ଭୁବନେଶ୍ୱର,୧୫।୮(ବ୍ୟୁରୋ): ସ୍ବାଧୀନତାର ୭୫ବର୍ଷ ପୂର୍ତ୍ତି ଉପଲକ୍ଷେ ‘ଆଜାଦୀ କା ଅମୃତ ମହୋତ୍ସବ’ ପାଳିଛି ସାରା ଭାରତ। ସୋମବାର ଦେଶ ପାଳନ କରିବ ୭୬ତମ ସ୍ବାଧୀନତା ଦିବସ। ଏହି ପରିପ୍ରେକ୍ଷୀରେ ଓଡ଼ିଶାରେ ରାଜ୍ୟସ୍ତରୀୟ ସ୍ବାଧୀନତା ଦିବସ ସମାରୋହ ୟୁନିଟ୍-୩ ପ୍ରଦର୍ଶନୀ ପଡିଆଠାରେ ଅନୁଷ୍ଠିତ ହେବ। ସକାଳ ୯ଟାରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ମୁଖ୍ୟ ଅତିଥି ଭାବେ ଯୋଗଦେଇ ପତାକା ଉତ୍ତୋଳନ କରିବେ। କାର୍ଯ୍ୟକ୍ରମରେ ଅନ୍ୟମାନଙ୍କ ମଧ୍ୟରେ ମୁଖ୍ୟ ଶାସନ ସଚିବ, ଗୃହ ସଚିବ, ପୋଲିସ ଡିଜିଙ୍କ ସହ ବହୁ ଅଧିକାରୀ ଯୋଗଦେବାର କାର୍ଯ୍ୟକ୍ରମ ରହିଛି। ଏହି ଅବସରରେ ସ୍ବାଧୀନତାର ୭୫ ବର୍ଷ ପୂର୍ତ୍ତି ପରିପ୍ରେକ୍ଷୀରେ ଏକ ଫଟୋଚିତ୍ର ପ୍ରଦର୍ଶନୀ ଉଦ୍ଘାଟନ କରାଯିବ। ଏଥିରେ ସ୍ବାଧିନତା ସଂଗ୍ରାମର ସମସ୍ତ ତଥ୍ୟ ଏବଂ ବରପୁତ୍ରମାନଙ୍କ ବଳିଦାନକୁ ପ୍ରଦର୍ଶିତ କରାଯିବ। ଏଥିସହିତ ପ୍ରଦର୍ଶନୀ ପଡିଆରୁ ଏକ ଅହିଂସା ରଥ ସମଗ୍ର ଓଡ଼ିଶା ଭ୍ରମଣରେ ବାହାରିବ। ଅଗଷ୍ଟ ୧୫ରୁ ଅକ୍ଟୋବର ୨ମଧ୍ୟରେ ଏହି ଅହିଂସା ରଥ ଓଡ଼ିଶାର ସମସ୍ତ ବରପୁତ୍ରଙ୍କ ଜନ୍ମସ୍ଥାନ, ସ୍ମୃତିପୀଠ, ସ୍ବାଧୀନତା ସଂଗ୍ରାମୀଙ୍କ ଜନ୍ମସ୍ଥାନ ପରିଭ୍ରମଣ କରିବା ସହିତ ବିଭିନ୍ନ ସ୍କୁଲ, କଲେଜକୁ ଛାତ୍ରୀଛାତ୍ରଙ୍କ ମଧ୍ୟରେ ସଚେତନତା ସୃଷ୍ଟି କରିବ। ରଥରେ ଲାଗିଥିବା ଏଲ୍ଇଡି ସାହାଯ୍ୟରେ ବରପୁତ୍ର ଓ ସଂଗ୍ରାମୀଙ୍କ ଉପରେ ଆଧାରିତ ଚଳଚ୍ଚିତ୍ର ପ୍ରଦର୍ଶିତ ହେବ।