ବାସ୍ତୁଶାସ୍ତ୍ର ଅନୁସାରେ, ନାଲିରଙ୍ଗ ହେଉଛି ଊର୍ଜ୍ଜା ଓ ଶକ୍ତିର ପ୍ରତୀକ। ତେଣୁ ଏହି ରଙ୍ଗର ଅବିରରେ ହୋଲି ଖେଳିଲେ କୁଆଡ଼େ ସ୍ବାସ୍ଥ୍ୟ ଭଲ ରହିବା ସହ ମାନସମ୍ମାନ ବୃଦ୍ଧି ପାଇଥାଏ ବୋଲି ବିଶ୍ୱାସ ରହିଛି। ଅନ୍ୟପକ୍ଷେ ରାଗୀ ସ୍ବଭାବର ଅଥବା ଅବସାଦଗ୍ରସ୍ତ ବ୍ୟକ୍ତିଙ୍କ ପାଇଁ ନାଲିରଙ୍ଗ ଅବିର ବ୍ୟବହାର କରିବା ଆଦୌ ଠିକ୍ ନୁହେଁ ବୋଲି ବି କୁହାଯାଇଛି। ସେହିପରି ନାରଙ୍ଗୀ ରଙ୍ଗ ଯେହେତୁ ସାମାଜିକତାର ପ୍ରତୀକ ଏବଂ ମାନସିକସ୍ତରରେ ବ୍ୟକ୍ତିଙ୍କୁ ଦୃଢ଼ କରିବାରେ ସାହାଯ୍ୟ କରିଥାଏ; ତେଣୁ ହୋଲି ଦିନ ଏହି ରଙ୍ଗର ଅବିରରେ ଖେଳିବା ଶୁଭ ହୋଇଥାଏ। ଉତ୍ସାହର ପ୍ରତୀକ କୁହାଯାଉଥିବା ହଳଦିଆ ରଙ୍ଗର ଅବିରରେ ହୋଲି ଖେଳିଲେ ଶୁଭଫଳ ପ୍ରଦାନ କରିଥାଏ ବୋଲି ବାସ୍ତୁଶାସ୍ତ୍ରରେ ଉଲ୍ଲେଖ ରହିଛି। ସବୁଜ ରଙ୍ଗର ଅବିରରେ ବି ହୋଲି ଖେଳିହେବ; କାରଣ ଏହି ରଙ୍ଗ ଅବସାଦ ଦୂର କରିବାରେ ବେଶ୍ ସହାୟକ ହୋଇଥାଏ। ନୀଳରଙ୍ଗ ମନରେ ସାହସ ଭରିଥାଏ; ତେଣୁ ଏହି ରଙ୍ଗର ଅବିରରେ ବି ହୋଲି ଖେଳିହେବ ବୋଲି ବାସ୍ତୁଶାସ୍ତ୍ରରେ କୁହାଯାଇଛି। ସେହିପରି ବାଇଗଣୀ ଓ ସୁନେଲି ରଙ୍ଗର ଅବିରରେ ହୋଲି ଖେଳିବା ଶୁଭ ହୋଇଥାଏ। କାରଣ ବାଇଗଣୀ ରଙ୍ଗ ଆଧ୍ୟାତ୍ମିକତାର ପ୍ରତୀକ ହୋଇଥିବାବେଳେ ସୁନେଲି ଧନ ଓ ମାନସମ୍ମାନକୁ ସୂଚିତ କରିଥାଏ।