ଠାକୁରମୁଣ୍ଡା, ୨।୧ (ଡି.ଏନ.ଏ.): ମୟୂରଭଞ୍ଜ ଜିଲା ଠାକୁରମୁଣ୍ଡା-ଆନନ୍ଦପୁର ୫୩ ନମ୍ବର ରାଜ୍ୟ ରାଜପଥ ଗୋଡ଼ଭଙ୍ଗା ଘାଟି ବାଙ୍କ ରାସ୍ତାରେ ସୋମବାର ସକାଳେ ଏକ ବସ୍-କାର୍ ମଧ୍ୟରେ ଧକ୍କା ହୋଇଛି। ଦୁର୍ଘଟଣା ପରେ ବସ୍ଟି ଘଟଣାସ୍ଥଳରୁ ଖସି ପଳାଇଥିବା ବେଳେ କାର୍ଟି ଭାଙ୍ଗିରୁଜି ଯାଇଛି। କାର୍ ଚାଳକ ଏକୁଟିଆ ଯାଉଥିବା ବେଳେ ସେ ଅଳ୍ପକେ ବର୍ତ୍ତି ଯାଇଛନ୍ତି।
ସୂଚନା ଅନୁଯାୟୀ, ବାରିପଦା ଆଦର୍ଶ ବିଦ୍ୟାଳୟର ଶିକ୍ଷକ କେନ୍ଦୁଝର ଜିଲା ରାମଚନ୍ଦ୍ରପୁର ଅଞ୍ଚଳର ନିରଞ୍ଜନ ଓଝା(୪୪) ସକାଳ ପ୍ରାୟ ୮ଟା ବେଳେ କାର୍ରେ ବାରିପଦା ଅଭିମୁଖେ ଆସୁଥିଲେ। ଏହି ସମୟରେ ତୀର୍ଥଯାତ୍ରୀଙ୍କୁ ଛାଡ଼ି ଠାକୁରମୁଣ୍ଡା ପଟୁ ଯାଉଥିବା ବସ୍ କାର୍କୁ ଧକ୍କା ଦେଇଥିଲା। ଏଥିରେ ନିରଞ୍ଜନ ସାମାନ୍ୟ ଆହତ ହୋଇଛନ୍ତି। ଖବରପାଇ ମହୁଲଡିହା ଥାନା ଏଏସ୍ଆଇ ସରୋଜ କୁମାର ମିଶ୍ର ଦୁର୍ଘଟଣାସ୍ଥଳରେ ପହଞ୍ଚି କ୍ଷତିଗ୍ରସ୍ତ କାର୍କୁ ରାସ୍ତାରୁ ହଟାଇ ଘଟଣାର ତଦନ୍ତ କରୁଛନ୍ତି।
