ସବୁ ମଣିଷର ଇଚ୍ଛା ଥାଏ ତା’ପାଖରେ ନିଜର ଏକ କାର୍ ଥାଆନ୍ତା। ଯେଉଁଥିରେ ସେ ପରିବାର ସହ ବସି ବୁଲିପାରନ୍ତା। ଆଉ କେହି କେହି ଏମିତି ବି କାର୍ ଚାହାନ୍ତି, ଯାହା ଏତେ ଖାସ୍ ହୋଇଥିବ ଯେ, ତାକୁ ଦେଖି ଲୋକେ ଘଡ଼ିଏ ଚାହିଁ ରହିବେ। ଏସବୁକୁ ନଜରରେ ରଖି କାର୍ କମ୍ପାନୀମାନେ ଭିନ୍ନ ଭିନ୍ନ ଡିଜାଇନ୍ର କାର୍ ତିଆରି କରିଥାନ୍ତି। ତେବେ ଜାଣନ୍ତି କି ଏମିତି ଏକ କାର୍ ଅଛି ଯାହା ଏକ ୧୦ ମହଲା ଘର ସହିତ ସମାନ ଥିଲା। ଅର୍ଥାତ୍ ଏହାର ଲମ୍ବ ଥିଲା ୧୦୦ ଫୁଟ୍ ଯାହା ଏକ ଦଶ ମହଲା ଘରର ଉଚ୍ଚତା ସହ ସମାନ। ଏତେ ଲମ୍ବା ହୋଇଥିବାରୁ ୧୯୮୬ ମସିହାରେ ଏହା ପୃଥିବୀର ସବୁଠାରୁ ଲମ୍ବା କାର୍ଭାବେ ଗିନିଜ୍ ଓ୍ବାର୍ଲଡ ରେକର୍ଡସ୍ରେ ସ୍ଥାନ ପାଇଥିଲା। ‘ଦ ଆମେରିକାନ ଡ୍ରିମ’ ନାମକ ଏହି କାର୍କୁ ଏକ ଚଳଚ୍ଚିତ୍ର ପାଇଁ ତିଆରି କରାଯାଇଥିଲା। ବହୁ ଜଣାଶୁଣା ଗାଡି ଡିଜାଇନର୍ ଜେ ଓରବର୍ଗ ଏହାକୁ ଡିଜାଇନ୍ କରିଥିଲେ। ୨୬ ଟାୟର ଥିବା ଏହି କାର୍ର ବିଶେଷତ୍ୱ ଏହା ଥିଲା କି ଏହାକୁ ଉଭୟ ପାର୍ଶ୍ୱରୁ ଡ୍ରାଇଭ କରି ହେଉଥିଲା। କାର୍୍ରେ ୮ଟି ଇଞ୍ଜିନ ଲାଗିଥିଲା। ତା’ସହ ଏଥିରେ ସୁଇମିଂ ପୁଲ, ଜକୁଜି, ବାଥ ଟବ୍, ଛୋଟ ଗଲ୍ଫ କୋର୍ସ, ଅନେକ ଟିଭି, ଫ୍ରିଜ୍, ଟେଲିଫୋନ୍ ସହ ଗାଡ଼ିର ପଛ ଭାଗରେ ଏକ ହେଲିପ୍ୟାଡ ବି ଥିଲା; ଯାହା ଉପରେ ହେଲିକପ୍ଟର ଆରାମରେ ଓହ୍ଲାଇବା ସହ ଟେକ୍ ଅଫ୍ କରିପାରୁଥିଲା। ଏଥିରେ ୭୦ ଜଣ ବସିବାର ବ୍ୟବସ୍ଥା ଥିଲା। ଚଳଚ୍ଚିତ୍ରରେ ବ୍ୟବହାର ପାଇଁ ଏହାକୁ ତିଆରି କରାଯାଇଥିଲା। ଆଉ ଘଣ୍ଟାକୁ ୧୪୪ ହଜାର ଟଙ୍କାରେ ଭଡ଼ା ଦିଆଯାଉଥିଲା। ଏହାର କାମ ସରିଗଲା ପରେ ଏହାକୁ କବାଡ଼ିଖାନାକୁ ବିକ୍ରି କରିଦିଆଯାଇଥିଲା। ପରେ ଏହି କାର୍କୁ ଏକ ମ୍ୟୁଜିୟମ କିଣି ନେଇଥିଲା।