ନୟାଗଡ଼ ଅଫିସ,୧୧ା୫: ଚଳିତ ବର୍ଷ ନୟାଗଡ଼ ଜିଲା ଦଶପଲ୍ଲା ବ୍ଳକରେ କେନ୍ଦୁପତ୍ର ଫଡି ଖୋଲିଥିଲେ ହେଁ ଫଡିକୁ କେନ୍ଦୁପତ୍ର ଆସୁନାହିଁ । ବର୍ଷା ଯୋଗୁ କେନ୍ଦୁପତ୍ର ସଂଗ୍ରହ ଓ ଶୁଖାଇବାରେ ଅସୁବିଧା ହେତୁ ସମସ୍ୟା ସୃଷ୍ଟି ହୋଇଛି। ଫଡି ଖୋଲିଥିଲେ ହେଁ ତାହା କାମରେ ଲାଗୁନାହିଁ। ଏଣୁ ଆଦିବାସୀଙ୍କ ରୋଜଗାର ବନ୍ଦ ହୋଇଯାଇଛି ବୋଲି ସୂଚନା ମିଳିଛି।
ସୂଚନା ଅନୁଯାୟୀ, ଦଶପଲ୍ଲା ବ୍ଲକ ହେଉଛି ଆଦିବାସୀ ଦଳିତ ଅଧ୍ୟଷିତ ଅଞ୍ଚଳ। ଏଠାରେ କେନ୍ଦୁପତ୍ର ସଂଗ୍ରହ ଅଧିକ ହୋଇଥାଏ । ମାର୍ଚ୍ଚ ଶେଷରୁ ଜୁନ୍ ମାସ ଅଧା ପର୍ଯ୍ୟନ୍ତ କେନ୍ଦୁ ଗଛର ଗୋଛିକଟା ସହ ପତ୍ର ସଂଗ୍ରହ ହୁଏ। ଗଛ ଯେପରି ଭଲ ବଢ଼ିବ ଓ ପତ୍ର ଦେବ ତାକୁ ଗୁରୁତ୍ୱ ଦିଆଯାଏ । ସମତଳ ପଡ଼ିଆରେ ଉଠିଥିବା କେନ୍ଦୁଗଛଗୁଡିକରୁ ଭଲ ପତ୍ର ସଂଗ୍ରହ ହୋଇଥାଏ । ଝାଞ୍ଜି ପବନ ଓ ଗ୍ରୀଷ୍ମ ପ୍ରବାହ ଯେତେ ଅଧିକ ହେବ ସେତେ ଭଲ କେନ୍ଦୁପତ୍ର ହୋଇଥାଏ। ଆଦିବାସୀ ମହିଳାମାନେ ଘରେ ରହି ନ ରହି ଏହି ସମୟରେ ରୋଜଗାରକୁ ହାତଛଡା କରି ନ ଥାନ୍ତି । ସକାଳ ୫ଟାରୁ କେନ୍ଦୁପତ୍ର ସଂଗ୍ରହ କରିବାକୁ ଯାଇଥାନ୍ତି। ଦିନ ୧୦ରୁ ୧୧ ଟାକୁ ଘରକୁ ଫେରନ୍ତି । ଭଲ ପତ୍ରକୁ ବାଛନ୍ତି । ୨୧ଟି ପତ୍ରକୁ ମିଶାଇ ଗୋଟିଏ କେରି କରନ୍ତି । ଫଡିରେ ଯାଇ କେନ୍ଦୁପତ୍ର କେରିଗୁଡ଼ିକ ବିକ୍ରି କରନ୍ତି । ଚଳିତ ବର୍ଷ କେନ୍ଦୁପତ୍ର ଫଡି ଆଦିବାସୀଙ୍କ କାମରେ ଲାଗୁନାହିଁ, ଯାହାକି ଆଦିବାସୀଙ୍କ ଚିନ୍ତା ବଢ଼ାଇଛି । ଏନେଇ ଉପରଡିକରି ଗଁାର ହୁଲାସ ଜାନି କୁହନ୍ତି, ଚଳିତ ବର୍ଷ କେନ୍ଦୁପତ୍ର ପାଇଁ ଭଲ ପାଗ ଦେଇଛି । ତେବେ ମଝିରେ ମଝିରେ ବର୍ଷା ସବୁ କିଛି ବିଗାଡି ଦେଉଛି । କେନ୍ଦୁପତ୍ର ସଂଗ୍ରହ ହେଉଥିଲେ ମଧ୍ୟ ତାକୁ ଶୁଖାଇ ହେଉନାହିଁ। ଫଡିରେ କେନ୍ଦୁପତ୍ର ଦେଲେ ନେଉ ନାହାନ୍ତି । ପାଗ ଭଲ ହେଲେ କେନ୍ଦୁପତ୍ର ସଂଗ୍ରହ କରନ୍ତୁ ବୋଲି ଫଡିରେ କହୁଛନ୍ତି । ଟାଙ୍ଗନାଡ଼ି ଗଁାର ନିରୁପମା ମଳିକ କୁହନ୍ତି, ମେ ମାସ ମଧ୍ୟ ଭାଗ ହେବାକୁ ବସିଲାଣି । ହେଲେ କେନ୍ଦୁପତ୍ର ତୋଳି ହେଉନାହିଁ । ତୋଳିଲେ ଫଡିରେ ଦେଇ ହେଉନାହାନ୍ତି। ଚଳିତ ବର୍ଷ ବର୍ଷା ଯୋଗୁ ଆଦିବାସୀଙ୍କ ରୋଜଗାର ବନ୍ଦ ହୋଇଗଲା । ବର୍ଷା କମିଲେ କେନ୍ଦୁପତ୍ର ସଂଗ୍ରହରେ ଅସୁବିଧା ଦୂର ହେବ । ଗୁଣ୍ଡୁରୀବାରୀ ଗଁାର ସବିତା ମଳିକ କୁହନ୍ତି, ୨୧ ପତ୍ର ଥିବା ଏକ କେରିକୁ ୧ ଟଙ୍କା ୪୦ ପଇସାରେ ଫଡିରେ ବିକ୍ରି କରାଯାଏ। ଚଳିତ ବର୍ଷ କେରି କରି ହେଉନି । କେରି କଲେ ମଧ୍ୟ ଫଡିରେ ରଖିବାକୁ କୁନ୍ଥୁକୁନ୍ଥୁ ହେଉଛନ୍ତି। ବର୍ଷ ନ କମିଲେ ସବୁ କିଛି ଅସୁବିଧା ହୋଇଯିବ। ନିଜର ଅନୁଭୂତିରୁ କହିଥିଲେ ଦଶପଲ୍ଲା ଅଞ୍ଚଳରେ ୮ ଓ ୯ ଦିନ ଭଲ ପାଗ ଦେଇଥିଲା । ଆମ୍ଭେମାନେ କେନ୍ଦୁପତ୍ର ସଂଗ୍ରହ କରିଥିଲୁ।ହେଲେ ୧୦ ତାରିଖରେ ବର୍ଷା ଯୋଗୁ ପୁଣି ସମସ୍ୟା ଦେଖା ଦେଲା । କେନ୍ଦୁପତ୍ର ନଷ୍ଟ ହୋଇଗଲା । ଏଣୁ କେନ୍ଦୁପତ୍ର ସଂଗ୍ରହ କରିବାକୁ ଭୟ ଲାଗିଲାଣି ।