୍ତ କାର୍ଯ୍ୟାଳୟ କେବେ ଖୋଲି ଥିବା କେହି ଦେଖିନାହାନ୍ତି। କେବଳ କାଗଜପତ୍ରରେ ପାଣି ପଞ୍ଚାୟତ କମିଟି ନିର୍ବାଚନ ହେଉଥିବା ବେଳେ ଉକ୍ତ କାର୍ଯ୍ୟାଳୟ କାହା କାମରେ ଆସୁନାହିଁ। ଏଥିସହିତ ଚାଷୀଙ୍କ ନିମନ୍ତେ ଆସିଥିବା ଟ୍ରାକ୍ଟର ଅବ୍ୟବହୃତ ହୋଇ ପଡିଥିଲା। ଟ୍ୟାକ୍ସ ଖିଲାପି ହେବାରୁ ପରିବହନ ବିଭାଗ ଟ୍ରାକ୍ଟରକୁ ଜବତ କରି ନେଇଛି। ଏପରିକି ୨ ବର୍ଷ ପୂର୍ବେ କମିଟି ମରାମତି କରିଥିବା ଟଙ୍କା ଏ ଯାବତ୍ ଆଡଜେଷ୍ଟ ହୋଇ ପାରିନାହିଁ ବୋଲି ଅଧ୍ୟକ୍ଷ ସୁଧାକର ଷଡଙ୍ଗୀ କହିଛନ୍ତି। ଅନ୍ୟପକ୍ଷେ ଲକ୍ଷାଧିକ ଟଙ୍କା ବ୍ୟୟରେ କାର୍ଯ୍ୟାଳୟ ମରାମତି କରିବା ସହିତ ରଙ୍ଗ କରିଥିବା ପାଣି ପଞ୍ଚାୟତ ଅଧ୍ୟକ୍ଷ କହୁଥିଲେ ମଧ୍ୟ ଉକ୍ତ କାର୍ଯ୍ୟାଳୟକୁ ସେ ଦିନକ ପାଇଁ ବ୍ୟବହାର କରିନାହାନ୍ତି। ଏପରି କି କାର୍ଯ୍ୟାଳୟ ଚତୁଃପାର୍ଶ୍ୱରେ ଅନାବନା ଲଟାବୁଦା ମାଡ଼ି ଗଲାଣି। ଏଥିପାଇଁ ସେଠାରେ ଅସାମାଜିକ ଯୁବକମାନେ ଆଡ୍ଡା ଜମାଉଥିବା ସ୍ଥାନୀୟ ଲୋକେ କହୁଛନ୍ତି। ଏ ସଂକ୍ରାନ୍ତରେ ବିଭାଗୀୟ ସହକାରୀ ଯନ୍ତ୍ରୀ ଦାମୋଦର ପ୍ରଧାନ କହିଛନ୍ତି, ପାଣିପଞ୍ଚାୟତ କାର୍ଯ୍ୟାଳୟ ସମ୍ପୂର୍ଣ୍ଣ ଆପେକ୍ସ କମିଟି ନିୟନ୍ତ୍ରଣାଧୀନ ହୋଇଥିବା ବେଳେ ଏନେଇ କୌଣସି ଅନୁଦାନ ଆସୁ ନାହିଁ। ବରଂ ପାଣି ପଞ୍ଚାୟତ ନିଜସ୍ବ ଉଦ୍ୟମରେ ଏନେଇ ଫଣ୍ଡ ଯୋଗାଡ କରିବା ନେଇ ସେ ପରାମର୍ଶ ଦେଇଛନ୍ତି। ଏନେଇ ବ୍ଲକ କଂଗ୍ରେସ କମିଟି ସଭାପତି ପୂର୍ଣ୍ଣଚନ୍ଦ୍ର ନାୟକ କହିଛନ୍ତି, ତୁରନ୍ତ ଏହି କାର୍ଯ୍ୟାଳୟକୁ କାର୍ଯ୍ୟକ୍ଷମ କରାଯାଉ। ଯଦି ଏଥିରେ ବିଳମ୍ବ ହୁଏ ଆମେ ଆନ୍ଦୋଳନ କରିବାକୁ ପଛାଇବୁ ନାହିଁ ବୋଲି ସେ ଚେତନାବନୀ ଦେଇଛନ୍ତି।