କଟକ ଅଫିସ, ୧୭ା୭: ରାଜ୍ୟ ସରକାରଙ୍କ ନିଷ୍ପତ୍ତି ଅନୁଯାୟୀ ଶୁକ୍ରବାର ବସ୍ଷ୍ଟାଣ୍ଡରୁ ବସ୍ ଚଳାଚଳ ସ୍ୱାଭାବିକ ହୋଇଥାନ୍ତା। ତେବେ କଟକ ବାଦାମବାଡି ଅଞ୍ଚଳରୁ ସକାଳୁ ଗୋଟିଏ ବି ବସ୍ ଗଡିନାହିଁ। ବସ୍ ଚଳାଚଳ ନେଇ ବିଭିନ୍ନ ସମସ୍ୟା ରହିଥିବାରୁ ଏ ପ୍ରକାର ପରିସ୍ଥିତି ଉପୁଜିଥିବା ଜଣାପଡିଛି। ଦୀର୍ଘଦିନ ଧରି ବସ୍ ବନ୍ଦ ରହିଥିବାରୁ କର୍ମଚାରୀମାନେ ଗାଁକୁ ଚାଲି ଯାଇଛନ୍ତି। ଯେଉଁ କେତେକ କର୍ମଚାରୀ ଅଛନ୍ତି ସେମାନଙ୍କୁ ନେଇ ଗାଡି ଚଳାଇବା ସମ୍ଭବ ନୁହେଁ। ଏଭଳି ଅନେକ ସମସ୍ୟା ରହିଥିବାରୁ ବସ୍ ଚଳାଚଳ କରିପାରିନାହିଁ। ଏହାକୁ ନେଇ ଅଲ୍ ଓଡ଼ିଶା ବସ୍ ମାଲିକ ସଂଘ ସାଧାରଣ ସମ୍ପାଦକ ଦେବେନ୍ଦ୍ର କୁମାର ସାହୁ କହିଛନ୍ତି, ସରକାରଙ୍କ ନିଷ୍ପତ୍ତି ସ୍ବାଗତଯୋଗ୍ୟ। ମାତ୍ର କିଛି ସମସ୍ୟା ରହିଛି। ବସ୍ଗୁଡିକ ଦୁଇ ମାସରୁ ଊର୍ଦ୍ଧ୍ୱ ସମୟ ଧରି ଚାଲି ନ ଥିବାରୁ ଏବେ ଯନ୍ତ୍ରାଂଶ ନଷ୍ଟ ହେବା ସହ ଯାନ୍ତ୍ରିକ ତ୍ରୁଟି ଦେଖାଦେଇଛି। ସେଥିପାଇଁ ଆମେ ସରକାରଙ୍କୁ ବିନା ସୁଧରେ ଏକ ଲକ୍ଷ ଟଙ୍କା ସହାୟତା ଦେବାକୁ ଜଣାଇଥିଲୁ। ସରକାର ଏ ଦିଗରେ କୌଣସି ନିଷ୍ପତ୍ତି ନେଇ ନ ଥିବାବେଳେ ମାଲିକଙ୍କ ଆର୍ଥିକ ସ୍ଥିତି ଭଲ ନ ଥିବାରୁ ସେମାନେ ବସ୍ଗୁଡିକର ମରାମତି ଦିଗରେ ଅସମର୍ଥ ପ୍ରକାଶ କରିଛନ୍ତି। ଜୁଲାଇ ପାଇଁ ସରକାର ଗାଡିଗୁଡିକର ରୋଡ୍ଟ୍ୟାକ୍ସ ଛାଡ କରିଥିବାବେଳେ ସେପ୍ଟେମ୍ବର ପର୍ଯ୍ୟନ୍ତ ଟ୍ୟାକ୍ସ ଛାଡ ପାଇଁ ସରକାରଙ୍କୁ ନିବେଦନ କରିଛୁ। ସେହିପରି ପ୍ରାୟ ବସ୍ଗୁଡିକର ଇନ୍ସ୍ୟୁରାନ୍ସ ସରିଯାଇଛି। ଏଣୁ ଗାଡିଗୁଡିକ ରାସ୍ତାକୁ ବାହାରିବା ସମ୍ଭବ ନୁହଁ। ତେଣୁ ଏହି ସମସ୍ୟା ସମ୍ପର୍କରେ ମନ୍ତ୍ରୀଙ୍କ ସହ ଶନିବାର ଆମେ ଆଲୋଚନା କରିବାକୁ ନିଷ୍ପତ୍ତି ନେଇଛୁ।
