ବ୍ରହ୍ମପୁର ଅଫିସ,୧୬।୫: ବେକାର ଯୁବତୀ ଯୁବକଙ୍କୁ ଚାକିରି ଦେବା ନଁାରେ ଟଙ୍କା ଠକେଇ ଅଭିଯୋଗରେ ସମୀର ନାୟକ ଏବେ ମଣ୍ଡଳକାରାଗାରରେ ବିଚାରାଧୀନ ବନ୍ଦୀ ଭାବେ ଅଛନ୍ତି। ପୁଣି ତାଙ୍କ ନାମରେ ବଡବଜାର ଥାନାରେ ଏକ ସମାନ ଅଭିଯୋଗ ଆସିଛି। ଏହି ଘଟଣାଙ୍କୁ ନେଇ ପୋଲିସ ନଂ.୧୦୬/୨୨ରେ ଏକ ମାମଲା ରୁଜୁ କରି ଘଟଣାର ତଦନ୍ତ କରୁଛି।
ସୂଚନାଯୋଗ୍ୟ, ଚାକିରି ସନ୍ଧାନରେ ଥିବା ସଦର ଥାନା ଅନ୍ତର୍ଗତ ପାଣ୍ଡିଆଝୋଳି ଗ୍ରାମର ସୁନିଦ୍ଦ କୁମାର ଚୌଧୁରୀଙ୍କ ସହ କିଛି ବର୍ଷ ପୂର୍ବେ ସମୀର ନାୟକ ପରିଚିତ ହୋଇଥିଲେ। ସମୀର ନିଜକୁ ଓଡ଼ିଶା ମେଡିକାଲ ରିକ୍ୟୁରିଟମେଣ୍ଟ ବୋର୍ଡର ସେକ୍ରେଟାରୀ ବୋଲି ଦର୍ଶାଇବା ସହ ଉକ୍ତ ଯୁବକଙ୍କୁ ମେଡ଼ିକାଲରେ ସୁପରଭାଇଜର କିମ୍ବା ଡାଟାଏଣ୍ଟ୍ରି ଭାବରେ ଚୁକ୍ତିଭିତ୍ତିକ ଚାକିରି କରାଇଦେବି ବୋଲି ପ୍ରତିଶ୍ରୁତି ଦେଇଥିଲେ। ଏହି ବାବଦକୁ ସମୀର ଅଶାୟୀ ଯୁବକଙ୍କଠାରୁ ମୋଟ ୫୫ ହଜାର ଟଙ୍କା ନେଇଥିବା ଅଭିଯୋଗ ହୋଇଛି। କିନ୍ତୁ ଅନେକ ଦିନ ବିତିବା ପରେ ମଧ୍ୟ ଯୁବକ ଜଣଙ୍କ ଚାକିରି ସମ୍ପର୍କିତ ନିଯୁକ୍ତି ପତ୍ର ନ ପାଇବାରୁ ସେ ଠକେଇର ଶିକାର ହୋଇଥିବା ଜାଣିବାକୁ ପାଇଥିଲେ। ଏନେଇ ସେ ବଡବଜାର ଥାନାରେ ଅଭିଯୋଗ କରିଥିଲେ। ଏହି ଘଟଣାରେ ପୋଲିସ ଏକ ମାମଲା ରୁଜୁ କରି ଘଟଣାର ତଦନ୍ତ ଆରମ୍ଭ କରିଛି। ପୂର୍ବରୁ ସମୀର ଜଣେ ମହିଳାଙ୍କ ୭୦ ହଜାର ଟଙ୍କା ଠକି ନେଇଥିଲେ। ବଡ଼ ବଜାର ପୋଲିସ ମାମଲା ନଂ ୧୦୧/୨୨ରେ ସମୀରଙ୍କୁ ଗିରଫ କୋର୍ଟ ଚାଲାଣ କରିଥିଲା।