ବିଲେଇକୁ ଅନେକ ଘରେ ପୋଷିଥାନ୍ତି। ତା’ର ଯତ୍ନ ନିଅନ୍ତି। ମାଲିକଙ୍କ ସହ ଖେଳି ବିଲେଇ ତାଙ୍କ ଅବସାଦ, ଚିନ୍ତା, ଚାପ ଦୂର କରିଦିଏ। କିନ୍ତୁ ଜାଣିଛନ୍ତି କି ଆଜିକାଲି ବିଲେଇ ମଣିଷଙ୍କ ଭଳି ଚାକିରି କଲେଣି ବୋଲି। ବିଶ୍ୱାସ ନ ହେଲେ ବି ଏହା ସତ। ଅଷ୍ଟ୍ରେଲିଆର ରିଚମଣ୍ଡ ସହରରେ ଥିବା ଏପ୍ଓ୍ବର୍ଥ ହସ୍ପିଟାଲରେ ଏକ ବିଲେଇକୁ ସିକ୍ୟୁରିଟିଗାର୍ଡ ବା ଜଗୁଆଳିର ଚାକିରି ଦିଆଯାଇଛି। ସେହି ବିଲେଇର ନାମ ହେଉଛି ଏଲଉଡ୍। ହସ୍ପିଟାଲ କର୍ତ୍ତୃପକ୍ଷ ଏଲଉଡ୍କୁ ଏକ ଆଇଡି କାର୍ଡ ବା ପରିଚୟ ପତ୍ର ବି ପିନ୍ଧାଇଛନ୍ତି। ସେଥିରେ ତା’ର ଫଟୋ ରହିଛି। କେବଳ ସେତିକି ନୁହେଁ, ସେଥିରେ ତା’ର ନାମ ଓ କାମ ବି ଲେଖାଯାଇଛି। ହସ୍ପିଟାଲରେ ପାଥୋଲୋଜିଷ୍ଟଭାବେ କାମ କରୁଥିବା ଚାଣ୍ଡେଲ ଟ୍ରୋଲିପ୍ କହନ୍ତି, ‘ଏଲଉଡ୍ ଦୀର୍ଘ ୧ ବର୍ଷ ହେବ ହସ୍ପିଟାଲ ଗେଟ୍ ପାଖରେ ବୁଲୁଥିଲା। ଏହା ଦେଖି ହସ୍ପିଟାଲ କର୍ତ୍ତୃପକ୍ଷ ତାକୁ ଜଗୁଆଳିର ଚାକିରି ଦେଲେ। ସେ ଗେଟ୍ ପାଖରେ ବସି ଜଗେ। ଆଉ ପ୍ରତି ବଦଳରେ ତାକୁ ଭଲ ଖାଇବା ଦିଆଯିବା ସହ ତା’ର ଭଲ ଯତ୍ନ ନିଆଯାଏ। ’