ଭୁବନେଶ୍ୱର, ୩ା୫(ବ୍ୟୁରୋ):ମୟୂରଭଞ୍ଜସ୍ଥିତ ସରକାରୀ ପଲିଟେକ୍ନିକ୍ରେ ଆଡ୍ଭାନ୍ସ ମେକାଟ୍ରୋନିକ୍ସ ଉତ୍କର୍ଷ କେନ୍ଦ୍ର ପ୍ରତିଷ୍ଠା କରାଯିବ। ପ୍ରାୟ ୪.୧୮ କୋଟି ଟଙ୍କା ବ୍ୟୟରେ ହେବାକୁ ଥିବା ଏହି ଉତ୍କର୍ଷ କେନ୍ଦ୍ର ୬ମାସ ମଧ୍ୟରେ କାର୍ଯ୍ୟକ୍ଷମ ହେବ। ଏଥିନିମନ୍ତେ ସୋମବାର ରାଜ୍ୟ ବୈଷୟିକ ଶିକ୍ଷା ଓ ପ୍ରଶିକ୍ଷଣ ନିର୍ଦ୍ଦେଶାଳୟ ଏବଂ ଫେଷ୍ଟୋ ଇଣ୍ଡିଆ ପ୍ରାଇଭେଟ ଲିମିଟେଡ୍ ମଧ୍ୟରେ ଏକ ଚୁକ୍ତିନାମା ସ୍ବାକ୍ଷାରିତ ହୋଇଛି। ଚୁକ୍ତିନାମାରେ ବୈଷୟିକ ଶିକ୍ଷା ଏବଂ ପ୍ରଶିକ୍ଷଣ ନିର୍ଦ୍ଦେଶକ ରେଘୁ ଜି ଓ ଫେଷ୍ଟୋ ଇଣ୍ଡିଆ ପ୍ରାଇଭେଟ ଲିମିଟେଡ ଡିଡାକ୍ଟିକ ମୁଖ୍ୟ ହରିଶ ନଚନାନି ସ୍ବାକ୍ଷର କରିଛନ୍ତି।
ବିଭିନ୍ନ ଉତ୍ପାଦ ତଥା ପ୍ରକ୍ରିୟାକରଣର ଡିଜାଇନ୍ରେ ଇଲେକ୍ଟ୍ରିକାଲ ଓ ମେକାନିକାଲ ଇଞ୍ଜିନିୟରିଂ, ରୋବୋଟିକ୍ସ, କମ୍ପ୍ୟୁଟେଶନାଲ ହାର୍ଡୱେର ଏବଂ ସଫ୍ଟୱେର ସମନ୍ବିତ ଯାନ୍ତ୍ରିକ ବିଦ୍ୟାକୁ ମେକାଟ୍ରୋନିକ୍ସ କୁହାଯାଏ। ଇଞ୍ଜିନିୟରିଂ ଶିକ୍ଷା ତଥା ଆଧୁନିକ ଶିଳ୍ପ ଆବଶ୍ୟକତା, ଉତ୍ତମ ଧନ୍ଦାମୂଳକ ପ୍ରଶିକ୍ଷଣ, ଯନ୍ତ୍ରପାତିର ଉନ୍ନତି, ଗବେଷଣାଗାର ତଥା ପ୍ରଶିକ୍ଷକଙ୍କ ଦକ୍ଷତା ବୃଦ୍ଧିକୁ ଦୃଷ୍ଟିରେ ରଖି ଏହି ମେକାଟ୍ରୋନିକ୍ସ ଉତ୍କର୍ଷ କେନ୍ଦ୍ର ଆରମ୍ଭ ହେବ। ଏହି କେନ୍ଦ୍ର ନିମନ୍ତେ ଓଡ଼ିଶା ଖଣିଜ ଅଞ୍ଚଳ ଉନ୍ନୟନ ନିଗମ ପକ୍ଷରୁ ବେରୋଜଗାର ଯୁବପିଢ଼ିଙ୍କ ଦକ୍ଷତା ବିକାଶ ପାଇଁ ରହିଥିବା ପାଣ୍ଠିକୁ ବିନିଯୋଗ କରାଯିବ। ଏହି ଉତ୍କର୍ଷ କେନ୍ଦ୍ର ନିକଟସ୍ଥ ଶିଳ୍ପଗୁଡ଼ିକର ଆବଶ୍ୟକତାକୁ ପୂରଣ କରିବା ସହ ମେକାଟ୍ରୋନିକ୍ସ ଏବଂ ଅଟୋମେଶନ କ୍ଷେତ୍ରରେ ଆଇଟିଆଇ ତଥା ଡିପ୍ଲୋମା ଛାତ୍ରୀଛାତ୍ରଙ୍କ ଦକ୍ଷତାକୁ ମଧ୍ୟ ବୃଦ୍ଧି କରିବ। ସେହିପରି ନିକଟରେ ଥିବା ଇଞ୍ଜିନିୟରିଂ କଲେଜ ଏବଂ ପଲିଟେକ୍ନିକ୍ର ଛାତ୍ରୀଛାତ୍ର ମଧ୍ୟ ସ୍ବଳ୍ପକାଳୀନ ତାଲିମ ଦ୍ୱାରା ଉପକୃତ ହେବେ। ଫେଷ୍ଟୋ ଇଣ୍ଡିଆ ପ୍ରାଇଭେଟ ଲିମିଟେଡ୍ର ବୈଷୟିକ ବିଶେଷଜ୍ଞଙ୍କ ଦ୍ୱାରା ତାଲିମ ପ୍ରଦାନ କରାଯିବ। ଏହି ଉତ୍କର୍ଷ କେନ୍ଦ୍ର ଫିଟର ଟ୍ରେଡ୍ରେ ଅନ୍ୟାନ୍ୟ ସରକାରୀ ଓ ବେସରକାରୀ ଆଇଟିଆଇରେ ପଲିଟେକ୍ନିକ୍ର ପ୍ରଶିକ୍ଷକଙ୍କ ପ୍ରଶିକ୍ଷଣ (ଟିଓଟି) ଏବଂ ଅନ୍ ଜବ୍ ଟ୍ରେନିଂ (ଓଜେଟି) ମଧ୍ୟ ଆୟୋଜନ କରିବ।
