କୋକସରା,୮ା୨(ଡି.ଏନ୍.ଏ.): ଗତ ୨୦୧୭ ପଞ୍ଚାୟତ ନିର୍ବାଚନ ରେ କଳାହାଣ୍ଡି ଜିଲା କୋକସରା ବ୍ଲକର ୩ ଜିଲା ପରିଷଦ ଜୋନ୍ରେ ଭାରତୀୟ ଜନତା ପାର୍ଟି(ଭାଜପା)ର ପ୍ରାର୍ଥୀମାନେ ବାଜିମାତ କରିଥିଲେ। ଏହାକୁ ଦୃଷ୍ଟିରେ ରଖି ଚଳିତ ନିର୍ବାଚନରେ ବିଜେଡି ଗଡ଼ ହାତେଇବାକୁ ସମସ୍ତ ଚେଷ୍ଟା କରୁଛି। ସ୍ବାସ୍ଥ୍ୟ ମନ୍ତ୍ରୀ ତଥା କଳାହାଣ୍ଡି ଜିଲା ପର୍ଯ୍ୟବେକ୍ଷକ ଥିବା ନବ କିଶୋର ଦାସ ପ୍ରଚାର ମଙ୍ଗ ଧରିଛନ୍ତି। ବିଜେଡିର ଦଳୀୟ ପ୍ରାର୍ଥୀଙ୍କୁ ବିଜୟୀ କରାଇବା ପାଇଁ ଦଳ ତାଙ୍କ ଉପରେ ଗୁରୁଦାୟିତ୍ୱ ଦେଇଛି । ମଙ୍ଗଳବାର ନବ କୋକସରା ଜୋନ୍ ୨ ର ପ୍ରାର୍ଥୀ ତ୍ରିନାଥ ବାଗ ଓ ମୋଟେର ଜୋନ୍ ୩ ପ୍ରାର୍ଥୀ ବୈଜୟନ୍ତୀ ପୁଝାରିଙ୍କ ଲାଗି ପ୍ରଚାର କରିଛନ୍ତି। କୋକସରା ବ୍ଲକର ଚିଲିଗୁଡା, କୋକସରା, ଗମ୍ଭାରୀଗୁଡା, ଲଡୁଗାଁ, ସୁନାମାଲ, ଟେମରା, ମାଝୀଗୁଡା, ଝରିଆଗୁଡା ଓ ଡହଗାଁଠାରେ ଦଳୀୟ ଜିଲା ପରିଷଦ ପ୍ରାର୍ଥୀଙ୍କ ପାଇଁ ନବୀନ ସରକାରଙ୍କ ଲୋକାଭିମୁଖୀ ଯୋଜନା ଓ ବିକାଶଧାରାକୁ ନେଇ ପ୍ରଚାର କରିବା ସହ ବହୁ ସଂଖ୍ୟାରେ ଭୋଟ ଦେଇ ପ୍ରାର୍ଥୀଙ୍କୁ ବିଜୟୀ କରାଇବା ପାଇଁ ସେ ନିବେଦନ କରିଛନ୍ତି । ତାଙ୍କ ସହ କଳାହାଣ୍ଡି ବିଜେଡି ଜିଲା ସଭାପତି ପୁଷ୍ପେନ୍ଦ୍ର ସିଂଦେଓ, ଧର୍ମଗଡ ବିଧାୟକ ମୌଷଧି ବାଗ, ଲାଞ୍ଜିଗଡ଼ ବିଧାୟକ ପ୍ରଦୀପ ଦିଶାରୀ, ବଦ୍ରି ନାରାୟଣ ପଟ୍ଟନାୟକ, ପର୍ଶୁରାମ ପ୍ରଧାନୀ, ନାରିନେତ୍ରୀ ଅଶୋକା ନାଏକ, ବିଧାୟକ ପ୍ରତିନିଧି ମାନସ ରଞ୍ଜନ ବାଗ ସମେତ ଦଳୀୟ କର୍ମକର୍ତ୍ତାମାନେ ଉପସ୍ଥିତ ରହି ପ୍ରଚାରରେ ସହଯୋଗ କରିଥିବା ଜଣାପଡ଼ିଛି।
