ରୋମ୍,୨।୭: ଗାଡ଼ି ତିଆରିଠାରୁ ଆରମ୍ଭକରି ଇଲେକ୍ଟ୍ରୋନିକ୍ ଡିଭାଇସ୍ ନିର୍ମାଣ କ୍ଷେତ୍ରରେ ଟେକ୍ନୋଲୋଜିର ବଡ଼ ଅବଦାନ ରହିଛି। ସେହିପରି ବିଭିନ୍ନ ଅଟୋମୋବାଇଲ କମ୍ପାନୀ ଏବେ ଉନ୍ନତ ଜ୍ଞାନକୌଶଳକୁ ବ୍ୟବହାର କରି ଆଡ୍ଭାନ୍ସଡ ଓ ନୂଆ ପ୍ରଣାଳୀର କାର୍, ବାଇକ୍ ତିଆରି କରିବାରେ ଲାଗିଛନ୍ତିି। ଏମିତି କିଛି କାର୍ ରହିଛି, ଯାହା କୌଣସି ଘରଠାରୁ କମ୍ ନୁହେଁ। ଏବେ କିନ୍ତୁ ଇଣ୍ଟରନେଟ୍ରେ ଏକ କାର୍ ଲୋକଙ୍କ ଦୃଷ୍ଟି ଆକର୍ଷଣ କରିଛି। ଏହି କାର୍ଟି ବିଶ୍ୱର ସବୁଠାରୁ ନିଚା କାର୍ ବୋଲି କୁହାଯାଉଛି।
ସୋସିଆଲ ମିଡିଆରେ ଛାଇଯାଇଥିବା ଏହି କାର୍ରେ ପ୍ରବେଶ ପାଇଁ ଡୋର୍ ନାହିଁ କି ଟାୟାର ନାହିଁ। ଏହାସତ୍ତ୍ୱେ କାର୍ଟି ଅବାଧରେ ଅନ୍ୟ କାର୍ ଭଳି ରାସ୍ତାରେ ଯାଉଛି। ଯଦିଓ ଏହି ନିଚା କାର୍ରେ କାହାରିକୁ ବସିବାର ସୁଯୋଗ ମିଳିବ ନାହିଁ କିନ୍ତୁ କାର୍କୁ ଦେଖି ଅନେକଙ୍କ ମନରେ କୌତୂହଳ ଜାତ ହେଉଛି। କାରାମଘେଡୋନ୍ ନାମକ ୟୁଟ୍ୟୁବ୍ ଚ୍ୟାନେଲରେ ଏହାର ଭିଡିଓ ଶେୟାର କରାଯାଇଛି। ଏଥିରେ କେବଳ ବୋନେଟ୍ ଓ ଓ୍ବିଣ୍ଡୋ ସେଡ୍ସ ରହିଛି। ଇଟାଲୀର କେତେଜଣ ଅଟୋମୋବାଇଲ୍ ଇଞ୍ଜିନିୟର ଏହାକୁ ତିଆରି କରିଛନ୍ତି। କାର୍ରେ ଲାଗିଥିବା କାଠପଟା ଦେହରେ ଏକ ରୋବୋ ଖଞ୍ଜାଯାଇଛି, ଯାହା କାର୍ ଡ୍ରାଇଭର ଭାବେ କାର୍ଯ୍ୟ କରୁଛି। ସମ୍ପୂର୍ଣ୍ଣ କାର୍ଟି ରୋବୋ ଦ୍ୱାରା ନିୟନ୍ତ୍ରିତ ହେଉଥିବାବେଳେ ଏଥିରେ ଗୋପ୍ରୋ କ୍ୟାମେରା ଫିଟ୍ କରାଯାଇଛି। କ୍ୟାମେରା ଜରିଆରେ ରାସ୍ତାର କ୍ଲିୟର ଭିୟୁ ରୋବୋ ପାଖରେ ପହଞ୍ଚୁଛି, ଯାହା ଦ୍ୱାରା ଜନଗହଳି ରାସ୍ତାରେ ମଧ୍ୟ କାର୍ଟି ଗଡ଼ିପାରୁଛି। ଟାୟାର ଓ ଡୋର୍ ବିହୀନ ଏକ ସିଆନ୍ (ସବୁଜ ଓ ନୀଳ ମିଶ୍ରିତ) ରଙ୍ଗର କାର୍ ରାସ୍ତାରେ ଯାଉଥିବାର ଭିଡିଓ ଟୁଇଟରରେ ମଧ୍ୟ ବହୁଳ ପ୍ରସାର ହେବାରେ ଲାଗିଛି। ଅଦ୍ୟାବଧି ୩୮ ନିୟୁତ ଲୋକ ଏହାକୁ ଦେଖିସାରିଥିବାବେଳେ ଭିଡିଓକୁ ୧୧.୪ ଲକ୍ଷ ଲାଇକ୍ ମିଳିସାରିଲାଣି।