ଗୁଡ଼ାରୀ, ୨୧।୧(ଡି.ଏନ୍.ଏ.): ରାୟଗଡ଼ା ଜିଲା ଗୁଡ଼ାରି ସହରର ନୂତନ ବସ୍ଷ୍ଟାଣ୍ଡ ନିକଟରେ ଥିବା ବିଜୁ ପାଠାଗାରର ପୁନରୁଦ୍ଧାର ନିମନ୍ତେ ଶୁକ୍ରବାର ସେଥିରେ ପଡ଼ିଥିବା ତାଲାକୁ ଭଙ୍ଗାଯାଇଛି। ତାଲା ଭଙ୍ଗାଯିବାବେଳେ ଗୁଡ଼ାରି ବିଡିଓ ନୃସିଂହ ଚରଣ ସେଠୀ ମାଜିଷ୍ଟ୍ରେଟଭାବେ ଉପସ୍ଥିତ ଥିଲେ। ଏନ୍ଏସି କାର୍ଯ୍ୟନିର୍ବାହୀ ଅଧିକାରୀ ଭାରତୀ ଦେବୀ ଓ ଥାନାଧିକାରୀ ଦୀନବନ୍ଧୁ ଶବରଙ୍କ ଉପସ୍ଥିତିରେ ଏହି ବନ୍ଦ ପାଠାଗାରର ସମସ୍ତ ତାଲା ଭଙ୍ଗାଯାଇଥିଲା। ଏହି ପାଠାଗାର ମରାମତି ପରେ ଖୁବ୍ ଶୀଘ୍ର ନୂତନ ଭାବେ କାର୍ଯ୍ୟ କରିବ ବୋଲି ଭାରତୀ ଦେବୀ କହିଛନ୍ତି। ତାଲା ଭଙ୍ଗା କାର୍ଯ୍ୟକ୍ରମରେ ଏନ୍ଏସିର ସମସ୍ତ କର୍ମଚାରୀ ଉପସ୍ଥିତ ଥିଲେ। ସୂଚନାନୁଯାୟୀ, ୨୦୧୩ରେ ସହରବାସୀଙ୍କ ନିମନ୍ତେ ତତ୍କାଳୀନ ବିଧାୟକ ସ୍ବର୍ଗତ ରାମମୂର୍ତ୍ତି ମୁଟିକାଙ୍କ ଦ୍ୱାରା ବିଜୁ ପାଠାଗାର ସ୍ଥାପନ କରାଯାଇଥିଲା। ଉଦ୍ଘାଟନ ହେବା ପରଠାରୁ ଏହି ପାଠାଗାର କାର୍ଯ୍ୟକ୍ଷମ ହୋଇ ନ ଥିଲା। ଗୁଡ଼ାରିରେ ଗୋଟିଏ ହେଲେ ପାଠାଗାର ନ ଥିବାବେଳେ ଏହି ପାଠାଗାର ଦୀର୍ଘ ବର୍ଷ ହେଲା ବନ୍ଦ ରହିଥିଲା ।