ଖୋର୍ଦ୍ଧା ଅଫିସ,୨୪ା୩: ଖୋର୍ଦ୍ଧା ଜିଲାରେ ଚଳିତ ଖରିଫ ଧାନକିଣାରେ ବ୍ୟାପକ ଅନିୟମିତତା ହୋଇଛି। ଶତାଧିକ ପଞ୍ଜୀକୃତ ଚାଷୀ ଧାନ ବିକ୍ରି କରି ନ ପାରି ଅଭାବୀ ବିକ୍ରିର ସମ୍ମୁଖୀନ ହେଉଛନ୍ତି। ନକଲିି ଚାଷୀଙ୍କଠାରୁ ଶତାଧିକ କୁଇଣ୍ଟାଲ ଧାନ କିଣାଯାଇଛି। ଧାନକିଣା ଦୁର୍ନୀତିରେ ଅଭିଯୋଗ ଆସିଥିବା କେତେଜଣ ସମିତି ସମ୍ପାଦକଙ୍କ ବିରୋଧରେ କାର୍ଯ୍ୟାନୁଷ୍ଠାନ ପରିବର୍ତ୍ତେ ଜିଲା ପ୍ରଶାସନ, ସମବାୟ ସଂସ୍ଥା ଏବଂ ଜିଲା ଯୋଗାଣ ବିଭାଗର ନୀରବତାକୁ ନେଇ ସାଧାରଣରେ ପ୍ରଶ୍ନବାଚୀ ସୃଷ୍ଟି ହୋଇଛି। ଅନ୍ୟପଟେ ଅଭିଯୋଗ ଆସିଥିବା ସମିତି ସମ୍ପାଦକଙ୍କୁ ତଦନ୍ତ ପରିସରଭୁକ୍ତ କରିବା ପରିବର୍ତ୍ତେ ଯୋଗାଣ ବିଭାଗର କେତେଜଣ ଅଧିକାରୀ ତାଙ୍କୁ କାର୍ଯ୍ୟାଳୟକୁ ଡାକି ଘଣ୍ଟ ଘୋଡାଉଥିବା ଚର୍ଚ୍ଚା ହେଉଛି।
ସୂଚନାଥାଉ କି, ଜଟଣୀ ବ୍ଲକ ଅଙ୍ଗାରପଡା ପ୍ରାଥମିକ ସେବା ସମବାୟ ସମିତି (ପ୍ୟାକ୍ସ)ରେ ଗୋଚର ଜମି, ଅନାବାଦି ଜମି, ରକ୍ଷିତ ପତିତ ଜମି, ଜଙ୍ଗଲ ଜମିକୁ ଚାଷ ଜମି ଏବଂ କେନାଲ ନଥିବା ମୌଜାରେ କେନାଲ ଦର୍ଶାଇ ନକଲିି ଚାଷୀଙ୍କ ନଁାରେ ଶତାଧିକ କୁଇଣ୍ଟାଲ ଧାନ କିଣାଯାଇଥିବା ନେଇ ଚାଷୀ ଜିଲାପାଳଙ୍କ ଦୃଷ୍ଟି ଆକର୍ଷଣ କରିଥିଲେ। ଜିଲାପାଳ ଏହି ଘଟଣାର ତଦନ୍ତ ଲାଗି ଜିଲା ଯୋଗାଣ ଅଧିକାରୀଙ୍କ ତଦନ୍ତ ନିର୍ଦ୍ଦେଶ ଦେଇଥିଲେ। ଏହାର ତଦନ୍ତ ଶୀତଳଭଣ୍ଡାରରେ ରହିଛି। ସେହିପରି ବୋଲଗଡ଼ ବ୍ଲକ ଶ୍ରୀଚନ୍ଦନପୁରପାଟଣା ପ୍ୟାକ୍ସରେ ଅନିୟମିତତା ନେଇ ଚାଷୀ ଜିଲାପାଳଙ୍କ ନିକଟରେ ଅଭିଯୋଗ କରିଥିଲେ। ଏହି ଘଟଣାର ମଧ୍ୟ ଜିଲାପାଳ ଜିଲା ଯୋଗାଣ ଅଧିକାରୀଙ୍କୁ ତଦନ୍ତ ଦାୟିତ୍ୱ ଦେଇଥିଲେ। ପରେ ଏହି ବ୍ଲକ ଅନ୍ତର୍ଗତ ଅସରଳା ପ୍ୟାକ୍ସରେ ଜନୈକ ବ୍ୟକ୍ତି ପରିବାରର ୧୨ଜଣ ସଦସ୍ୟଙ୍କ ନାମରେ ଶ୍ରୀଜଗନ୍ନାଥ ଜମି ନିଜ ଚାଷଜମି ଦର୍ଶାଇ ୭୦ କୁଇଣ୍ଟାଲ ଧାନ ବିକ୍ରି କରିଥିବା ନେଇ ଚାଷୀ ଜିଲାପାଳଙ୍କ ନିକଟରେ ଅଭିଯୋଗ କରିଛନ୍ତି। ଏହି ଦୁଇ ଘଟଣାରେ ବେଗୁନିଆ ବିଧାୟକ ରାଜେନ୍ଦ୍ର ସାହୁ ଅସନ୍ତୋଷ ପ୍ରକାଶ କରିଛନ୍ତି। ବୋଲଗଡ ବ୍ଲକର ଏହି ଦୁଇ ପ୍ୟାକ୍ସ ବିରୋଧରେ ଆସିଥିବା ଘଟଣାର ତଦନ୍ତ ଲାଗି ଜିଲାପାଳଙ୍କୁ କହିଥିଲେ। ଘଟଣାର ତଦନ୍ତ କରାଯିବ ବୋଲି ଜିଲାପାଳ ସନତ ମହାନ୍ତି କହିଛନ୍ତି। ଅନ୍ୟପକ୍ଷେ ଚାଷୀଙ୍କ ସମସ୍ୟା ସମାଧାନ ଉପରେ ଗୁରୁତ୍ୱ ଦିଆଯାଉଛି ବୋଲି ଯୋଗାଣ ଅଧିକାରୀ ଅନାଥ ସ୍ବାଇଁ କହିଛନ୍ତି।