ଭୁବନେଶ୍ୱର,୧୪।୬(ବ୍ୟୁରୋ):ଅର୍ଥ ପାଇଁ ବିଭିନ୍ନ ରାଜ୍ୟର ୧୭ରୁ ଅଧିକ ମହିଳାଙ୍କୁ ବିବାହ ପରେ ଠକେଇ ଓ ପ୍ରତାରଣା କରି ଜେଲରେ ଥିବା ନକଲି ଡାକ୍ତର ରମେଶ ଚନ୍ଦ୍ର ସ୍ବାଇଁଙ୍କ ବିରୋଧରେ ମହିଳା ଥାନା ପୋଲିସ ସୋମବାର ଭୁବନେଶ୍ୱର ଏସ୍ଡିଜେଏମ୍ କୋର୍ଟରେ ଚାର୍ଜଶିଟ୍ ଦାଖଲ କରିଛି। ଏନେଇ ମହିଳା ଥାନା ଅଧିକାରିଣୀ ସନ୍ତୋଷିନୀ ବେହେରା ସୂଚନା ଦେଇଛନ୍ତି। ଉକ୍ତ ଚାର୍ଜଶିଟରେ ରମେଶଙ୍କ ସହ ଜେଲରେ ଥିବା ଦ୍ୱିତୀୟ ସ୍ତ୍ରୀ କମଳା ସ୍ବାଇଁ, ଭଉଣୀ ରଶ୍ମିତା ବେଉରା, ଡ୍ରାଇଭର ଚିତ୍ତରଞ୍ଜନ ପଟ୍ଟନାୟକ ଓ ମୁଖ୍ୟ ସହଯୋଗୀ ବିଶ୍ୱରଞ୍ଜନ ଦାଶଙ୍କ ନାଁ ରହିଛି। ତଦନ୍ତ ସମୟରେ ପୋଲିସ ସମସ୍ତ ସ୍ତ୍ରୀଙ୍କ ସମେତ ୧୦୩ ଜଣଙ୍କ ବୟାନ ରେକର୍ଡ କରିଛି। ଏବେ ତଦନ୍ତ ଚାଲୁଥିବା ଏବଂ ମାମଲାର ତଦନ୍ତ ପ୍ରକ୍ରିୟା ଖୋଲାଥିବାରୁ ଆବଶ୍ୟକ ପଡ଼ିଲେ ଅଭିଯୁକ୍ତଙ୍କ ବିରୋଧରେ ପୁଣି ଥରେ ଚାର୍ଜଶିଟ ଦାଖଲ କରାଯିବ ବୋଲି ଥାନା ଅଧିକରିଣୀ ବେହେରା କହିଛନ୍ତି।
ସୂଚନା ଅନୁଯାୟୀ, ରମେଶ ମାଟ୍ରିମୋନିଆଲ୍ ସାଇଟ୍ରେ ବିଭିନ୍ନ ଉଚ୍ଚଶିକ୍ଷିତା ମହିଳାଙ୍କୁ ଫସାଇ ବିବାହ କରୁଥିଲେ। ପରବର୍ତ୍ତୀ ସମୟରେ ଟଙ୍କା, ସୁନା ଓ ସମ୍ପତ୍ତି ଲୁଟୁଥିଲେ। ଏନେଇ ରମେଶଙ୍କ ଭିଣୋଇ ଗଣେଶ୍ୱର ବେଉରା, ଭଉଣୀ ରଶ୍ମିତା, ଡ୍ରାଇଭର ଚିତ୍ତରଞ୍ଜନ, ଦ୍ୱିତୀୟ ସ୍ତ୍ରୀ କମଳା ଓ ମୁଖ୍ୟ ସହଯୋଗୀ ବିଶ୍ୱରଞ୍ଜନ ସହଯୋଗ କରୁଥିଲେ। ତାଙ୍କ ଦ୍ୱାରା ପ୍ରତାରଣାର ଶିକାର ହୋଇଥିବା ଦିଲ୍ଲୀର ଜଣେ ମହିଳା ଗତବର୍ଷ ଜୁଲାଇରେ ଭୁବନେଶ୍ୱର ମହିଳା ଥାନାରେ ଅଭିଯୋଗ କରିଥିଲେ। ଫେବୃୟାରୀ ୧୪ରେ ରମେଶଙ୍କୁ ଗିରଫ କରାଯାଇଥିଲା। ତଦନ୍ତରୁ ରମେଶଙ୍କ କଳା କାରନାମା ପଦାକୁ ଆସିଥିଲା। ଏଥିସହ ଚାକିରି ଓ ଡାକ୍ତରୀ ପାଠରେ ନାମଲେଖା ପାଇଁ ଲକ୍ଷାଧିକ ଟଙ୍କା ଠକେଇ କରିଥିବା ମଧ୍ୟ ଅଭିଯୋଗ ହୋଇଥିଲା। ଏହାପରେ ଅନ୍ୟମାନେ ଗିରଫ ହୋଇଥିଲେ। ଜେଲରୁ ରମେଶଙ୍କ ସହ ଅନ୍ୟମାନଙ୍କୁ ରିମାଣ୍ଡରେ ଅଣାଯାଇ ତଥ୍ୟ ହାସଲ କରାଯାଇଥିଲା।