ଯାଜପୁର ଅଫିସ,୧୪ା୧୧: ଯାଜପୁର ଜିଲା ଧର୍ମଶାଳା ବ୍ଲକ ମହିସରା ପ୍ରାଥମିକ ସେବା ସମବାୟ ସମିତି (ପାକ୍ସ) ସମ୍ପାଦକ ଅମରେନ୍ଦ୍ର ରାଉତଙ୍କ ବିରୋଧରେ ଆର୍ଥିକ ଅନିୟମିତତା ଅଭିଯୋଗ ଉପରେ କଡ଼ା କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ନିଷ୍ପତ୍ତି ହୋଇଛି। ଏହିକ୍ରମରେ ମହୀଶରା ପାକ୍ସର ସମ୍ପାଦକ ରାଉତଙ୍କୁ ପରିଚାଳନା କମିଟି ତାଙ୍କ ପଦବୀରୁ ବହିଷ୍କାର କରିପାରିବ ବୋଲି ରାଜ୍ୟ ସମବାୟ ସମିତିର ନିବନ୍ଧକ (ଆର୍ସିଏସ୍) ଭିଜିଲାନ୍ସ ଏସ୍ପିଙ୍କୁ ସୂଚନା ଦେଇଛନ୍ତି। ତେଣୁ ସମ୍ପୃକ୍ତ କମିଟି ମାଧ୍ୟମରେ ଆବଶ୍ୟକ ମଞ୍ଜୁର କରାଯାଇ ପରବର୍ତ୍ତୀ ପଦକ୍ଷେପ ଗ୍ରହଣ କରିବାକୁ ଆରସିଏସ୍ ୮ା୧୧ା୨୦୨୧ ତାରିଖ ପତ୍ରରେ ଉଲ୍ଲେଖ କରିଛନ୍ତି। ସୂଚନାଯୋଗ୍ୟ, ୨୦୧୯ ଏପ୍ରିଲରେ କୃଷକଙ୍କ ନାମରେ ଆସୁଥିବା ବିଭିନ୍ନ ଯୋଜନାରେ ଆର୍ଥିକ ହରିଲୁଟ ଅଭିଯୋଗ ସଂକ୍ରାନ୍ତରେ ଭିଜିଲାନ୍ସ ପକ୍ଷରୁ ତଦନ୍ତ ହୋଇଥିଲା। ୧ା୪ା୨୦୧୬ରୁ ୩୧ା୩ା୨୦୧୭ ମଧ୍ୟରେ ଚାଷୀଙ୍କ ବୀମା, ବିହନ, ଋଣ ଆଦି ଅନୁଦାନ ବାବଦକୁ ବିପୁଳ ଅର୍ଥ ହଡ଼ପ ହୋଇଥିବା ଭିଜିଲାନ୍ସ ପକ୍ଷରୁ ତଦନ୍ତରୁ ଜଣାପଡ଼ିଥିଲା। ଆର୍ସିଏସ୍ଙ୍କ ପାଖରେ ଭିଜିଲାନ୍ସ ତଦନ୍ତ ରିପୋର୍ଟ ଦାଖଲ କରିବା ପରେ ଉପରୋକ୍ତ ପଦକ୍ଷେପ ଗ୍ରହଣ କରାଯାଇଥିବା ସୂଚନା ମିଳିଛି।
୨୦୧୦-୧୧ ବର୍ଷଠାରୁ ମନଇଚ୍ଛା ଖର୍ଚ୍ଚ ଓ ରେକର୍ଡପତ୍ରରେ କାରସାଦି କରି ତୋସରପାତ କରାଯିବା ଫଳରେ ମାତ୍ର ୬ ବର୍ଷ ମଧ୍ୟରେ ୫୦ ଲକ୍ଷ ୮୭ ହଜାର ଟଙ୍କା କ୍ଷତି ହୋଇଛି। ଏହାସହ ସମିତିରେ ୧ କୋଟି ୩୪ ଲକ୍ଷ ୪୯ ହଜାର ୯୧୯ ଟଙ୍କାର କ୍ଷତି ହୋଇଥିବା ଅଡିଟ ରିପୋର୍ଟରେ ସୂଚନା ମିଳିଥିଲା। ସ୍ବଳ୍ପମିଆଦୀ କୃଷି ଋଣ ଟଙ୍କା ଲଗାଣରୁ ପ୍ରାୟ ୧ କୋଟିରୁ ଊର୍ଦ୍ଧ୍ୱ କୃଷି ଋଣ ହଡ଼ପ କରାଯାଇଛି। ଏନେଇ ପୂର୍ବରୁ ୫ରୁ ଊର୍ଦ୍ଧ୍ୱ ଥର ତଦନ୍ତ ନିର୍ଦ୍ଦେଶ ହୋଇଥିଲେ ହେଁ କୌଣସି ତଦନ୍ତ ହୋଇ ନଥିଲା। ୨୩ା୧ା୨୦୧୮ରେ ୧୫ ଜଣ ଚାଷୀଙ୍କ ନାମରେ ପ୍ରାୟ ୨ ଲକ୍ଷ ଟଙ୍କା ଲେଖାଏ ରବି ଚାଷ ପାଇଁ ଋଣ ମଞ୍ଜୁର ହୋଇଥିଲା। କେତେଜଣ ଭାଗଚାଷୀ ଗୋଷ୍ଠୀଙ୍କ ନାମରେ ୨୦୧୬ ଅଗଷ୍ଟରେ ୧ ଲକ୍ଷ ୧୦ ହଜାର ଟଙ୍କା ଲେଖାଏ ଋଣ ମଞ୍ଜୁର ହୋଇଥିଲା। ଏମାନେ ଖିଲାପୀ ହୋଇଥିବାବେଳେ ସେମାନଙ୍କ ନାମରେ ପୁଣି ୨ ଲକ୍ଷ ୫୦ ହଜାର ଟଙ୍କା ଲେଖାଏ ଋଣ କିପରି ପ୍ରଦାନ କରାଯାଇଛି ବୋଲି ଅଭିଯୋଗ ହୋଇଥିଲା। ଏଭଳି ଅନେକ ଅଭିଯୋଗକୁ ଭିତ୍ତି କରି ଏଆର୍ସିଏସ୍ ତାଙ୍କ ପତ୍ରସଂଖ୍ୟା ୮୮୫୭/୩ା୫ା୨୦୧୮ରେ କଟକ କେନ୍ଦ୍ର ସମବାୟ ବ୍ୟାଙ୍କର ସମ୍ପାଦକଙ୍କୁ ତଦନ୍ତ କରି ରିପୋର୍ଟ ପ୍ରସ୍ତୁତ କରିବାକୁ ନିର୍ଦ୍ଦେଶ ଦେଇଥିଲେ। ତଥାପି କୌଣସି କାର୍ଯ୍ୟାନୁଷ୍ଠାନ ଗ୍ରହଣ ନ ହେବାରୁ ବିଭାଗସ୍ତରରେ ଭିଜିଲାନ୍ସର ସହଯୋଗ ଲୋଡ଼ାଯାଇଥିଲା। ଏ ସଂକ୍ରାନ୍ତରେ ଯାଜପୁର ଏଆର୍ସିଏସ୍ ଶରତ ମଲ୍ଲିକଙ୍କୁ ପଚାରିବାରେ ସେ କହିଛନ୍ତି, ଆର୍ସିଏସ୍ଙ୍କ ନିର୍ଦ୍ଦେଶ ଅନୁସାରେ ଉପଯୁକ୍ତ ପଦକ୍ଷେପ ଗ୍ରହଣ କରାଯାଉଛି। ଏନେଇ ଭିଜିଲାନ୍ସ ଡିଏସ୍ପିଙ୍କ ସହ ଆଲୋଚନା କରାଯାଇ କମିଟିକୁ ସୂଚିତ କରାଯାଇଛି।
ଯାଜପୁର ଜିଲାରେ କାର୍ଯ୍ୟରତ କେତେଜଣ ପାକ୍ସ କର୍ମଚାରୀ ଧାନ ସଂଗ୍ରହରେ ହେରଫେର ଏବଂ କୃଷି ବୀମା ଟଙ୍କା ଓ ଋଣ ଲଗାଣ ଆଦିରେ ବ୍ୟାପକ ଚଞ୍ଚକତା କରୁଥିବା ଅଭିଯୋଗ ହୋଇଆସୁଛି। ଏହି ଦୁର୍ନୀତିରେ ପ୍ରଭାବିତ ଚାଷୀକୁଳ ବିଭିନ୍ନ ସମୟରେ ଅଭିଯୋଗ କରି ଆସୁଥିଲେ ହେଁ ତଦନ୍ତ ନିର୍ଦ୍ଦେଶରେ ବିଭାଗୀୟ କାର୍ଯ୍ୟାନୁଷ୍ଠାନ ସୀମିତ ରହିଛି। ଏହାପୂର୍ବରୁ ବଡ଼ଚଣା, ଧନେଶ୍ୱର, ମାର୍କଣ୍ଡପୁର ଆଦି ପାକ୍ସରେ ଆର୍ଥିକ ଅନିୟମିତତା ହୋଇଥିବା ଅଭିଯୋଗ ହୋଇଥିଲେ ହେଁ ବିଭାଗୀୟ କେତେଜଣ ଅଧିକାରୀ ଏହାକୁ ଚାପିଦେବାକୁ ଏଯାଏ ସକ୍ଷମ ହୋଇଛନ୍ତି। ତେଣୁ ଏହି ଅଭିଯୋଗ ବିରୋଧରେ କେବେ ତଦନ୍ତ କରାଯାଇ କାର୍ଯ୍ୟାନୁଷ୍ଠାନ ହେବ ବୋଲି କୃଷକମାନେ ପ୍ରଶ୍ନ କରୁଛନ୍ତି।