ଛତ୍ରପୁର,୨ା୧୨(ଡି.ଏନ୍.ଏ.): ପ୍ରସ୍ତାବିତ ମାଛଧରା ବନ୍ଦର ଓ ଛତ୍ରପୁର କଲେଜରେ ବିଭିନ୍ନ ପଦବୀ ପୂରଣ ସମ୍ପର୍କରେ ସ୍ଥାନୀୟ ବିଧାୟକ ସୁବାସ ଚନ୍ଦ୍ର ବେହେରା ବିଧାନସଭାରେ ପ୍ରଶ୍ନ କରିଛନ୍ତି ।
ସୂଚନାନୁସାରେ, ଛତ୍ରପୁର ନିର୍ବାଚନମଣ୍ଡଳୀର ଆର୍ଯ୍ୟପଲ୍ଲୀଠାରେ ପ୍ରସ୍ତାବିତ ମାଛଧରା ବନ୍ଦର ନିର୍ମାଣ ନିମନ୍ତେ କ’ଣ ପଦକ୍ଷେପ ନିଆଯାଇଛି ସେ ସମ୍ପର୍କରେ ବିଧାୟକ ପ୍ରଶ୍ନ କରିଥିଲେ। ଏହାର ଉତ୍ତରରେ ମତ୍ସ୍ୟ ଓ ପଶୁସମ୍ପଦ ବିକାଶ ମନ୍ତ୍ରୀ ଡ.ଅରୁଣ କୁମାର ସାହୁ କହିଛନ୍ତି ଯେ, ଏହାର ନିର୍ମାଣ ପାଇଁ କେନ୍ଦ୍ର ସରକାରଙ୍କ ମତ୍ସ୍ୟ, ପଶୁପାଳନ ଓ ଡାଏରୀ ମନ୍ତ୍ରଣାଳୟ ଅଧିନସ୍ଥ କେନ୍ଦ୍ରୀୟ ତଟବର୍ତ୍ତୀ ମତ୍ସ୍ୟ ଇଂଜିନିୟରିଂ ସଂସ୍ଥା ଦ୍ୱାରା ଏକ ପ୍ରାଯୁୁକ୍ତିକ ଆର୍ଥିକ ବ୍ୟବହାର୍ଯ୍ୟତା ବିବରଣୀ ପ୍ରସ୍ତୁତ କରାଯାଉଛି । ଏହି ଟିଇଏଫ୍ଆର୍ ବିବରଣୀ ମିଳିବା ପରେ ଆର୍ଯ୍ୟପଲ୍ଲୀ ଠାରେ ପୋତାଶ୍ରୟ ନିର୍ମାଣ ବିଚାର କରାଯିବ ବୋଲି ମନ୍ତ୍ରୀ କହିଛନ୍ତି । ଛତ୍ରପୁର ବିଜ୍ଞାନ ମହାବିଦ୍ୟାଳୟ ଉଭୟ ଅଧ୍ୟାପକ ଓ ବିଭିନ୍ନ ନନ୍ ଟିଚିଂ ଷ୍ଟାଫ୍ ପଦବୀ ଖାଲି ପଡ଼ିଥିବାରୁ ଶିକ୍ଷାଦାନ ବାଧାପ୍ରାପ୍ତ ହେଉଛି। ଉକ୍ତ ପଦବୀଗୁଡିକ ପୂରଣ କରିବା ନେଇ କ’ଣ ପଦକ୍ଷେପ ନିଆଯାଇଛି ସେ ସମ୍ପର୍କରେ ବିଧାୟକ ବେହେରା ପ୍ରଶ୍ନ କରିଥିଲେ। ଏହାର ଉତ୍ତରରେ ଉଚ୍ଚଶିକ୍ଷା ମନ୍ତ୍ରୀ ଅରୁଣ ସାହୁ କହିଥିଲେ, ବର୍ତ୍ତମାନ ରାଜ୍ୟ ସରକାର ମହାବିଦ୍ୟାଳୟଗୁଡ଼ିକ ପାଇଁ ଲୋକସେବା ଆୟୋଗ ମାଧ୍ୟମରେ ପ୍ରାର୍ଥୀ ଚୟନ ପ୍ରକ୍ରିୟା ଜାରି ରହିଛି। ଏହି ପ୍ରକ୍ରିୟା ସମ୍ପୂର୍ଣ୍ଣ ହେଲେ ଆବଶ୍ୟକ ଅନୁଯାୟୀ ଶିକ୍ଷକ ପଦବୀ ପୂରଣ ହେବ।