ଭୁବନେଶ୍ୱର,୧୩।୧୨ (ବ୍ୟୁରୋ)/କେନ୍ଦ୍ରାପଡ଼ା ଅଫିସ/ଜଗତ୍ସିଂହପୁର ଅଫିସ ବାତ୍ୟା ‘ଜୱାଦ’ଜନିତ ବର୍ଷାରେ ରାଜ୍ୟରେ ବ୍ୟାପକ ଫସଲ ନଷ୍ଟ ହୋଇଛି। ଏହି କ୍ଷୟକ୍ଷତି ଆକଳନ ପାଇଁ ଓଡ଼ିଶା ଆସିଥିବା କେନ୍ଦ୍ରୀୟ ଟିମ୍ ରବିବାର କେନ୍ଦ୍ରାପଡ଼ା ଓ ଜଗତ୍ସିଂହପୁର ଜିଲାକୁ ଯାଇ ସ୍ଥିତି ପରଖିଛି। କେନ୍ଦ୍ରୀୟ ଅଧିକାରୀମାନେ କ୍ଷତିଗ୍ରସ୍ତ ଚାଷୀଙ୍କ ସହ ଆଲୋଚନା କରିବା ସହିତ ସହାୟତା ପାଇଁ ଆଶ୍ୱାସନା ଦେଇଛନ୍ତି।
ଗୋଟିଏ ଟିମ୍ କେନ୍ଦ୍ରାପଡ଼ାର ପଟ୍ଟାମୁଣ୍ଡାଇ, ରାଜନଗର, ମାର୍ଶାଘାଇ ଓ ଗରଦପୁର ବ୍ଲକ ଅଞ୍ଚଳରେ ବୁଲି ବର୍ଷାଜନିତ କ୍ଷୟକ୍ଷତି ଆକଳନ କରିଛନ୍ତି। କେତେକ ବିଲରେ ଧାନ ପଚି ଯାଇଥିବାବେଳେ ଆଉ କେତେକ ସ୍ଥାନରେ ଗଜା ହୋଇଥିଲା। ସେହିପରି ପରିବା ଚାଷ ବି କ୍ଷତିଗ୍ରସ୍ତ ହୋଇଥିଲା। ଚାଷୀମାନେ ଏସବୁ ନଷ୍ଟ ଫସଲକୁ ଅନୁଧ୍ୟାନକାରୀ ପ୍ରଶାସନିକ ଅଧିକାରୀଙ୍କୁ ଦେଖାଇଥିଲେ। ଏଥିସହ ଋଣ ଶୁଝିବା ଏବେ କଷ୍ଟକର ହେବ ବୋଲି ଚାଷୀମାନେ ଦୁଃଖ ପ୍ରକାଶ କରି କହୁଥିବା ଦେଖିବାକୁ ମିଳିଥିଲା। ପୂର୍ବାହ୍ନ ୧୦ଟାରେ କେନ୍ଦ୍ରୀୟ ଟିମ୍ର ପ୍ରଶାସନିକ ଅଧିକାରୀ ଡ. ମାନସ ଚନ୍ଦ୍ର ସିହ୍ନା, ଶାଶ୍ୱତ କୁମାର ମହାପାତ୍ରଙ୍କ ସହ ରାଜ୍ୟ ମୃତ୍ତିକା ସଂରକ୍ଷଣ ବିଭାଗ ନିର୍ଦ୍ଦେଶକ ହେମନ୍ତ କୁମାର ପଣ୍ଡା, କୃଷି ବିଭାଗ ସହକାରୀ ନିର୍ଦ୍ଦେଶକ ବ୍ରଜକିଶୋର ଲେଙ୍କା କେନ୍ଦ୍ରାପଡ଼ା ଜିଲା ସର୍କିଟ ହାଉସ୍ରେ ପହଞ୍ଚତ୍ଥିଲେ। ସେଠାରୁ ଏଡିଏମ୍ ଦୁର୍ଗାପ୍ରସାଦ ମହାରଣା, ଏଡିଏମ୍ ପୀତାମ୍ବର ସାମଲ, ଉପଜିଲାପାଳ ନିରଞ୍ଜନ ବେହେରା ପ୍ରମୁଖଙ୍କ ସହ କ୍ଷେତ୍ର ପରିଦର୍ଶନ କରିଥିଲେ।
ସେହିପରି ଆଉଏକ ଟିମ୍ ଜଗତ୍ସିଂହପୁର ଜିଲା ଯାଇଥିଲେ। ଏହି ଟିମ୍ରେ ଅର୍ଥ ମନ୍ତ୍ରଣାଳୟର ବରିଷ୍ଠ ଅଧିକାରୀ ଆର୍.ବି. କାଉଲ ଓ କୃଷି ମନ୍ତ୍ରଣାଳୟର ବରିଷ୍ଠ ଅଧିକାରୀ ଡ. ମାନସିଂହ ଥିଲେ। ଏମାନଙ୍କ ସହିତ ଓଡ଼ିଶା ଉଦ୍ୟାନ କୃଷି ବିଭାଗର ନିର୍ଦ୍ଦେଶକ ରୋହିତ ଲେଙ୍କା, ଜିଲାର କୃଷି ଓ ଉଦ୍ୟାନ ବିଭାଗ ଅଧିକାରୀମାନେ ଉପସ୍ଥିତ ଥିଲେ। ସେମାନେ ତିର୍ତ୍ତୋଲ ବ୍ଲକର ମଣିଜଙ୍ଗା, ନିମକଣା, ବୋଧେଇ, କୃଷ୍ଣଚନ୍ଦ୍ରପୁର, ଏରସମା ବ୍ଲକର ନିମୋଳ, କୋଠି, କୁଜଙ୍ଗ ବ୍ଲକର ବାଲିଆ, ଜିଲାନାସୀ ପଞ୍ଚାୟତର ଜୟଶଙ୍ଖପୁର ସହ ତାଳଦଣ୍ଡା ଅଞ୍ଚଳର କ୍ଷତିଗ୍ରସ୍ତ ଧାନ, ଅଣଧାନ (ଚିନାବାଦାମ) ଓ ପନିପରିବା ଫସଲର ସ୍ଥିତି ଦେଖିଥିଲେ। ପ୍ରତିନିଧି ଦଳ ଚାଷୀଙ୍କୁ ଭେଟି କ୍ଷୟକ୍ଷତି ସମ୍ପର୍କରେ ପଚାରି ବୁଝିଥିଲେ। ଏସବୁ ଦେଖିଲା ପରେ ଚାଷୀମାନଙ୍କୁ ସରକାରୀ ସହାୟତା ପ୍ରଦାନ ନିମନ୍ତେ ପଦକ୍ଷେପ ଗ୍ରହଣ କରାଯିବ ବୋଲି ପ୍ରତିଶ୍ରୁତି ଦେଇଥିବା ଜିଲା ପ୍ରଶାସନ ପକ୍ଷରୁ ସୂଚନା ଦିଆଯାଇଛି।
ସୂଚନାଯୋଗ୍ୟ, ବାତ୍ୟା ପ୍ରଭାବରେ ଉପକୂଳ ଜିଲାରେ ପ୍ରବଳ ବର୍ଷା ହୋଇଥିବାବେଳେ ଜଗତ୍ସିଂହପୁରରେ ଅଧିକ ବର୍ଷିଥିଲା। ଅମଳ ସମୟରେ ଏହି ବର୍ଷାରେ ବ୍ୟାପକ ଫସଲ ନଷ୍ଟ ହୋଇଥିଲା। କ୍ଷୟକ୍ଷତି ଆକଳନ କରିବା ପାଇଁ କେନ୍ଦ୍ରୀୟ ଟିମ୍ ଦୁଇଦିନିଆ ଗସ୍ତରେ ଓଡ଼ିଶା ଆସିଛନ୍ତି। ୬ଟି ଜିଲା କ୍ଷେତ୍ର ପରିଦର୍ଶନ କରି ସୋମବାର ରାଜ୍ୟ ସରକାରଙ୍କ ସହ ଆଲୋଚନା କରିବାର କାର୍ଯ୍ୟକ୍ରମ ରହିଛି।