ଭୁବନେଶ୍ୱର,୨୫।୨(ବ୍ୟୁରୋ):ଅଞ୍ଜନା ମିଶ୍ର ଗଣବଳାତ୍କାର ମାମଲାର ମୁଖ୍ୟ ଅଭିଯୁକ୍ତ ବିବନ ବିଶ୍ୱାଳଙ୍କୁ ଦୋଷୀ ସାବ୍ୟସ୍ତ କରିବା ପାଇଁ ସିବିଆଇ ଜୋରଦାର ପ୍ରୟାସ ଚଳାଇଛି। ଦିନେ କି ଦୁଇଦିନ ମଧ୍ୟରେ ବିବନଙ୍କୁ ରିମାଣ୍ଡରେ ନେଇ ସିବିଆଇ ମାରାଥନ ଜେରା ଆରମ୍ଭ କରିବ। ବିବନ ଓଡ଼ିଶାରୁ ଫେରାର ପଛରେ କିଏ ମୁଖ୍ୟ ଭୂମିକା ନିଭାଇଥିଲେ, ପୁଣେରେ କେମିତି ନକଲି ପରିଚୟପତ୍ର ପ୍ରସ୍ତୁତ କରିଥିଲେ, ଘର ସହ କେମିତି ସମ୍ପର୍କ ରଖିଥିଲେ ସେସମ୍ପର୍କରେ ସିବିଆଇ ତଥ୍ୟ ହାସଲ କରିବ। ଏନେଇ ଏକ ଅତିରିକ୍ତ ଚାର୍ଜଶିଟ୍ ପ୍ରସ୍ତୁତ କରିବା ପାଇଁ ପ୍ରାଥମିକ ପର୍ଯ୍ୟାୟରେ ସମସ୍ତ ପ୍ରସ୍ତୁତି ଆରମ୍ଭ କରିଛି। ଆସନ୍ତା ୨ ଦିନ ମଧ୍ୟରେ କୋଲକାତାରୁ ସିବିଆଇର ଏକ ଉଚ୍ଚସ୍ତରୀୟ ଟିମ୍ ଭୁବନେଶ୍ୱର ଆସିବ। ଏହାପରେ ସେମାନେ ଭୁବନେଶ୍ୱର ସିବିଆଇ ଟିମ୍ ସହିତ ମାମଲା ସମ୍ପର୍କରେ ଆଲୋଚନା କରିବେ। କିଭଳି ଘଟଣାର ତଦନ୍ତ ପ୍ରକ୍ରିୟାକୁ ଆଗକୁ ବଢ଼ାଯିବ, ସେନେଇ ଏକ ବୈଠକ କରାଯିବ। ସେହିପରି ବିବନଙ୍କ ସମ୍ପର୍କରେ ଅଧିକ ତଥ୍ୟ ହାସଲ କରିବା ପାଇଁ ସିବିଆଇ କମିଶନରେଟ୍ ପୋଲିସର ଆବଶ୍ୟକୀୟ ସାହାଯ୍ୟ ନେବ ବୋଲି ଜଣାପଡ଼ିଛି। ଅନ୍ୟପକ୍ଷରେ ଗିରଫ ବିବନ ଏବେ ଝାରପଡ଼ା ଜେଲ୍ରେ ରହିଥିବାରୁ ସେଠାରେ ସୁରକ୍ଷା ବ୍ୟବସ୍ଥାକୁ କଡ଼ାକଡ଼ି କରାଯାଇଛି।
ପ୍ରକାଶ ଯେ, ୧୯୯୯ ଜାନୁଆରୀ ୯ ତାରିଖରେ କଟକ-ବାରଙ୍ଗ ରାସ୍ତାରେ ଅଞ୍ଜନା ମିଶ୍ରଙ୍କୁ ୩ଜଣ ଦୁର୍ବୃତ୍ତ ଗଣବଳାତ୍କାର କରିଥିଲେ। ଏହି ଘଟଣାରେ ୨ ଜଣ ଗିରଫ ହୋଇଥିବାବେଳେ, ମୁଖ୍ୟ ଅଭିଯୁକ୍ତ ବିବନ ଫେରାର ହୋଇଯାଇଥିଲା। ତେବେ ପୁଣେ ଅଞ୍ଚଳଳରେ ପରିଚୟ ବଦଳାଇ ରହୁଥିଲା ଅଭିଯୁକ୍ତ ବିବନ। ଦୀର୍ଘ ୨୨ ବର୍ଷ ପରେ କୋର୍ଟ ଓ୍ବାରେଣ୍ଟ ବଳରେ କମିଶନରେଟ୍ ପୋଲିସ ଅଭିଯୁକ୍ତ ବିବନଙ୍କୁ ଗିରଫ କରିବାରେ ସଫଳ ହୋଇଛି। ବିବନଙ୍କ ଘର ବାରଙ୍ଗ ଥାନା ଅନ୍ତର୍ଗତ ନରଣପୁର ଗ୍ରାମରେ।
