ବଲାଙ୍ଗୀର ଅଫିସ, ୨ା୩: ରାଜ୍ୟ ସରକାର ଓ ସ୍ଥାନୀୟ ପ୍ରଶାସନର ଅଦୂରଦର୍ଶିତା ତଥା ବିଚିତ୍ର ନିଷ୍ପତ୍ତି ବଲାଙ୍ଗୀର ସହରର ଚଳଚଞ୍ଚଳ ସରକାରୀ ବସଷ୍ଟାଣ୍ଡକୁ ଏବେ ଜନଶୂନ୍ୟ କରିଦେଇଛି। ଦୂରଦୃଷ୍ଟିର ଅଭାବ ଯୋଗୁ ଯାତ୍ରୀମାନେ କିଭଳି ହନ୍ତସନ୍ତ ହୁଅନ୍ତି ସ୍ଥାନୀୟ ସରକାରୀ ବସଷ୍ଟାଣ୍ଡ ଏହାର ଜ୍ୱଳନ୍ତ ଉଦାହରଣ ପାଲଟିଛି। ଏଠାରେ ବସଷ୍ଟାଣ୍ଡ ତ ରହିଛି, ମାତ୍ର କୌଣସି ବସ ଆସୁ ନ ଥିତ୍ବାରୁ ପ୍ରତିଦିନ ଲୋକେ ଏଠାକୁ ଆସି ହଇରାଣ ହରକତ ହେଉଛନ୍ତି। ଏନେଇ ସ୍ଥାନୀୟ ଜିଲା ପ୍ରଶାସନ ଏବଂ ରାଜ୍ୟ ସଡକ ପରିବହନ ନିଗମ କେବଳ ନୀରବଦ୍ରଷ୍ଟା ସାଜି ଚୁପ୍ ବସିଛି। ଗତ ୨୦୨୨ ଜୁଲାଇ ୧ ତାରିଖ ଦିନ ବଲାଙ୍ଗୀର ଆରଟିଓ ଅଫିସ ନିକଟରେ ତିଆରି ହୋଇଥିବା ନୂତନ ବସ ଟର୍ମିନାଲ କାର୍ଯ୍ୟକାରୀ କରାଯାଇଥିଲା। ଏଠାରୁ ଉଭୟ ସରକାରୀ ଓ ଘରୋଇ ବସ ଚଳାଚଳ ଆରମ୍ଭ ହୋଇଥିଲା। ଜିଲାପାଳ ଚଞ୍ଚଳ ରାଣା ସବୁଜ ପତାକା ଦେଖାଇ ଏହାର ଶୁଭାରମ୍ଭ କରିଥିଲେ। ଏହି ବସ ଟର୍ମିନାଲ କାର୍ଯ୍ୟକ୍ଷମ ହେବା ପୂର୍ବରୁ ସହରର ମଧ୍ୟସ୍ଥଳରେ ଏକ ସରକାରୀ ବସଷ୍ଟାଣ୍ଡ ଏବଂ ଘରୋଇ ଭଡା ଜାଗାରେ ଏକ ଘରୋଇ ବସଷ୍ଟାଣ୍ଡ କାର୍ଯ୍ୟକାରୀ ହେଉଥିଲା। ବିଶେଷକରି ଘରୋଇ ବସଷ୍ଟାଣ୍ଡରେ ଭିଡ ଏବଂ ଟ୍ରାଫିକ ପରିଚାଳନା ସୁଚାରୁ ରୂପେ ସମ୍ପାଦନ ହେଉ ନ ଥିବାରୁ ଯାତ୍ରୀ ଏବଂ ସହରବାସୀ ଅନେକ ସମୟରେ ଅସୁବିଧାର ସମ୍ମୁଖୀନ ହେଉଥିଲେ। ଫଳରେ ବସଷ୍ଟାଣ୍ଡ ସ୍ଥାନାନ୍ତରଣ ଦାବି ହୋଇ ଆସୁଥିଲା।
ନୂଆ ବସ ଟର୍ମିନାଲ କାର୍ଯ୍ୟକାରୀ ହେଲା ପରେ ସହର ଭିତରେ ଥିବା ପୁରୁଣା ସରକାରୀ ବସଷ୍ଟାଣ୍ଡକୁ ଆଗଭଳି ଉଭୟ ସରକାରୀ ଏବଂ ଘରୋଇ ବସ ଯିବ ଏବଂ ସେଠାରୁ ମଧ୍ୟ ଯାତ୍ରୀମାନେ ବସରେ ଯିବା ଆସିବା ସୁବିଧା ପାଇପାରିବେ ବୋଲି କୁହାଯାଇଥିଲା। ମାତ୍ର ବସ ଟର୍ମିନାଲ କାର୍ଯ୍ୟକାରୀ ହେବାର କିଛି ଦିନ ମଧ୍ୟରେ ସରକାରୀ ବସଷ୍ଟାଣ୍ଡକୁ ଆଉ ସରକାରୀ କିମ୍ବା ଘରୋଇ ବସ ଯିବା ଆସିବା ବନ୍ଦ କରିଦେଲେ। ଫଳରେ ଯାତ୍ରୀମାନେ ସରକାରୀ ବସଷ୍ଟାଣ୍ଡକୁ ଆସିଲେ ବି ରାସ୍ତାର ଉଭୟ କଡରେ ଠିଆ ହୋଇ ବସକୁ ଅପେକ୍ଷା କରୁଛନ୍ତି। ପିଲାଛୁଆ, ପରିବାର ସଦସ୍ୟ ଏବଂ ବୟସ୍କ ଯାତ୍ରୀମାନେ ଏହାଦ୍ୱାରା ଘୋର ଅସୁବିଧାର ସମ୍ମୁଖୀନ ହେଉଛନ୍ତି। ଟ୍ରାଫିକ୍ ନିୟନ୍ତ୍ରଣ ନଁାରେ ପାଟଣା ହୋଟେଲ ଛକରୁ କଚେରି ଛକ ପର୍ଯ୍ୟନ୍ତ ରାସ୍ତାକୁ ପ୍ରଶାସନ ୱାନ୍ ୱେ ଘୋଷଣା କରି ଡିଭାଇଡର ନିର୍ମାଣ କରିଥିଲେ। ତେବେ ସରକାରୀ ବସଷ୍ଟାଣ୍ଡକୁ ବସ ଯିବା ଆସିବା ପାଇଁ ରାସ୍ତା ଛଡା ଯାଇଥିଲା। ମାତ୍ର ରାତ୍ରୀକାଳୀନ ଭାରୀଯାନ ଗୁଡିକ ଓଣଓସାରିଆ ୱାନ୍ ୱେରେ ଭାରସାମ୍ୟ ହରାଇ ଡିଭାଇଡରରେ ପିଟି ହେବା କାରଣରୁ ସରକାରୀ ବସଷ୍ଟାଣ୍ଡ ଭିତର ପ୍ରବେଶ ପଥକୁ ଗୋଟିଏ ପଟ ରାସ୍ତାରୁ ବନ୍ଦ କରି ଦିଆଗଲା ା ଫଳରେ ସୋନପୁର, ବୌଦ୍ଧ, କଟକ, ଭୁବନେଶ୍ୱର ଏବଂ ସମ୍ବଲପୁର, ବରଗଡ, ଝାରସୁଗୁଡା, ସୁନ୍ଦରଗଡ ପଟରୁ ଆସୁଥିବା ବସ ଆଉ ସରକାରୀ ବସଷ୍ଟାଣ୍ଡକୁ ପଶି ପାରିଲେ ନାହିଁ। ଏଭଳି ଭାବେ ବସ ଟର୍ମିନାଲ ଆରମ୍ଭ ହେବାର ମାତ୍ର ୩-୪ ମାସ ଭିତରେ ସରକାରୀ ବସଷ୍ଟାଣ୍ଡ ଅଲୋଡା ଏବଂ ଜନଶୂନ୍ୟ ହୋଇପଡିଛି। ସରକାରୀ ବସଷ୍ଟାଣ୍ଡ ଭିତରେ ଏକ ଟିକଟ କାଉଣ୍ଟର ରହିଛି। ଲୋକେ ଏଠାକୁ ଟିକେଟ କାଟିବାକୁ ଆସୁଛନ୍ତି ା ମାତ୍ର ୨-୩ଟି ଲମ୍ବାରୁଟ୍ ବସକୁ ଛାଡିଦେଲେ ଅନ୍ୟ କୌଣସି ବସ ଆସୁ ନ ଥିବାରୁ ଲୋକେ ଘୋର ହଇରାଣ ହରକତ ହେଉଛନ୍ତି। ପ୍ରତିଦିନ ଦୂରଦୂରାନ୍ତର ଯାତ୍ରୀମାନେ ଏଠାକୁ ଆସି ଢ଼େର ସମୟ ଅତିବାହିତ କରିବା ପରେ ସ୍ଥାନୀୟ ଲୋକଙ୍କୁ ପଚାରି ଏହି ବସଷ୍ଟାଣ୍ଡକୁ ବସ ଆସୁ ନ ଥିବା ଜାଣି ପୁଣି ନୂଆ ବସ ଟର୍ମିନାଲକୁ ଯାଉଛନ୍ତି। ଯାତ୍ରୀମାନେ ପ୍ରତିଦିନ ଘୋର ହଇରାଣ ହରକତ ହେଉଥିଲେ ମଧ୍ୟ ଓଏସ୍ଆରଟିସି ପକ୍ଷରୁ କୌଣସି ସୂଚନା ଦିଆଯାଉନାହିଁ। ବସ ଆସୁ ନ ଥିବାରୁ ବସଷ୍ଟାଣ୍ଡ ଭିତରେ ଚଢ଼ାଦରରେ ଷ୍ଟଲ ଭଡା ନେଇଥିବା ପ୍ରାୟ ୨୦ଟି ଦୋକାନୀ ମୁଣ୍ଡରେ ହାତ ଦେଇ ବସିଛନ୍ତି। ଏନେଇ ପରିବହନ ମ୍ୟାନେଜର ଅମିତ ମିଶ୍ରଙ୍କୁ ପଚାରିବାରୁ ସେଠାକୁ ବସ ଯାଉଛି ବୋଲି ସେ ଜାଣିଥିବା କହିବା ସହ ଏନେଇ ପଚାରି ବୁଝିବେ ବୋଲି କହିଛନ୍ତି।