ଭୋପାଳ, ୨୬।୮: ମଧ୍ୟପ୍ରଦେଶ ବାର୍ଓ୍ବାନୀ ଜିଲାରେ ଗୋଟିଏ କାର୍ ଆଗକୁ ହଠାତ୍ ଏକ ବାଛୁରୀ ଚାଲି ଆସିଥିଲା। ଫଳରେ ଦ୍ରୁତ ଗତିରେ ଥିବା କାରଟି ବାଛୁରୀ ଉପରେ ଚଢ଼ିଯାଇଥିଲା। କାର୍ର ଆଗ ଚକାଟି ବାଛୁରି ଉପରେ ସେମିତି ଚଢ଼ିକି ରହିଯାଇଥିଲା। ପାଖରେ ଥିବା ଗାଈଟି ନିଜ ଛୁଆର ଏହି ଯନ୍ତ୍ରଣାକୁ ଦେଖି ରହିପାରିଲା ନାହିଁ। ନିଜ ଛୁଆକୁ ଚକା ତଳୁ ବାହାର କରିବା ପାଇଁ ଗାଈଟି କାର୍ ଚାରିପାଖେ ଘୂରିବାରେ ଲାଗିଲା। ଯେପରିକି ନିଜ ଛୁଆକୁ ବଞ୍ଚାଇବା ଲାଗି ସହାୟତା ମାଗୁଥିଲା।
ଏହି ଘଟଣାକୁ ପାଖରେ ଦେଖୁଥିବା ଲୋକ ସଙ୍ଗେ ସଙ୍ଗେ କାର୍ ପାଖରେ ରୁଣ୍ଡ ହୋଇଯାଇଥିଲେ। ଏହାପରେ ଲୋକମାନେ ମିଳିତ ଭାବେ କାର୍ର ଆଗ ଚକାକୁ ଟେକିବାରେ ଲାଗିଥିଲେ। କାରର ଆଗ ଚକାଟି ଯେମିତି କିଛି ଉପରକୁ ଉଠିଛି ବାଛୁରୀଟି ଭିତରୁ ବାହାରି ପଳାଇଥିଲା। ଫଳରେ ଗାଈଟି ନିଜ ୬ ମାସର ଛୁଆକୁ ଫେରି ପାଇବାରେ ସଫଳ ହୋଇଥିଲା। ବାଛୁରୀକୁ ଉଦ୍ଧାର କରାଯିବାର ଭିଡିଓ ଓ ଫଟୋ ଏବେ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି।
