ବ୍ରହ୍ମପୁର ଅଫିସ, ୨।୨: ବ୍ରହ୍ମପୁର ସହର ଦେଇ ଯାଇଥିବା ଜାତୀୟ ରାଜପଥ ଏମକେସିଜି ମେଡିକାଲ କଲେଜ ସମ୍ମୁଖରେ ବୁଧବାର ବିଳମ୍ବିତ ରାତିରେ ଏକ ମର୍ମନ୍ତୁଦ ସଡକ ଦୁର୍ଘଟଣା ଘଟିଛି। କାର ଧକ୍କାରେ ସ୍କୁଟି ଚାଳକ ଓ ତାଙ୍କ ମା’ଙ୍କ ମୃତ୍ୟୁ ଘଟିଛି। ମୃତକଙ୍କ ମଧ୍ୟରେ ରହିଛନ୍ତି ଆଙ୍କୁଲି ଅଞ୍ଚଳର ସୀତାମ୍ମା ପାତ୍ର ଓ ତାଙ୍କ ପୁଅ ରାମଚନ୍ଦ୍ର ପାତ୍ର ବୋଲି ଟ୍ରାଫିକ ପୋଲିସଠାରୁ ସୂଚନା ମିଳିଛି। ରାମଚନ୍ଦ୍ର ଓ ତାଙ୍କ ମା’ ଏକ ସ୍କୁଟିରେ ଏମକେସିଜି ମେଡିକାଲରୁ ଘରକୁ ଫେରୁଥିବା ବେଳେ ଫାଟକ ସମ୍ମଖରେ ହିଁ ଏକ କାର ତାଙ୍କୁ ଧକ୍କା ଦେଇଥିଲା। ଦୁର୍ଘଟଣାରେ ଉଭୟ ମାଆ ପୁଅ ଗୁରୁତର ହେବା ପରେ ସେମାନଙ୍କୁ ଏମକେସିଜିରେ ଭର୍ତ୍ତି କରାଯାଇଥିଲା। କିଛି ସମୟ ପରେ ଡାକ୍ତର ଉଭୟଙ୍କୁ ମୃତ ଘୋଷଣା କରିଥିଲେ। ଟ୍ରାଫିକ ପୋଲିସ ପହଞ୍ଚି ଉଭୟ ଗାଡ଼ିକୁ ଜବତ କରି ତଦନ୍ତ ଜାରି ରଖିଛି। ଗତ ଏକ ମାସ ମଧ୍ୟରେ ସଡକ ଦୁର୍ଘଟଣାରେ ଟ୍ରାଫିକ ଥାନା ଅଞ୍ଚଳରେ ଏଯାବତ ୫ ଜଣଙ୍କର ମୃତ୍ୟୁ ଘଟିସାରିଲାଣି। ପୋଲିସ କାର ମାଲିକଙ୍କୁ ଥାନାରେ ଅଟକ ରଖିଛି। ବେପରୁଆ ଗାଡି ଚାଳନା ଯୋଗୁ ଦୁର୍ଘଟଣାରେ ଦୁଇଜଣଙ୍କର ଶୋଚନୀୟ ମୃତ୍ୟୁ ଘଟିଛି। ସଡକ ସଚେତନତା କାର୍ଯ୍ୟକ୍ରମ ଏବେ ବିଫଳ ହୋଇଛି।
