ଲଣ୍ଡନ,୮।୬: ଇଂଲଣ୍ଡ ପେସର୍ ଓଲି ରବିନ୍ସନ୍ ବିବାଦୀୟ ଟୁଇଟ୍ ପ୍ରସଙ୍ଗ ବ୍ରିଟିଶ ପ୍ରଧାନମନ୍ତ୍ରୀ ବୋରିସ ଜନସନଙ୍କ ନିକଟରେ ପହଞ୍ଚିଛି। ଜନସନ ତାଙ୍କ କ୍ରୀଡ଼ା ମନ୍ତ୍ରୀଙ୍କ ମନ୍ତବ୍ୟକୁ ସମର୍ଥନ କରିଛନ୍ତି ଯେ, ଓଲିଙ୍କୁ ନିଲମ୍ବନ କରି ଇଂଲଣ୍ଡ କ୍ରିକେଟ ଏକ କଠୋର ଆଭିମୁଖ୍ୟ ଗ୍ରହଣ କରିଛି। ବ୍ରିଟେନର କ୍ରୀଡ଼ା ଓ ସଂସ୍କୃତି ମନ୍ତ୍ରୀ ଅଲିଭର ଡାଉଡେନ ଇଂଲଣ୍ଡ ଏବଂ ୱେଲ୍ସ କ୍ରିକେଟ ବୋର୍ଡ (ଇସିବି)କୁ ୨୭ ବର୍ଷୀୟ ନିଲମ୍ବନ ଉପରେ ପୁନର୍ବିଚାର କରିବାକୁ ଅନୁରୋଧ କରିଛନ୍ତି।
ରବିବାର ଦିନ ଡ୍ରରେ ଶେଷ ହୋଇଥିବା ନ୍ୟୁଜିଲାଣ୍ଡ ବିପକ୍ଷ ପ୍ରଥମ ଟେଷ୍ଟରେ ଓଲି ରବିନ୍ସନ୍ ବଲ ଏବଂ ବ୍ୟାଟ ଦ୍ୱାରା ପ୍ରଭାବିତ କରିଥିଲେ। ଏହି ସମୟରେ ୨୦୧୨ ଏବଂ ୨୦୧୩ରେ ପୋଷ୍ଟ କରାଯାଇଥିବା ଟୁଇଟ୍ ପରେ ଅନୁସନ୍ଧାନ ଫଳାଫଳ ପର୍ଯ୍ୟନ୍ତ ଇସିବି ରବିନସନ୍ଙ୍କୁ ସମସ୍ତ ପ୍ରକାର ଅନ୍ତର୍ଜାତୀୟ କ୍ରିକେଟରୁ ନିଲମ୍ବିତ କରିଛି। ପ୍ରଧାନମନ୍ତ୍ରୀ ଜନସନଙ୍କ ମୁଖପାତ୍ର କହିଛନ୍ତି ଯେ, ଏହି ମନ୍ତବ୍ୟ ଏକ ଦଶନ୍ଧି ପୂର୍ବରୁ ଦିଆଯାଇଥିଲା, ସେତେବେଳେ ସେ କିଶୋର ଥିଲେ। ତାଙ୍କ ମନ୍ତବ୍ୟ ପାଇଁ କ୍ଷମା ମାଗିଛନ୍ତି। ଏହାପୂର୍ବରୁ ବ୍ରିଟେନ କ୍ରୀଡାମନ୍ତ୍ରୀ କହିଥିଲେ, ଓଲିଙ୍କ ଟୁଇଟ୍ ଆପତ୍ତିଜନକ ଏବଂ ଭୁଲ ଥିଲା, ଏହା ଏକ ଦଶନ୍ଧି ପୁରୁଣା ଏବଂ ଜଣେ କିଶୋର ଅବସ୍ଥାରେ ସେ ଏହା ଲେଖିଥିଲେ। ସେ ଏବେ ଜଣେ ପୁରୁଷ ଏବଂ ସେ ମଧ୍ୟ କ୍ଷମା ମାଗିଛନ୍ତି। ଇସିବି ତାଙ୍କୁ ନିଲମ୍ବିତ କରିଛି ଏବଂ ସେ ପୁନର୍ବାର ଚିନ୍ତା କରିବା ଉଚିତ୍।