![](https://www.dharitri.com/wp-content/uploads/2024/07/XC-5.jpg)
ନୂଆଦିଲ୍ଲୀ,୨୪।୭: କେନ୍ଦ୍ର ବଜେଟକୁ ନେଇ ତାମିଲନାଡୁର ମୁଖ୍ୟମନ୍ତ୍ରୀ ଏମ.କେ ଷ୍ଟାଲିନ ପ୍ରଧାନମନ୍ତ୍ରୀ ମୋଦିଙ୍କୁ ଚେତାବନୀ ଦେଇଛନ୍ତି। ବୁଧବାର ଷ୍ଟାଲିନ ସୋସିଆଲ ମିଡିଆ ପ୍ଲାଟଫର୍ମରେ ଏକ ପୋଷ୍ଟ କରିଛନ୍ତି। ଷ୍ଟାଲିନ କହିଛନ୍ତି, ଆପଣ କହିଥିଲେ ଯେ ବର୍ତ୍ତମାନ ଆମକୁ ଦେଶ ବିଷୟରେ ଚିନ୍ତା କରିବାକୁ ପଡିବ, କିନ୍ତୁ ମଙ୍ଗଳବାର ଉପସ୍ଥାପିତ ହୋଇଥିବା ୟୁନିୟନ ବଜେଟ ଭାରତ ନୁହେଁ, ଆପଣଙ୍କ ଶାସନକୁ ବଞ୍ଚାଇବ। ଯେଉଁମାନେ ଆପଣଙ୍କୁ ପରାସ୍ତ କରିଛନ୍ତି, ସେମାନଙ୍କ ପ୍ରତି ପ୍ରତିଶୋଧ ପରାୟଣ ହୁଅନ୍ତୁ ନାହିଁ। ମୁଁ ପରାମର୍ଶ ଦେବାକୁ ବାଧ୍ୟ ଯେ ଯଦି ଆପଣ ନିଜର ରାଜନୈତିକ ପସନ୍ଦ ଏବଂ ନାପସନ୍ଦ ଅନୁଯାୟୀ ସରକାର ଚଳାଉଛନ୍ତି, ତେବେ ଏହାର ପରିଣାମ ଭୋଗିବାକୁ ପଡ଼ିବ। ସେ ଏକଘରକିଆ ହୋଇଯିବେ।
ତାମିଲନାଡୁର ମୁଖ୍ୟମନ୍ତ୍ରୀ ଏମ.କେ ଷ୍ଟାଲିନ ତାଙ୍କ ପୋଷ୍ଟ ସହିତ ଏକ ଭିଡିଓ ମଧ୍ୟ ପୋଷ୍ଟ କରିଛନ୍ତି, ଯେଉଁଥିରେ ବିରୋଧୀ ଦଳର ନେତାମାନେ ହାତରେ ପ୍ଲାକାର୍ଡ ଧରି ସଂସଦ ବାହାରେ ବିରୋଧ କରୁଛନ୍ତି। ଏକ ପ୍ଲାକାର୍ଡରେ ଲେଖାଅଛି ଯେ, ଦେଶ ଭାରତର ବଜେଟ ଦାବି କରେ, ଏନଡିଏର ବଜେଟ ଚାହୁଁନାହିଁ।
ତାମିଲନାଡୁର ମୁଖ୍ୟମନ୍ତ୍ରୀ କହିଛନ୍ତି, କେନ୍ଦ୍ର ବଜେଟରେ ରାଜ୍ୟ ସମ୍ପୂର୍ଣ୍ଣ ଅବହେଳିତ ହୋଇଛି ଏବଂ ସେ ଏହାକୁ ନିନ୍ଦା କରିଛନ୍ତି। ସେ କହିଛନ୍ତି, ଜୁଲାଇ ୨୭ରେ ଦିଲ୍ଲୀରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଅଧ୍ୟକ୍ଷତାରେ ଅନୁଷ୍ଠିତ ହେବାକୁ ଥିବା ନୀତି ଆୟୋଗ ବୈଠକକୁ ବର୍ଜନ କରିବେ।