ଭୁବନେଶ୍ୱର, ୧୨। ୭ (ବ୍ୟୁରୋ):ଆଜି ବିଶ୍ୱ ପ୍ରସିଦ୍ଧ ପବିତ୍ର ରଥଯାତ୍ରା। କୋଟି ଓଡ଼ିଆଙ୍କ ପ୍ରାଣର ଦେବତା ପ୍ରଭୁ ଶ୍ରୀଜଗନ୍ନାଥଙ୍କ ସବୁଠାରୁ ବଡ଼ ପର୍ବ। ପ୍ରତିବର୍ଷ ଏହି ତିଥିରେ ଚତୁର୍ଦ୍ଧାମୂର୍ତ୍ତି ରଥାରୂଢ଼ ହୋଇ ଭକ୍ତଙ୍କୁ ଦର୍ଶନ ଦେଇଥାନ୍ତି। ମାତ୍ର କରୋନା ମହାମାରୀ ପାଇଁ ଦୁଇବର୍ଷ ଧରି ବିନା ଭକ୍ତରେ ରଥଯାତ୍ରା ଅନୁଷ୍ଠିତ ହେଉଛି। ଚଳିତ ବର୍ଷ କେବଳ ପୁରୀରେ ରଥଯାତ୍ରା ପାଳନ ପାଇଁ ଅନୁମତି ଦିଆଯାଇଛି। ତେଣୁ ରାଜଧାନୀରେ ଗଡ଼ିବନି ରଥ। ତେଣୁ କୌଣସି ଜଗନ୍ନାଥ ମନ୍ଦିରରେ ରଥଯାତ୍ରା ପାଇଁ ପ୍ରସ୍ତୁତି ହୋଇନାହିଁ। କେବଳ ପରମ୍ପରା ପାଳନ ପୂର୍ବକ ନିରାଡମ୍ବର ଭାବେ ରଥଯାତ୍ରା ପାଳନ କରାଯିବ। ଏଥିପାଇଁ ସ୍ବତନ୍ତ୍ର ବ୍ୟବସ୍ଥା ହୋଇଛି ବୋଲି ଇସ୍କନ ମନ୍ଦିରର ସହସଭାପତି ଉପେନ୍ଦ୍ର ମିଶ୍ର ସୂଚନା ଦେଇଛନ୍ତି।
ତାଙ୍କ ସୂଚନାନୁସାରେ, ମହାପ୍ରଭୁଙ୍କ ରଥଯାତ୍ରା ମନ୍ଦିର ଭିତରେ କୋଭିଡ୍ କଟକଣା ମଧ୍ୟରେ ଅନୁଷ୍ଠିତ ହେବ। ଶଗଡ଼ ରଥ ସହ ମନ୍ଦିର ଭିତରେ ଥିବା ପ୍ରସାଦ ହଲ୍ରେ ଅସ୍ଥାୟୀ ଗୁଣ୍ଡିଚା ମନ୍ଦିର ତିଆରି ହୋଇଛି। ପ୍ରାତଃ ୪ଟାରେ ଶ୍ରୀବିଗ୍ରହଙ୍କ ମଙ୍ଗଳ ଆଳତି କରାଯିବ। ସକାଳ ୭ଟାରେ ଦର୍ଶନ ଆଳତି ଓ ୧୨ରେ ମଧ୍ୟାହ୍ନ ଆରତି ହେବ। ଅପରାହ୍ନ ୩ଟା ୪୫ରେ ଠାକୁରଙ୍କ ପହଣ୍ଡି କରାଯାଇ ରଥାରୂଢ଼ କରାଯିବ। ରଥରେ ପୋଡ଼ପିଠା ସହ ଅନ୍ୟାନ୍ୟ ପିଠା ଓ ମିଠା ଭୋଗଲାଗି କରାଯିବ। ଏହାପରେ ରଥରେ ବସାଇ କୀର୍ତ୍ତନ କରି ତିନି ଠାକୁରଙ୍କୁ ଅସ୍ଥାୟୀ ଗୁଣ୍ଡିଚା ମନ୍ଦିରକୁ ନିଆଯିବ। ଏହାପରେ ସନ୍ଧ୍ୟା ୬ଟା ସୁଦ୍ଧା ଚତୁର୍ଦ୍ଧାମୂର୍ତ୍ତି ବେଦିରେ ବସିବେ। ପରେ ଗୁଣ୍ଡିଚା ମନ୍ଦିରରେ ଭୋଗ ଲାଗି କରି ୬ଟା ୪୫ ବେଳକୁ ସନ୍ଧ୍ୟା ଆଳତି କରାଯିବ। ୯ ଦିନ ଯାଏ ଠାକୁର ଗୁଣ୍ଡିଚା ମନ୍ଦିରରେ ରହିବେ। ପ୍ରତିଦିନ ପ୍ରାତଃ ୪ଟା ୧୫ରେ ମଙ୍ଗଳ ଆଳତି, ୭ଟା ୩୦ରେ ଦର୍ଶନ ଆଳତି ସହ ବାଲ୍ୟଭୋଗ ଲାଗି କରାଯିବ। ଏହାସହିତ ପ୍ରତିଦିନ ୨ଥର ପ୍ରବଚନ ଓ ଭଜନ କୀର୍ତ୍ତନ କରାଯିବ। ପୂର୍ବରୁ ରଥଯାତ୍ରାରେ ଯେଭଳି ସେବା କରାଯାଉଥିଲା ତାହା କରାଯିବ। କେବଳ ଭକ୍ତମାନେ ଏଥିରେ ଅଂଶଗ୍ରହଣ କରିବେ ନାହିଁ ବୋଲି ମନ୍ଦିର ସହସଭାପତି ମିଶ୍ର କହିଛନ୍ତି।