ନୂଆଦିଲ୍ଲୀ,୧୬।୫(ପି.ଟି.): ଭାରତୀୟ ମହିଳା ସିନିୟର ଦଳର କୋଚ୍ ପଦରୁ ବହିଷ୍କୃତ ହେବା ପରେ ଡବ୍ଲ୍ୟୁ.ଭି. ରମଣ ଏବେ ମୁହଁ ଖୋଲିଛନ୍ତି। ମୋତେ ବଦନାମ କରିବାକୁ ଅଭିଯାନ ଚାଲିଛି ବୋଲି ସେ ଅଭିଯୋଗ କରିଛନ୍ତି। ଏହି ଷଡ଼ଯନ୍ତ୍ର ତଥା ଅଭିଯାନକୁ ରୋକିବା ପାଇଁ ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ) ସଭାପତି ସୌରଭ ଗାଙ୍ଗୁଲିଙ୍କୁ ନିବେଦନ କରିଛନ୍ତି।
ଜାତୀୟ କ୍ରିକେଟ ଏକାଡେମୀ (ଏନ୍ସିଏ) ମୁଖ୍ୟ ରାହୁଲ ଡ୍ରାଭିଡ ଓ ଗାଙ୍ଗୁଲିଙ୍କୁ ଇ- ମେଲ୍ ଜରିଆରେ ଚିଠି ଲେଖି ସେ ଏ ନେଇ ଅବଗତ କରାଇବାକୁ ପ୍ରୟାସ କରିଛନ୍ତି। କୋଚ୍ ଭାବେ ଅଯୋଗ୍ୟ ହେବା ଛଡା ଅନ୍ୟ କାରଣ ପାଇଁ ତାଙ୍କୁ ବହିଷ୍କାର କରାଯିବା ଚିନ୍ତାଜନକ ବୋଲି ସେ ଉଲ୍ଲେଖ କରିଛନ୍ତି। କ୍ରିକେଟ ଉପଦେଷ୍ଟା କମିଟି (ସିଏସି) ହେଡ୍ କୋଚ୍ ପଦରୁ ରମଣଙ୍କୁ ହଟାଇ ପୂର୍ବତନ କ୍ରିକେଟର ରମେଶ ପାଓ୍ବାରଙ୍କୁ ନିଯୁକ୍ତ କରିଛି। ରମଣଙ୍କ ତତ୍ତ୍ୱାବଧାନରେ ଭାରତୀୟ ଦଳ ଗତବର୍ଷ ଅଷ୍ଟ୍ରେଲିଆରେ ଅନୁଷ୍ଠିତ ମହିଳା ଟି୨୦ ବିଶ୍ୱକପ୍ର ଫାଇନାଲରେ ପ୍ରବେଶ କରି ଅସାଧାରଣ ସଫଳତା ପାଇଥିଲା।
ମୋ ବିରୋଧରେ ଚାଲିଥିବା ଏହି ଅବାଞ୍ଛିତ ଅଭିଯାନକୁ ସ୍ଥାୟୀ ଭାବେ ରୋକା ଯିବା ନିହାତି ଜରୁରୀ। ଏହି ଅଭିଯାନରେ ବିସିସିଆଇର କେତେଜଣ ବରିଷ୍ଠ ଅଧିକାରୀ ମଧ୍ୟ ସାମିଲ ରହିଛନ୍ତି। ଯଦି ଆବଶ୍ୟକ ହୁଏ ତେବେ ଏ ସଂକ୍ରାନ୍ତରେ ସ୍ପଷ୍ଟୀକରଣ ଦେବାକୁ ପ୍ରସ୍ତୁତ ଅଛି ବୋଲି ସେ କହିଛନ୍ତି। ଯଦି ଅକ୍ଷମତା ପାଇଁ ମୋତେ ବହିଷ୍କାର କରାଯାଇଛି ତା’ହେଲ ଏଥିରେ ଆଦୌ ଦୁଃଖ କରିବାର ଆବଶ୍ୟକତା ନାହିଁ। କିନ୍ତୁ ଯଦି ଅନ୍ୟ କାରଣ ପାଇଁ ମୋତେ ଅଣଦେଖା କରାଯାଇଛି ତା’ହେଲେ ଏହା ନିଶ୍ଚିତ ଭାବେ ଚିନ୍ତାଜନକ ଓ ଏ ନେଇ କାର୍ଯ୍ୟାନୁଷ୍ଠାନ ହେବା ନିହାତି ଜରୁରୀ। ରମଣ ଭାରତ ପାଇଁ ୧୯୮୮ରୁ ୧୯୯୭ ମଧ୍ୟରେ ୧୧ ଟେଷ୍ଟ ଓ ୨୭ଟି ଦିନିକିଆ ମ୍ୟାଚ୍ ଖେଳିଛନ୍ତି। ତେବେ ଚିଠିରେ ରମଣ କୌଣସି ନିର୍ଦ୍ଦିଷ୍ଟ ବ୍ୟକ୍ତିଙ୍କ ନାମ ଉଲ୍ଲେଖ କରିନାହାନ୍ତି। ଅବସର ନେବା ପରେ ରମଣ ଦୀର୍ଘ ୨୦ ବର୍ଷ କୋଚ୍ ଭାବେ ସଫଳତାର ସହ କାର୍ଯ୍ୟ କରିଆସୁଛନ୍ତି।