ଲୋଇସିଂହା,୧୩।୨(ଡି.ଏନ.ଏ.): ସରକାର ସର୍ବଶିକ୍ଷା ଅଭିଯାନ ମାଧ୍ୟମରେ ସରକାରୀ ସ୍କୁଲର ଛାତ୍ରୀଛାତ୍ରଙ୍କୁ ମାଗଣାରେ ବହି ଯୋଗାଇବାର ବ୍ୟବସ୍ଥା କରିଛନ୍ତି। ହେଲେ ଦାୟିତ୍ୱରେ ଥିବା ଶିକ୍ଷକଙ୍କ ଦାୟିତ୍ୱହୀନତା ଯୋଗୁ ବହିର ସୁଷମ ବଣ୍ଟନ ନ ହୋଇ ସ୍କୁଲରେ ପଡି ନଷ୍ଟ ହେଉଛି। ଶୁକ୍ରବାର ଲୋଇସିଂହା ବ୍ଲକ କଲୋନୀ ସ୍କୁଲରେ ଏହାର ଉଦାହରଣ ଦେଖିବାକୁ ମିଳିଛି। ଏହି ସ୍କୁଲକୁ ଆସିଥିବା ବହୁସଂଖ୍ୟକ ବହି ଛାତ୍ରୀଛାତ୍ରଙ୍କୁ ବଣ୍ଟନ ନ କରି ରଖାଯିବା ଫଳରେ ତାହାକୁ ଉଈ ଖାଇ ନଷ୍ଟ କରି ଦେଇଥିବା ନଜରକୁ ଆସିଛି।
ଛାତ୍ରୀଛାତ୍ରଙ୍କୁ ଆକୃଷ୍ଟ କରିବା ପାଇଁ ସରକାରୀ ସ୍କୁଲରେ ବହୁ ବିଧ ଯୋଜନା କାର୍ଯ୍ୟକାରୀ ହେଉଛି। ମଧ୍ୟାହ୍ନ ଭୋଜନ ଠାରୁ ଆରମ୍ଭ କରି ମାଗଣା ପୋଷାକ, ଜୋତା ଓ ବହି ଯୋଗାଇ ଦିଆଯାଉଛି। ପ୍ରତି ଶିକ୍ଷାବର୍ଷରେ ସ୍କୁଲକୁ ବହି ଯୋଗାଣ ହେଉଛି। ସିଆରସିସିଙ୍କ ଜରିଆରେ ବହି ବଣ୍ଟନ କରାଯାଇଥାଏ। ହେଲେ ଅନେକ ସମୟରେ ପାଠ୍ୟ ପୁସ୍ତକକୁ ନେଇ ଛାତ୍ରୀଛାତ୍ର ଓ ଅଭିଭାବକ ହଟହଟା ହୋଇଥାନ୍ତି। ଅଭିଭାବକମାନେ ସ୍କୁଲ କର୍ତ୍ତୃପକ୍ଷଙ୍କୁ ପଚାରିଲେ ଅଧା ବହି ଆସଛି ବୋଲି ଅନେକ ସମୟରେ ଉତ୍ତର ଶୁଣିବାକୁ ମିଳିଥାଏ। ଲୋଇସିଂହା ବ୍ଲକ ପରିସରରେ ରହିଛି ବ୍ଲକ ଗୋଷ୍ଠୀ ଶିକ୍ଷା ଅଧିକାରୀଙ୍କ କାର୍ଯ୍ୟାଳୟ ଓ ବ୍ଲକ କଲୋନୀ ସ୍କୁଲ। ଏଠି ପ୍ରଥମରୁ ପଞ୍ଚମ ଶ୍ରେଣୀ ପର୍ଯ୍ୟନ୍ତ ଶିକ୍ଷାଦାନ ବ୍ୟବସ୍ଥା ରହିଛି। ତେବେ ସ୍କୁଲର ଛାତ୍ରୀଛାତ୍ରଙ୍କ ପାଇଁ ଆସିଥିବା ବହୁ ବହି ଗଚ୍ଛିତ କରି ରଖାଯାଇଥିଲା। ଯାହାକୁ ଉଇ ଖାଇ ନଷ୍ଟ କରି ଦେଇଥିବା ଅଭିଯୋଗ ହୋଇଛି। ଏ ସମ୍ପର୍କରେ ପ୍ରଧାନ ଶିକ୍ଷୟିତ୍ରୀ ବିନୋଦିନୀ ଦୀପ କହିଛନ୍ତି, ଏହା ଆମ ସ୍କୁଲ ପାଇଁ ଆସିଥିବା ବହି ନୁହେଁ। ଲୋଇସିଂହା କ୍ଲଷ୍ଟର ଘର ଭଲ ନ ଥିବାରୁ ଏଠାରେ କିଛି ବହି ରଖାଯାଇଥିଲା। ଲକ୍ ଡାଉନ ଯୋଗୁ ସ୍କୁଲ ବନ୍ଦ ଥିବା ବେଳେ ତାହା ନଷ୍ଟ ହୋଇଯାଇଛି।