ଭଞ୍ଜନଗର,୧୩।୨(ଡି.ଏନ.ଏ.): ମହାତ୍ମା ଗାନ୍ଧୀ ଜାତୀୟ ଗ୍ରାମୀଣ ନିଶ୍ଚିତ କର୍ମନିଯୁକ୍ତି ଯୋଜନା (ଏମ୍ଜିଏନ୍ଆରଇଜିଏସ୍) ଆସିବା ପରଠୁ ବେକାରଙ୍କୁ ଆତ୍ମନିଯୁକ୍ତି ଯୋଗାଇବାରେ ପ୍ରମୁଖ ଯୋଜନା ପାଲଟିଛି । ଏହାଦ୍ୱାରା ବେକାରି ସମସ୍ୟା ମଧ୍ୟ କିଛି ମାତ୍ରାରେ କମିଛି। କିନ୍ତୁ ବିଭିନ୍ନ ସମୟରେ ଭିନ୍ନ କାରଣରୁ ଯୋଜନାର ସଫଳ ରୂପାୟନ ହୋଇ ପାରୁନାହିଁ। ତେଣୁ ଯୋଜନାର ସୁଫଳ ଜନସାଧାରଣ ପାଇପାରୁ ନାହାନ୍ତି। ବର୍ତ୍ତମାନ ଉକ୍ତ ଯୋଜନାରେ ନିର୍ଦ୍ଧାରିତ ସମୟରେ କେନ୍ଦ୍ରରୁ ଅର୍ଥ ଆସୁନାହିଁ । ଫଳରେ ଶ୍ରମିକମାନଙ୍କୁ ନିର୍ଦ୍ଧାରିତ ସମୟରେ ପାରିଶ୍ରମିକ ପ୍ରଦାନ କରାଯାଇ ପାରୁନାହିଁ। ପ୍ରତି ୧୫ ଦିନକୁ ଥରେ ଶ୍ରମିକମାନଙ୍କୁ ଜବ୍କାର୍ଡ଼ ମାଧ୍ୟମରେ ପାରିଶ୍ରମିକ ପ୍ରଦାନ ଯୋଜନାରେ ନିୟମ ଅଛି। ଏଥିରେ ଖିଲାପ କଲେ ଦୋଷୀ କର୍ମଚାରୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ନେବା ବ୍ୟବସ୍ଥା ଅଛି ।
ବର୍ତ୍ତମାନ ସରକାର ନିର୍ଦ୍ଧାରିତ ସମୟରେ ଶ୍ରମିକମାନଙ୍କ ଆକାଉଣ୍ଟକୁ ଟଙ୍କା ଛାଡ଼ୁନାହାନ୍ତି । ସରକାର ଓଲଟା ନିୟମ ଉଲ୍ଲଂଘନ କରୁଛନ୍ତି । ବିଗତ କିଛି ବର୍ଷ ହେବ ଏହା ଦେଖିବାକୁ ମିଳୁଛି । ଯାହାକୁ ନେଇ ସାଧାରଣରେ ଅସନ୍ତୋଷ ପ୍ରକାଶ ପାଇଛି। ଡିସେମ୍ବର ଶେଷ ସପ୍ତାହରୁ ବର୍ତ୍ତମାନ ସୁଦ୍ଧା କେନ୍ଦ୍ର ଉକ୍ତ ଯୋଜନାରେ ଅର୍ଥ ଦେଇନାହିଁ । ଫଳରେ ଭଞ୍ଜନଗର ବ୍ଲକର ଶ୍ରମିକମାନଙ୍କ ପାରିଶ୍ରମିକ ବାବଦକୁ ଏକ କୋଟିରୁ ଊର୍ଦ୍ଧ୍ୱ ଟଙ୍କା ପ୍ରଦାନ କରାଯାଇ ପାରିନାହିଁ । ଏଥିସହ ବନ ବିଭାଗରେ ମଧ୍ୟ ହୋଇଥିବା କାମର ପାରିଶ୍ରମିକ ଶ୍ରମିକମାନଙ୍କୁ ପ୍ରଦାନ କରାଯାଇ ପାରିନାହିଁ । ଅର୍ଥ ଠିକ୍ ଭାବେ ଆସୁ ନ ଥିବା ଯୋଗୁ ଶ୍ରମିକମାନଙ୍କ କାମ ପ୍ରତି ଆଗ୍ରହ କମିଯାଉଛି । ବିଗତ ୬ ମାସରୁ ଊର୍ଦ୍ଧ୍ୱ ଦିନ ହେବ ଉକ୍ତ ଯୋଜନାରେ ସରକାର ଏସ୍ସି, ଏସ୍ଟି, ଅନ୍ୟାନ୍ୟ ଜାତି ଭିତ୍ତିରେ ପାରିଶ୍ରମିକ ଅର୍ଥ ପ୍ରଦାନ କରୁଛନ୍ତି । କେତେବେଳେ କେଉଁ ଜାତିକୁ ପ୍ରଥମେ ବକେୟା ପାରିଶ୍ରମିକ ଅର୍ଥ ପ୍ରଦାନ କରୁଛନ୍ତି ।
ସୂଚନା ଅନୁଯାୟୀ, ଗତ ଡିସେମ୍ବର ୨୭ରେ ଶ୍ରମିକମାନଙ୍କ ଆକାଉଣ୍ଟକୁ ଟଙ୍କା ଯାଇଥିଲା । ଅନ୍ୟପଟେ ବନ ବିଭାଗ କର୍ମଚାରୀ ମଧ୍ୟ ବିଭିନ୍ନ କାରଣ ଦର୍ଶାଇ ଉକ୍ତ ଯୋଜନାରେ କାମ କରିବାକୁ ଅନାଗ୍ରହ ପ୍ରଦର୍ଶନ କରୁଛନ୍ତି । ବନ ବିଭାଗରେ ଉକ୍ତ ଯୋଜନା ମନ୍ଥର ଗତିରେ ଚାଲିଥିବାକୁ ନେଇ ବିଭାଗୀୟ ଉଚ୍ଚ କତ୍ତର୍ର୍ୃପକ୍ଷ ଅସନ୍ତୋଷ ବ୍ୟକ୍ତ କରିଛନ୍ତି। ବନ ବିଭାଗରେ ଅଧିକରୁ ଅଧିକ ଶ୍ରମ ଦିବସ କିଭଳି ସୃଷ୍ଟି କରାଯାଇ ପାରିବ ସେନେଇ ଶୁକ୍ରବାର ସ୍ଥାନୀୟ ନର୍ସରୀ ପରିସରରେ ଏକ ସମୀକ୍ଷା ବୈଠକ ହୋଇଥିଲା । ବୈଠକରେ ଡିଏଫ୍ଓ ଅଭୟ କାନ୍ତ ଦଳେଇ ଅଧ୍ୟକ୍ଷତା କରି ଯୋଜନାର ସଫଳ ରୂପାୟନ ସହ ଅଧିକରୁ ଅଧିକ ଲୋକଙ୍କୁ କିଭଳି କର୍ମନିଯୁକ୍ତି ମିଳିପାରିବ ସେ ଉପରେ କହିଥିଲେ। ଏନେଇ ବିଡିଓ ଅନିଲ କୁମାର ସେଠୀଙ୍କ ସହ ଯୋଗାଯୋଗ କରିବାରୁ ସେ କହିଛନ୍ତି, ଟଙ୍କା ଯେତେବେଳେ ଆସୁଛି ସେତେବେଳେ ଶ୍ରମିକମାନଙ୍କ ଆକାଉଣ୍ଟକୁ ଛଡ଼ାଯାଉଛି ।