ପାଟଣା,୩୦ା୭(ସ୍ବ.ପ୍ର.): କେନ୍ଦୁଝର ଜିଲା ପାଟଣା ବ୍ଲକ ମୁଖ୍ୟାଳୟସ୍ଥିତ ପାଟଣା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ପରିସରରେ ଡ. ଲକ୍ଷ୍ମଣ ମହାନ୍ତଙ୍କ ଓଡି ୦୨ ଏଏକ୍ସ ୫୦୮୨ ନମ୍ବର ବିଶିଷ୍ଟ ଏକ କାର୍ ରହୁଥିବା ବେଳେ ଗୁରୁବାର ସନ୍ଧ୍ୟାରେ ଉକ୍ତ ଗାଡ଼ିଟି ଭୁବନେଶ୍ୱର ସିଆରପି ସ୍କୋୟାର ଫ୍ଲାଇ ଓଭରରେ ଦ୍ରୁତ ଗତିରେ ଚାଲୁଥିବା ଦର୍ଶାଇ ଡା. ଲକ୍ଷ୍ମଣ ମହାନ୍ତଙ୍କ ମୋବାଇଲକୁ ୭ ହଜାର ଟଙ୍କାର ଚାଲାଣ ପଠାଯାଇଛି।
ସୂଚନାଯୋଗ୍ୟ, ଗତ ୩ ବର୍ଷ ତଳେ ଲକ୍ଷ୍ମଣଙ୍କ କକା ଗୋକୁଳ ଚନ୍ଦ୍ର ମହାନ୍ତଙ୍କ ନାଁରେ କାର୍ଟି କିଣା ଯାଇଥିଲେ ହେଁ କାର୍ଟିକୁ ଡ.ଲକ୍ଷ୍ମଣ ବ୍ୟବହାର କରୁଛନ୍ତି। ତାଙ୍କ ସୂଚନା ମୁତାବକ ୩ ବର୍ଷ ମଧ୍ୟରେ କାର୍ଟି କେବେ ସିଆରପି ସ୍କୋୟାର ଫ୍ଲାଇ ଓଭର ଦେଇ ଯାଇନାହିଁ। ଏନେଇ ଲକ୍ଷ୍ମଣ ଆରଟିଓ ଭୁବନେଶ୍ୱରଙ୍କୁ ଲିଖିତ ଅଭିଯୋଗ କରିଛନ୍ତି। ଏନେଇ ଲକ୍ଷ୍ମଣଙ୍କୁ ପଚାରିବାରୁ ପରିବହନ ବିଭାଗ ଭୁଲବଶତଃ ଚାଲାଣ ପଠାଇଛି ନ ହେଲେ କେହି ଦୁର୍ବୃତ୍ତ ମୋ’ କାର୍ର ଡୁପ୍ଲିକେଟ ନମ୍ବର ପ୍ଲେଟ୍ ବ୍ୟବହାର କରୁଛନ୍ତି। ଯାହାର ତଦନ୍ତ ହୋଇ ଅଭିଯୁକ୍ତଙ୍କୁ ଆଇନ ଅନୁଯାୟୀ ଦଣ୍ଡ ବିଧାନ କରାଯିବା ଉଚିତ ବୋଲି ସେ କହିଛନ୍ତି।