ନୂଆଦିଲ୍ଲୀ,୧୦ା୨: କେନ୍ଦ୍ର ସରକାର ଗତ ୫ ବର୍ଷ ମଧ୍ୟରେ ବିଭିନ୍ନ ପ୍ରିଣ୍ଟ ଓ ଇଲେକ୍ଟ୍ରୋନିକ୍ ଗଣମାଧ୍ୟମରେ ବିଜ୍ଞାପନ ବାବଦକୁ ୨,୫୦୦ କୋଟି ଟଙ୍କା ଖର୍ଚ୍ଚ କରିଛନ୍ତି। ଅନ୍ୟ ବିଜ୍ଞାପନ ଖର୍ଚ୍ଚକୁ ମିଶାଇଲେ ଏହା ପ୍ରାୟ ୨,୬୦୨ କୋଟି ଟଙ୍କା ହେବ ବୋଲି ଗୁରୁବାର ସୂଚନା ଓ ପ୍ରସାରଣ ମନ୍ତ୍ରଣାଳୟ ପକ୍ଷରୁ ପାର୍ଲାମେଣ୍ଟକୁ ଅବଗତ କରାଯାଇଛି। ରାଜ୍ୟ ସଭାରେ ପଚରାଯାଇଥିବା ଏକ ପ୍ରଶ୍ନର ଲିଖିତ ଉତ୍ତରରେ ସୂଚନା ଓ ପ୍ରସାରଣ ମନ୍ତ୍ରୀ ଅନୁରାଗ ଠାକୁର କହିଥିଲେ, ସରକାର ୨୦୧୭-୧୮ରୁ ଅଦ୍ୟାବଧି ମୁଦ୍ରଣ ଓ ବୈଦ୍ୟୁତିକ ଗଣମାଧ୍ୟମଗୁଡ଼ିକୁ ୨,୬୦୧.୯୮ କୋଟି ଟଙ୍କାର ବିଜ୍ଞାପନ ଦେଇଛନ୍ତି। ୫ ବର୍ଷରେ ପ୍ରିଣ୍ଟ ମିଡିଆରେ ୧,୬୫୪.୫୭ କୋଟି ଟଙ୍କା ଖର୍ଚ୍ଚ ହୋଇଛି। ୨୦୨୧-୨୨ରେ ୫,୬୦୮ ଖବରକାଗଜକୁ ବିଜ୍ଞାପନ ବାବଦରେ ଅଦ୍ୟାବଧି ୯୬.୩୯ କୋଟି ଟଙ୍କା ଦିଆଯାଇଛି। ୨୦୨୦-୨୧ରେ ୫,୨୧୧ ଖବରକାଗଜକୁ ୧୯୭.୪୯ କୋଟି ଟଙ୍କାର ବିଜ୍ଞାପନ ଦିଆଯାଇଥିବାବେଳେ ୨୦୧୯-୨୦ରେ ୫,୩୨୬ ଖବରକାଗଜକୁ ୨୯୫.୦୫ କୋଟି ଟଙ୍କା ପଇଠ କରାଯାଇଥିଲା। ସେହିପରି ୨୦୧୮-୧୯ରେ ୫,୬୩୧ ଖବରକାଗଜକୁ ୪୨୯.୫୫ କୋଟି ଏବଂ ୨୦୧୭-୧୮ରେ ୬,୭୮୨ ନ୍ୟୁଜପେପରକୁ ୬୩୬ କୋଟି ଟଙ୍କା ବିଜ୍ଞାପନ ବାବଦରେ ଦିଆଯାଇଥିଲା। କେନ୍ଦ୍ରମନ୍ତ୍ରୀ ଆହୁରି କହିଥିଲେ, ଗତ ୫ ବର୍ଷ ମଧ୍ୟରେ ୧,୩୧୮ ଟିଭି ଚ୍ୟାନେଲକୁ ୪୭୯.୬୧ କୋଟି ଟଙ୍କାର ବିଜ୍ଞାପନ ଦିଆଯାଇଥିଲା। ଏହି ଅବଧି ମଧ୍ୟରେ ୧,୬୯୪ଟି ଏଫ୍ଏମ୍ ରେଡିଓ ଚ୍ୟାନେଲ ୪୬୦.୬୦ କୋଟି ଟଙ୍କାର ବିଜ୍ଞାପନ ପାଇଛନ୍ତି। ସେହିପରି ୨୦୦୭ରୁ ବର୍ତ୍ତମାନ ସୁଦ୍ଧା ସାମାଜିକ ଗଣମାଧ୍ୟମରେ କେନ୍ଦ୍ର ସରକାର ୭.୨୦ କୋଟି ଟଙ୍କା ବିଜ୍ଞାପନ ବାବଦରେ ଖର୍ଚ୍ଚ କରିଛନ୍ତି ବୋଲି କେନ୍ଦ୍ରମନ୍ତ୍ରୀ ଅନୁରାଗ ଠାକୁର ଗୃହକୁ ଅବଗତ କରାଇଛନ୍ତି।