ଭୁବନେଶ୍ବର,୩ା୭(ସୁନିତ୍ ମିଶ୍ର): ଶ୍ରୀମନ୍ଦିର ରତ୍ନଭଣ୍ଡାର ଚାବି ହଜିବା ପ୍ରସଙ୍ଗ ନେଇ ରାଜନୀତି ଥମିବାର ନଁା ଧରୁନାହିଁ। ରତ୍ନଭଣ୍ଡାର ଖୋଲିବା ସମ୍ପର୍କରେ ରାଜ୍ୟ ସରକାରଙ୍କ ପକ୍ଷରୁ ଆଗ୍ରହ ପ୍ରକାଶ କରାଯାଉ ନ ଥିବାବେଳେ ବିରୋଧୀ କିନ୍ତୁ ଏହି କଥାକୁ ଜାବୁଡି ଧରିଛନ୍ତି। ରତ୍ନଭଣ୍ଡାର ନିହାତି ଖୋଲିବା ଦରକାର ବୋଲି ଉଭୟ ଭାଜପା ଏବଂ କଂଗ୍ରେସ ନେତାମାନେ ଦାବି କରିଆସୁଛନ୍ତି। ଭାଜପା ଏହି ପ୍ରସଙ୍ଗରେ ହାଇକୋର୍ଟରେ ଜନସ୍ବାର୍ଥ ମାମଲା ଦାୟର କରିଥିବା ବେଳେ କଂଗ୍ରେସ କିଛି ବିଭ୍ରାଟ ଯୋଗୁ ସରକାର ରତ୍ନଭଣ୍ଡାର ଖୋଲୁ ନ ଥିବା ଯୁକ୍ତି ବାଢ଼ିଛି। ବରିଷ୍ଠ ଭାଜପା ନେତା ବିଜୟ ମହାପାତ୍ର କହିଛନ୍ତି ଯେ, ରତ୍ନଭଣ୍ଡାର ଖୋଲିବାରେ ଅସୁବିଧା କେଉଁଠାରେ ଅଛି। ପୂର୍ବରୁ ମଧ୍ୟ ଗୋଟିଏ କଥା କହିଛି ରତ୍ନଭଣ୍ଡାର ରାଜ୍ୟ ସରକାରଙ୍କ ସମ୍ପତ୍ତି ନୁହେଁ। ଏହା ସରକାରୀ କିମ୍ବା କୌଣସି ବ୍ୟକ୍ତିଗତ ସମ୍ପତ୍ତି ନୁହେଁ। ଏହା ପ୍ରଭୁ ଜଗନ୍ନାଥଙ୍କ ସମ୍ପତ୍ତି। ରତ୍ନଭଣ୍ଡାର ସେଥିଲାଗି ସେତେବେଳେ ତିଆରି ହୋଇଥିଲା। ପ୍ରଭୁଙ୍କ ଅଳଙ୍କାର ସବୁ ରତ୍ନଭଣ୍ଡାର ଭିତରେ ସୁରକ୍ଷିତ ଭାବେ ରହିବ ବୋଲି ତାକୁ ୩ ଭାଗରେ ବିଭକ୍ତ କରି ତିଆରି କରାଯାଇଥିଲା। ଶହ ଶହ ବର୍ଷ ତଳେ ଏହା ତିଆରି ହେଲାବେଳେ ଆମେ ମଧ୍ୟ ନ ଥିଲୁ, ଏହା ବହୁ ପୂରୁଣା କଥା ବୋଲି ସେ କହିଛନ୍ତି। କଂଗ୍ରେସ ବିଧାୟକ ତାରା ପ୍ରସାଦ ବାହିନୀପତି କହିଛନ୍ତି ଯେ, ସମସ୍ତଙ୍କ ଭଳି ତାଙ୍କ ମନରେ ବି ସନ୍ଦେହ ସୃଷ୍ଟି ହେଉଛି। ରତ୍ନଭଣ୍ଡାରର ରତ୍ନସବୁ ବାହାରକୁ ଚାଲିଯାଇନି ତ ବୋଲି ସେ ପ୍ରଶ୍ନ କରିଛନ୍ତି। ବାହାର ଦେଶ ବା ରାଜ୍ୟକୁ ଜଗନ୍ନାଥଙ୍କ ସମ୍ପତ୍ତି ଚାଲିଯାଇନି ତ। ଜଗନ୍ନାଥଙ୍କ ଜମିବାଡି ସବୁ ତ ବିକ୍ରି କରି ଖାଇଗଲେ, ଏବେ ତାଙ୍କର ଯେଉଁ ମହଣ ମହଣ ସୁନା ଗହଣା ଥିଲା ତାହାକୁ ବି ସବୁ ବିକ୍ରି କରି ଖାଇଗଲେ ବୋଲି ଭାବୁଛି। ତେଣୁ ରାଜ୍ୟ ସରକାର ତୁରନ୍ତ ପଦକ୍ଷେପ ନେଇ ରତ୍ନଭଣ୍ଡାର ଖୋଲନ୍ତୁ। ନ ହେଲେ ଆଗକୁ ଏହି ଘଟଣାରେ ଦେଶବ୍ୟାପୀ ଆନ୍ଦୋଳନ ହେବ ବୋଲି ତାରା କହିଛନ୍ତି। ପୁରୀ ଏମ୍ପି ପିନାକୀ ମିଶ୍ର କହିଛନ୍ତି ଯେ, ଏହି ମାମଲା କୋର୍ଟରେ ବିଚାରାଧୀନ ଅଛି। ତେଣୁ କୋର୍ଟରେ ମାମଲା ଥିବାବେଳେ ଏହା ଉପରେ କିଛି କହିବା ଠିକ୍ ହେବ ନାହିଁ। ତେଣୁ ଯାହା କୋର୍ଟ ଏବଂ ଲୋକଙ୍କ ଇଚ୍ଛା ହେବ ସେହି ଅନୁସାରେ କାମ ହେବ, ଏ ବିଷୟରେ ଅଧିକ କିଛି କହିବାକୁ ଚାହୁଁନି ବୋଲି ପିନାକୀ କହିଛନ୍ତି।